下晝其中一個重要嘅活動就係去睇溜冰show《Spirits of the Seasons》～當知道我哋呢隻船有溜冰場嘅時候，我都好期待去溜下冰，但上到隻船，總係唔知溜冰場幾時開放俾大家入去玩，事實上都太多其他嘢玩，我都唔係好在意有冇得溜冰，加上溜冰場嘅位置唔常經過，又未必會諗起佢～不過溜冰show就點都唔可以錯過喇，甚至船入面嘅廣播都會提醒大家唔好錯過～溜冰show只有海上航行嘅兩日有公演，今次睇咗先就唔使心掛掛啦～
開場之後唔影得相，就有福福係開場前做代表啦~
夜晚啲show好多時都坐唔滿，溜冰show好受歡迎喎，可能大人細路都咁有興趣啦，我哋坐嘅位比較後，好處係可以睇晒個show嘅全貌，但係就冇機會成為上台嘅現場觀眾啦，究竟曉有被人邀請的話，敢唔敢上台呢？溜冰show好似夜晚嘅歌舞一樣咁精彩，音樂、服裝、場景、編排都好完美，比起歌舞，仲多咗刺激感添！坐得前嘅話，好似睇海洋劇場咁，除咗有機會上台之外，仲係「濕身位」，啲溜冰演出者好落力咁溜嘅時候，會濺起冰？水？見到人哋會濕﹗
睇完show我哋睇下船上時間表，我提議去睇人哋打排球，要上頂樓嘅球場～好啦，我哋分頭去完廁所就喺球場集合啦～
爸爸同福福睇住等我哋~
見女廁好多人，我哋三母女入咗一格獨立殘廁，搞掂晒想走時，發現道門開唔到，好似個鎖卡住咗咁，點算呀？反覆試過撳掣、樓下個鎖，點都郁唔到！兩個女已經好驚～我哋冇付費join郵輪嘅Wi-Fi plan，但都可以用郵輪自己個app個messenger，不過有message唔識得自己pop up，要對方打開個app先睇到囉～我send message俾爸爸求救，點知⋯
可能我太緊張，寫得唔好，佢意識唔到我哋仍然被困⋯點算？
呢個時候唯有用最原始嘅方法，就係用力拍門，向外面求救，你話識英文幾重要呢？Anybody outside? We are locked!!!好在呢個時間頂樓甲板好熱鬧，好快就有其他客人聽到我嘅聲音，即刻搵職員嚟救我哋～睇嚟個鎖真係只係某一刻kick kick地，後來都唔係靠個職員點樣破開個鎖，都係擰下擰下就打得開返～
成功出返嚟，就有三個憤怒、悲傷、受驚嚇嘅女人，向住爸爸投訴，做乜咁耐都唔嚟救救我哋？
已經冇心機去睇人打排球，我哋入去自助餐廳，食少少甜嘢，定一定驚～
都係嗰句，每個旅行，出少少亂子，先會變成嗰次旅行嘅highlight同埋回憶嘅～
喺頂嗰幾層遊走時，發現有個位可以俾你睇下駕駛艙，原來船長揸船係咁嘅～
有得玩shuffleboard，十幾年前去cruise嗰次都有得玩~
有用支丫叉嚟推塊餅去指定得分區域~
Cruising呢一日仲有另一個焦點，就係formal dress code嘅晚餐～好多年前第一次坐郵輪時，我已經有咁嘅經驗，呢一晚，大家着靚靚嘅西裝、晚禮服去食晚餐，一齊影啲靚相，都係一個美好回憶～出發前見到郵輪行程，某啲日子有dress code，我就提早準備定～
爸爸好多年冇着過西裝啦，最近大家去飲都唔着西裝不特止，佢返工、見客，都係T恤長褲就搞掂，所以屋企都冇啱身嘅西裝～兩個女平時都係鍾意T恤短褲背心裙，都係要幫佢哋買裙買鞋～唔想花費太多嘅solution，當然係偉大嘅淘寶啦～
阿詩套裙最fit~
兩個女嘅繡花鞋都好靚好舒服～曉條裙有少少買得太長，算啦，勉強着住先啦～
爸爸套西裝確實唔算太合身，但係以冇度身、遙距上網買、最重要係咁嘅價錢嚟講，已經物超所值！！
喺主餐廳食嘅晚餐，內容上同平時差別不大，唔同嘅只係大家嘅衣着同埋心態啫～
小噹噹，有冇嘢啱你食呀？
我哋照舊全部share~
今日前菜有南瓜湯~
仲有多一款好香濃嘅法式洋葱湯~
炸魷魚~我估我哋應該其中一款湯叫咗兩碗，如果唔係，就唔係好啱數喇，我哋通常叫4前菜3主菜2甜品嘛~
白汁海鮮意大利麵
呢個應該係魚~
已經唔記得咗呢個係炸咩了~
甜品嘛，有焦糖布甸~
仲有cream puff~
其他客人嘛，有人有回應dress code呼籲，有着隆重少少嘅晚裝，亦都有人冇理，只係着基本配備～咩叫基本配備？主餐廳平時都有衣着要求，唔可以着泳衣、背心、短褲、踢拖入去食嘢囉，起碼要斯斯文文～
食完晚餐，先係餐廳門口影幾張先~
呢張係曉定詩嘅作品呢？
唔該晒~呢張應該係其他客人幫手影了~
跟住我哋再去船嘅唔同地方影下相，話晒為咗呢幾套衫同埋鞋，我哋額外多咗一袋行李，啲鞋拎咁重，都係着一日咋，梗係要影多幾張啦～
當然需要郵輪嘅華麗背景啦~
皇家大道
個海永遠都係最好嘅背景~
曉，放鬆啲啦~
daddy and girl~
daddy and girl no. 2
到我啦~
心心心~
上次去福建時個攝影師教咗詩點樣擺可愛pose~
仲有呢個pose﹗我擺好似怪怪地>v<
呢個係佢哋嗰排睇一套卡通片<艾蓮娜公主>嘅經典場面喎~
要影「後」先睇到我條裙嘅亮點~
呢個時間冇人坐沙灘椅lu~
媽媽個bb~
係bor，我嗰陣未換新電話，難怪爸爸啲相靚過我影嗰啲咁多啦~
本來應該係扮畫入面嘅女人，但係，曉，睇嚟你眼瞓得好緊要喎~
影到七七八八，打算返房沖涼休息，房間外面已經攝咗張關於雅典嘅資料，我哋聽日就要到希臘啦！
希臘見~
前往其他郵輪旅遊blog