我哋搭返相同嘅船去三角駅，爸爸上船就要眠一眠了~
今次，落船轉火車嘅時間冇咁趕，嚟嘅時候經過嗰座好似瞭望台嘅building已經覺得好好奇，當時唔夠時間去睇，今次可以上到最頂lu～
瞭望塔上嘅三粒人，認得我哋嘛？
爸爸留低喺地面睇住啲行李，上到去，地面嘅爸爸變得好細粒啦！2025年，蛇年快樂！
登高望遠，呢句說話總冇錯，上到去睇個海都靚啲～
馬上要同呢個海講再見了~
瞭望台地下lobby正中央放咗一部鋼琴，我哋入去參觀時，啱啱有個好犀利嘅人彈緊琴呀～
過返去馬路對面嘅三角駅，呢個係細站，兌換網上訂購嘅車飛要去櫃位，處理好啲火車飛，我哋周圍行影下相～
舵
錨
爸爸臨上火車話要去一去廁所，先造就到呢張相嘅出現，等佢去廁所返嚟時我個心急得不得了，趕唔切點算~
玩咗大半日，啲小朋友上車都瞓覺lu，我唔算好攰，不過覺得車廂入面好熱，呀，可以飲早餐冇飲嘅蔬菜汁呀！都要好好考慮，day 6最後一日行程要去邊，呢三兩日都因為到年末好多地方都休息，除夕應該更多地方唔開門～諗住商場嗰啲實有啦，竟然連位於商場入面嘅熊本熊辦公室都收咗爐lu～
好啦，我哋返到熊本市啦！
我哋第一晚同最後一晚，都住熊本站旁邊，第一晚嘅熊本One Station酒店係舊酒店翻新，整體感覺ok啦，四個人，瞓得鬆動，乾乾淨淨，早餐好食～後來再book最後一晚酒店時，somehow book唔返One Station，用差不多嘅價錢book咗另一間都係熊本站正旁邊嘅The Blossom，我比出去嘅價錢係差不多，不過The Blossom唔包早餐，而且今次係三人房，所以The Blossom係貴啲嘅，但係一切嘅嘢都出色太多啦！
酒店大堂已經光鮮明亮，服務周到，仲有可愛嘅熊本熊歡迎你~
房間裝修時尚雅致，床好舒服～房間嘅浴室我真係唔sure，因為我哋全部人都去大浴場沖涼，個大浴場超正呀，陣間再講～
令我好驚訝嘅係…
房間部電視機，居然可以顯示，樓下洗衣房嘅洗衣機狀態，實在太貼心啦～
唯一要挑剔嘅係，The Blossom就係位於之前去過嗰個大商場Amu Plaza嘅最頂幾層，所以出入酒店要轉lift，商場電梯轉下轉下可以去到酒店lobby，地面亦有lift可以直上lobby，不過返房就要由lobby再轉lift喇～
返房settle down之後，我哋就再出動去食晚餐啦，曉、詩之前都講過，想去食美食廣場，仲要去有得坐地下嗰區～
爸同詩搵位坐低，我同曉就出去搵嘢食～
開餐﹗yeah~有得坐地，照顧細個嘅小朋友真係方便啲呢~
唔識日文果然係有啲問題，我哋叫咗個加蛋嘅冷烏冬，唔知點樣加啲錢就double啲咩，可能我心裏面想食蛋，所以就覺得係兩隻蛋，見師傅煮就心知不妙，係double烏冬呀！好在我哋都食得晒，全靠有邱大胃同埋家人~
章魚燒
好多雞嘅親子丼set
臨尾嗌多個Crepe做甜品就好完美喇～我同曉眼定定望住個店員整個Crepe，先知原來入面包得咁少士多啤梨，一粒切開好多片分布裏面各處，都食嘅時候，我哋都好關心係咪人人都有機會食到士多啤梨～
已經係最後一晚，我哋行多一陣先返房休息，大家竟然想encore書店！上次我已經睇中一本世界風景名勝嘅相片集，今次都係決定帶佢返屋企，去旅行唔知去邊，就揭下本書搵吓靈感啦～
返到酒店仲有好重要嘅節目，就係去大浴場沖涼了﹗估唔到呢間城市入面嘅酒店嘅浸浴體驗，比起真正嘅溫泉旅館更好，因為入面又大又新又靚~按密碼入去女湯就有大大個明亮光鮮嘅更衣室~之前宝來館嘅淋浴位得三個，呢度一格格可能有十幾格，大浴池都大好多倍~最重要係，啲水冇熱得咁交關，連怕熱嘅詩詩都可以享受到浸浴嘅樂趣啦~對於兩個女嚟講都係特別嘅新經驗，因為浸浴時有其他客人﹗﹗曉對上一次去日本嘅裸湯溫泉係16個月大去北海道時，根本就冇印象，今次係第一次有意識同陌生人一齊浸浴，你哋兩個都幾自然丫，下次再一齊去啦~
我帶咗酒店嘅睡衣落去，沖完涼就換埋上身了，出面有一個休息區幾舒服，仲有免費茶水添，已經係瞓覺時間，所以我揀咗個decaf嘅咖啡，小朋友們都俾得佢哋飲一兩啖，佢哋就斟冰水飲~
記得當晚電視好好睇，播緊個音樂頒獎典禮(而家search番啲資料，個節目應該係「第66屆日本唱片大獎」)，記得其中有個獎係頒俾宇多田光，我係咁話我識佢，平時冇留意開J-POP，當然更多歌手樂隊係我哋唔識啦~係呢個節目度頒咗個大獎俾有隊組合叫做Mrs Green Apple，我哋覺得好有趣，明明係男人，點解係Mrs呢？睇完個節目認識咗佢哋，之後嗰日再出街時先發現係便利店都成日見到佢哋，唔知代言咩product呢？
好啦，我哋係呢間咁舒服嘅酒店度過埋最後一個晚上，跟住就嚟到旅程嘅最後一日，之後就返香港啦~
前往其他日本旅遊blog