清理完詩嘅嘔吐物之後嘅下半晚，總算無風無浪地平靜渡過，迎來一個美好嘅早晨～
太陽出來了~
一個早起寶寶
另外爛瞓啲嗰個都醒咗啦~
冇得任意瞓到自然醒呀，我哋個glamping住宿package包括埋出海觀賞海豚，一日三個開船時間之中，我揀咗最早嗰一班船，之後可以多啲時間做其他嘢丫嘛～要預足夠嘅時間食早餐、執行李，因為先一晚已經約好咗職員車我哋出返去碼頭～
早餐都係先一晚提早送咗嚟，早餐同樣係好豐富嘅大製作~
有兩種麵包、沙律、水果，仲有雪凍咗夾麵包用嘅豬肉餡、椰菜絲、牛油果~
飲品方面，又有果汁，又有咖啡～
老實講，冬天早餐都唔係好想食全部嘢都凍冰冰，小木屋有微波爐，不過啲碟好似唔放得入去微波爐咁，爸爸決定略略抹乾淨個微波爐，直接用麵包墊住啲食物嚟叮，少少狼狽啦~
都OK嘅，只係份量太多，冇可能食得晒～咖啡同果汁就帶走啦，個橙？等我鑒定下先～
嗰幾個橙好細個，摸落去質地有啲硬，size同手感都令我聯想起屯門醫院啲橙，屯門醫院啲橙出名酸、多渣、好難搣皮，我搣咗一個熊本橙嚟食，umum⋯我哋可以唔使拎走啦，食完手上呢個就算啦～(^_^*)
出返去碼頭嗰邊，我哋將行李寄存喺sea cruise個office度，未夠鐘出海睇海豚，我哋逛一逛嗰幾間舖頭仔，睇吓買唔買到帽、頸巾俾詩～
先一日件坐船咁大風，詩半夜又嘔過，都有少少猶豫，要唔要俾佢出海睇海豚，一場嚟到，唔去好可惜嘅～舖頭度有冷帽賣喎，仲好cute添，戴起嚟好似《殼斗村的幼兒園》入面啲堅果咁嘅樣呀，平時詩好抗拒個身、個頭又任何束縛，所以佢平時唔扎辮唔夾髮夾，全靠今次頂帽似殼斗村，佢先肯戴耐少少～
都係詩戴得最可愛~
買帽間鋪頭對面係我哋食午餐嗰間餐廳，同海豚握握手先~
行番出去碼頭，點解我哋兩個笑得咁古惑嘅？
觀賞海豚tour需時2小時，其實前往海豚棲息地需要45分鐘船程，所以頭尾各45分鐘，留喺溫暖嘅船艙就ok～
詩太咳，爸爸個背囊入面居然有個後備口罩，俾詩係局促嘅船艙入面頂住檔先啦，係就係唔太合身啦~
坐船要著救生衣，出去戶外又好凍，就形成呢個奇怪裝束，救生衣外搭羽絨~
到咗海豚出沒嘅地方，領隊姐姐就通知大家可以出去夾板睇海豚啦，真係估唔到啲海豚多得咁緊要！！幾日之中出海睇海豚，一次係中學時由屯門出發去睇中華白海豚，記得嗰陣都係遠遠觀看佢哋嘅身影，佢哋游水時有個背脊露咗出嚟，我哋已經興奮得不得了～去花蓮嗰次海豚都多㗎，不過我哋坐隻船大，佢哋冇游得近得咁交關，今次真係正正游係我哋隻船旁邊﹗﹗
見到啦﹗見到啦﹗
興奮中~
來個開心自拍~有架有架，後方中央位置有兩條小小嘅海豚嘅邊邊嘅角仔~
除咗我哋架船仲有其他公司嘅船，啲海豚好似唔驚咁，照游係啲船嘅中間~
佢哋有時會跳得好高，簡直就好似表演俾人睇咁~
真係好近~
我好後悔冇帶到上次去歐洲前專登買嗰條電話繩嚟，上次係防盜用途，如果今次帶咗嚟，就可以進取啲伸部電話出去海上面影海豚啦，我部電話新買冇幾多日，連咭數都未找，我唔可以跌咗部電話落海架~
入返去船艙裡面都可以繼續睇海豚嘅，唔駛吹風，雖然隔咗層玻璃，但同佢哋距離更近，而且我可以放膽影相了﹗
係下面睇都好清楚架~
隻船停留俾我哋睇海豚嘅時間都幾長，總之可以睇到夠皮先回程~
嚟嘅時候搭45分鐘船佢哋都已經覺悶，睇完海豚「完成任務」冇乜嘢要期待就仲悶，打開零食袋睇下有咩食啦，有一包M&M，立體三角形包裝嗰種，一袋有5粒，一人一粒之後剩低一粒…咁就整個「最後一粒M&M爭霸戰」啦﹗為咗要消磨更多時間，決定以回合際進行比賽，我提議，一人諗一個game，可以對自己有利嘅，再以名次去計算分數，總分最高嘅人就可以得到嗰粒小小的朱古力~詩覺得呢個遊戲太刺激(?!)，所以要求同家姐組隊，但係你哋萬一贏咗就好難分個禮物lu bor，唔怕會引起內鬨？家姐話讓獎品俾佢喎~
第一回合係媽媽遊戲，輪住鬥講水果名字，人人都有食水果，好公平啦啩(就奇~點都係成日去超市街市嘅媽媽有利啲嘅，呵呵~)~如我所料，我先拔頭籌~曉詩隊遊戲係鬥講佢哋學校四年級嘅同學名字，曉當然獲勝啦，我都得第二，繼續保持領先，yeah~爸爸遊戲係鬥講聖經人物名字，果然似爸爸，賽制係，只要係聖經人物，即係冇名都好，只要講得出係邊個場景入面嘅邊一個人都得，例如五餅二魚入面提供食物嘅小朋友，又或者掉石頭去個婦人度嘅人都得，曉詩隊應該仲有貨嘅，係唔夠creative啫~
計算總分，由我獲勝﹗啪啪啪啪~我將我嘅獎品，嗰粒M&M轉贈俾最想食嗰個人，即係詩食咗，皆大歡喜，而且玩完就差不多返到碼頭啦~太完美了﹗
去食個午餐吧~
前往其他日本旅遊blog