船大約花咗20分鐘，就由三角駅去到松島港～
一落船，大家就各散東西？！我哋book咗Sea Cruise Glamping話會有免費pick up，究竟要去邊度搭shuttle？見到有啲人過馬路去巴士站，我哋又跟過去，睇落又唔係幾對路，又過返來⋯不如去Sea Cruise個office問問啦！原來根本冇所謂一架「shuttle」，只係由職員按需求用私家車載客人過去～
搭車過去可能都係幾分鐘，後來我哋自己都可以行路出來，不過當時拎住大行李，都冇得唔靠人啦～
glamping嘅reception係一間小木屋，職員同我哋核對好booking內容、付款，再講解晚餐、早餐嘅安排，跟住就帶我哋去我哋個帳幕～
原來有無限量供應酒水飲品！！可以自由去reception小木屋度任斟，酒類方面有威士忌、日本酒、梅酒、啤酒，汽水、果汁全部都任飲，不過天氣太凍，冇話特別想飲凍嘢，有啲可惜囉～
佢話，晏少少就會將啲晚餐BBQ食物送過去小屋，如果我哋開爐有問題都可以搵佢～
跟住我哋就可以返我哋個帳幕啦，我哋住最近reception嘅E號屋～點解一時話屋一時話帳幕呢？話明叫glamping，係要瞓帳幕嘅，但要豪華，當然要有舒服嘅衛浴設備啦，所以我哋間屋分兩部份，一部份係瞓覺嘅帳幕，另外一部份就係小木屋嘅客廳廚房同埋浴室，連接兩個部份，大約有一至兩米嘅戶外空間，兩邊都分別要鎖門，所以半夜如果要去廁所，都係有啲狼狽，睇埋之後嘅blog就知有幾狼狽～
BBQ爐同餐枱係出面，我係入面~
我哋自家庭院嘅小平台，如果天氣暖啲，可以好好享用呢個空間~
而家冬天即使攬住都好凍，影完張相要入番屋~
未夠鐘BBQ，我哋決定周圍去行下～
先行喺營地嘅周圍啦，通去海邊嗰條路，會經過其他營舍，今晚都有啲家庭入住，不過夜咗都冇話聽到佢哋啲聲音～見到個未點火嘅campfire，夜晚係咪會點著？會唔會好熱鬧？
落去海邊，係個石灘~
啲水係咪好凍呀？
營地對住嘅一個小海灣~
呢度就係我哋住一晚嘅Sea Cruise Glamping啦，影下個招牌先~
我再出去遠啲散步啦，睇住時間，去到邊就邊啦～離開營地只有一條路，我哋經過民居、荒廢咗嘅旅館、樹林嘅入口等等~話說住係嗰度嘅人全部都係同一姓氏，經過啲門牌，我哋就擅自係度猜想佢哋究竟係咩關係囉~
出到路口，右邊係落船嘅松島港，左邊就係天草5號橋啦，行到好攰嘅兩個小朋友話唔明行咁遠有乜好睇⋯
登上5號橋~
風景都幾靚丫！
回程啦！沿路返去營地，隔多陣職員就送上我哋嘅晚餐材料啦！
送來已經見到大堆頭大製作，我哋叫咗兩大兩細嘅食物，份量未免太多了吧？！肉類、海鮮、蔬菜、前菜、麵包一應俱全，兒童餐份量都好勁，盡力食啦！
未影晒﹗呢邊仲有~早知拆開晒啲保鮮紙至影啦~
都有都有﹗
我鍾意cold cuts同芝士拼盤呀﹗啲法包仲要切成浪漫嘅心形~blu~
好靚嘅肉同生蠔~俾著我自己預備BBQ材料都未必捨得買~
呢個係出名嘅本地產天草雞嚟架，點都要一試啦~
魚海鮮湯~
爸爸大廚努力中~
有部份菜式其實已經預備好晒，只要加熱煮滾就得了~
個餐具袋好pro咁，影低佢記錄下先~
睇嚟冬天去露營都唔係好主意，小木屋裏面夠暖，帳幕裏面都夠暖，但BBQ嘅小庭園，雖然可以落晒膠簾擋一擋風，但即使開住個火爐，兩個小朋友都頂唔順喺度坐太耐～結果，爸爸做大廚，努力不停燒烤，我就做助手同侍應，幫爸爸遞工具，又serve啲食物比小朋友，拮下嘢食送落爸爸個嘴，唔係我想像中，一家人其樂融融咁圍住個爐BBQ囉～如果想去日本glamping嘅怕凍南方人，都係秋天去啦～
都係嗱嗱聲食飽咗，入去小木屋坐實際啲！我同曉做代表出去攞嘢飲，其實係曉陪我去攞酒飲至真～出去見到好多星星呀，我哋轉頭叫埋爸爸同詩出嚟睇啦～
出面生好咗個營火，我諗起<單身即地獄>約會實境show呢，每季啲參加者都有一兩晚會圍住campfire嚟飲酒傾計~我哋，影完張相就走了，太凍~去斟嘢飲先﹗
個名就叫做天草嘅純米燒酌酒精度數太高，好似有25度，一飲落去個肚就熱晒滾晒，而且口味比較辣，唔係我嘅喜好，企係度飲少少試過就算了~
都係梅酒口味啱我多啲~
曉揀咗可樂~
點知同佢哋再出嚟時，啲星星又比雲遮住晒lu，太可惜了！
都係入番去啦，夠晒溫暖~
詩，點解你冇飲都醉咗嘅？
仲有歎埋杯梅酒~
話說，去glamping梗係為咗享受大自然啦，所以小木屋冇電視機，但係房入邊本營地指南有寫，如果落雨，可以免費借投影機，又幾貼心喎～我哋決定早啲沖曬涼，過去帳幕度嘆下～
小木屋個浴室好好，水夠熱、水壓夠，竟然去露營都有得浸浴添呀！
我哋三母女先沖好，等埋爸爸沖完一齊玩多陣啤牌先瞓覺～
舒舒服服嘅大大雙人床x2~
本來以為可以係個帳幕度觀星，原來個透明幕頂有啲厚，而且外面有水氣，所以望出去濛濛的，要睇星的話都係要出番去戶外~你睇我哋嘅衣著，就知道帳幕入面係幾咁溫暖，沖完涼睇怕都冇可能再出去了~
上次去歐洲時學識咗玩鋤大D，今次去旅行鋤大D依然係佢哋嘅favourite～
帳幕入面兩張床都好大，最初嘅安排係三母女瞓一張，爸爸瞓一張～
詩呢幾日都有啲唔舒服，間中咳得好犀利，今晚瞓覺就出事啦，半夜咳到反胃，好在我哋經驗豐富，佢一嘔，我用我件睡衣兜住90%以上嘅嘔吐物，即刻叫醒爸爸支援，叫爸爸衝過去小木屋拎個膠袋過嚟，接住我睡衣兜住嘅嘔吐物，同埋護送我哋兩個過去沖涼、換衫，好在喺宝來館洗咗一次衫，我哋啲衫嘅數目鬆動咗啲～好不容易搞返掂可以再瞓過，啲污糟衫就聽朝先搞啦～下半場變成爸、我、詩瞓，曉可以獨霸嗰張有少少污糟嘅床，瞓到豬豬咁嘅佢當然完全唔知道發生過咁大件事啦～
返到去大家問起glamping好唔好玩，無奈地，印象最深刻就係嘔吐事件～不過嘛，去旅行，總係有啲奇奇怪怪嘅事發生，先至特別難忘嘅～
前往其他日本旅遊blog