見到嗰間半露天、可以望住個海食飯嘅度假風格餐廳，我就好想入去食啦～即使我哋去到嘅時間都算早，但都要排隊lu，未算好餓都可以排下嘅～行一陣旁邊嘅紀念品店，又睇下到未，來來回回三幾次，都算好快有位啦～紀念品店好多嘢都好吸引呀，我哋臨走之前返嚟買啦～
我哋坐室內，但係都有無敵大海景，令人心情好暢快～
開心~
食物係日式嘅西式風格，每樣菜式都標榜使用在地食材，好似係附近粥嘅章魚、附近養嘅雞之類，感覺特別好味～我哋叫咗幾樣嚟share，間餐廳靚靚地，加上令人心動嘅匯率，我哋仲叫咗特飲添～
加入有少少硬嘅本地章魚嘅咖喱飯~
就係因為加入本地雞蛋，先吸引咗我叫嘅pizza~
仲有all time favourite嘅忌廉汁意大利粉~
整體用餐體驗係好好嘅，不過不幸嘅事情總係令人印象深刻，其中一杯桃子熱朱古力面頭有一層好厚嘅cream，我知道杯嘢係熱㗎啦，已經提醒啲小朋友要等多陣，同埋細細啖飲，我自己都係咁做，但係cream隔熱夾得太好，啲朱古力走入個口度時都係燙親我個嘴，慘～成餐飯都用咗個受影響嘅嘴嚟食，有啲可惜啦～
罪魁禍首就係呢pat cream了﹗
因為呢杯好似有少少咖啡，結果我燙傷個嘴之後嗰杯熱朱古力就留俾啲女飲啦:p
爸爸嘅咖啡
好多嘢食~
好朋友Mandy知道我哋去熊本玩，佢已經特別推薦小小海豚訓練員行程，佢話上次佢個仔玩得好開心，嗰度就係海中水族館Sea Donut了～我哋出發前都未確定夠唔夠時間去Sea Donut，所以都冇預約行程～決定咗要搭嘅船同埋A Train班次，先發覺我哋夠時間去海中水族館，甚至，時間夾得啱又有位，甚至可以參加埋啲特別體驗行程添～
沿住美美的大海行過去海中水族館~
靚景~
仔細觀察可能會搵到佢哋﹗
唔知寫乜，天草乜乜乜松島乜乜乜~
第一次聽過天草四郎呢個名，其實係某一集嘅金田一漫畫有講過，入面講去尋寶，我只留意案件謎題嘅部份，歷史嗰部份基本上飛快掃過，只記得話天草四郎係美少年喎~
海中水族館係一個圈圈狀嘅建築物，所以先叫做Sea Donut~
去到售票處，係自動販賣機，除咗入場票之外，其他體驗行程，都可以喺呢度買埋飛，最最最最最搶手嘅海豚訓練員行程，正常嘅，已經full晒，配合我哋時間又有位嘅，可以參加龜龜餵食體驗～
正式水族館嘅外面，有一個兒童遊樂場，我哋要趕住去餵龜，不如出嚟時先玩啦～
我哋見到龜啦，係咪餵海龜？
我哋幾個唔識日文嘅人，比完錢買完飛都唔知餵咩龜～見到佢哋游下游下幾可愛，記得之前去夏威夷，有同過真正嘅天然野生海龜一齊游過水呢～
後來發現人潮嘅方向，先知道我哋係餵陸地上嘅龜，屯門公園爬蟲館入面都有嗰種大龜呀！我哋每組買咗飛嘅家庭，先領個號碼牌，然後按順序，聽從飼養員姐姐嘅指示逐一入去龜龜嘅屋企餵佢食嘢、同佢玩～
今日嘅菜單係連詩詩都鍾意嘅青瓜條，飼養員姐姐用夾仔夾住啲青瓜條俾我哋餵，大概係保護我哋嘅手指啦～估唔到啲龜胃口好好，我哋最遲買飛飛，係第九組，即係最後一組，我哋都擔心，佢哋會唔會食飽咗唔理我哋？點知到最後都好捧場喎，果然每節最多賣幾多張飛係有計算過嘅～
每組分到四條青瓜，我哋本着人人都有機會試嘅原則，詩曉媽爸一人一條~
大家餵完青瓜，就可以摸摸佢哋個殼，親密接觸一下～
好硬~
全部組別餵過晒龜龜之後，飼養員姐姐要將兩隻巨龜送返返屋企，佢哋好似啲唔聽話嘅小朋友咁，一隻去東、一隻去西，抱咗佢哋返入屋，轉頭又自己走返出嚟，見到就覺得佢手忙腳亂，照顧雙胞胎應該就係咁㗎啦～
龜龜餵食體驗結束，我哋去參觀其他嘅展區～
有得觸摸海洋生物，曉通常都最積極，第一個衝過去摸，勁！
有得自助買魚糧呀~
細細杯都好夠玩lu，因為啲魚唔係好食呀，餵魚最高興嘅部份，就係佢哋會追住嚟食，搶着嚟食丫嘛，呢度啲魚唔知係因為太大條反應慢，定係唔肚餓，抑或視力太差？好似見唔到啲魚糧咁～但係掉正喺佢面前，佢又會食喎，但係要掉得咁準確唔容易嘛，估計大多數魚糧都係沉晒落底lu～
餵魚用嘅浮台，記得拖實細個嘅小朋友呀~
落一層入去水族館嘅部份…
有啲係好似一般水族館咁一個個魚缸展示啲海洋生物…
有啲就係真正嘅海中水族館，啲魚真正喺個海入面游，我哋經過玻璃觀察佢哋～
彩虹魚嚟探佢嘅日本朋友~
Hi~
抬頭有魚~
低頭又有魚~
爸爸同花園鰻合照~
彩虹魚又同佢嘅鰻魚朋友合照~
彩虹魚，你都要有份呀？
出去展望台睇睇~
百看不厭嘅海景~
見到啲小朋友參加Mandy姨姨講過嘅海豚訓練員體驗，可能我哋朝早先近距離睇過啲野生海豚啦，又冇話感覺玩唔到好遺憾嘅～
留意表情﹗哈哈~
兩個女話唔要做人類喎~
睇完水族館就去買紀念品啦，嘩，好多扭蛋呀，我哋一人扭一個啦！
仔細分析中…揀邊部機好呢？
今次唔知點解咁好彩，我同詩都扭到自己鍾意嘅小海獅，爸爸扭咗花園鰻，佢話佢其實鍾意斑點嗰種多啲喎，曉就扭咗鏡盒，佢都好滿意～
係呀，要玩番個遊樂場呀，好可愛呀，花園鰻果然人氣高企﹗
影相位﹗竟然仲有道具可以借用~
另外仲買咗啲餅呀、零食呀、酒呀做手信，滿載而歸～
我哋拎返啲行李，就夠鐘搭船出返去三角駅了！
前往其他日本旅遊blog