返到去熊本站，時間都唔係好多，我哋要快快脆脆食埋午餐，拎返啲行李，就要趕過去機場，搭下晝四點幾嘅班機返香港～
嚟咗日本咁多日都未食過壽司，Amu Plaza有一間迴轉壽司店，我哋即管去睇下會唔會咁啱唔使排隊呢？當然冇咁容易啦，間舖頭預計大約等20分鐘，20分鐘都係太耐啦，結果我哋去咗一間即刻有位嘅鐵板燒店食午餐～
同平時一樣，叫三人份share嚟食，間舖頭用手機下單，個英文menu怪怪地，要配合埋日文啲漢字先可以確保唔會嗌咗啲怪嘢（I mean內臟嗰啲），三份餐之中，其中一份叫咗貴啲嘅靚肉，不過送到嚟都唔係好識分，應該係肥啲、油脂重啲嗰份就係貴嗰份啩？
食飽飽，我哋返上酒店攞返啲行李~
原來爸爸幫曉係酒店影咗呢張相~
好在機場巴士站好近，幾步路就到，順利上咗車就安樂晒啦，三父女可以瞓下覺，休息下～
今次張機票只包手提行李額，我額外買咗每程兩件20kg行李額，去程冇乜問題，返嚟買咗嘢，我哋自己都心知會爆quota，既然仲有手提行李額，咁不如多出嚟嘅，就自己帶上飛機啦～本身想搵下有冇個行李磅可以俾我哋秤下啲行李，香港航空自己冇提供俾大家自助用，我哋見到隔離航空公司有個磅，想靜靜雞去秤下，點知俾人哋發現咗，唔准用，oh sorry～
排咗隊去check-in先啦，幫我哋辦手續嘅地勤職員，係一個香港人，佢話今日班機好full，怕overhead compartment會爆棚，叫大家盡量將行李寄艙，結果我哋多咗出嚟嗰幾kg都幫我哋寄埋，太好了～因為怕大家繼續瘋狂購物，佢叫我哋即使買嘢，盡量只買塞得落前面凳底嘅就好，睇嚟情況真係好嚴峻～
寄好行李，我哋入禁區，原來做完security check可以直入international登機，不過，international冇乜商店，domestic嗰邊先有食肆同埋多啲舖頭，時間仲有咁多，我哋梗係去最後血拼，同埋睇吓有咩嘢買上飛機食啦，香港航空個飛機餐有一個包，份量太少啦～
我哋買到最後嘅手信，機上食嘅食物就唔係好睇得啱，結果買咗一盒餅，肚餓時頂住檔啦～原來喺呢邊買完嘢，去international登機要重新做多次安檢，個店員話個栗子糕係凝膠狀，所以我哋帶唔到上飛機，除非重新寄艙，oh，咁唯有揀過其他啦～
去到登機閘口仲有時間，買啲嘢嚟飲~
爸爸飲樽裝咖啡，去日本，咖啡嘅選擇多，容易搵到佢要嘅無糖黑咖啡~
我哋就飲機器即沖嘅凍焦糖咖啡同埋凍朱古力，咁凍嘅天氣都想飲凍嘢，可想而知啲暖氣有幾焗lu～
上飛機…
show下俾爸爸睇我哋手上嘅係咩，詩，你睇安全資料喎，做得好﹗
做下功課（holiday journal要去完旅行先做得嘛，而家啱啱回程，記憶猶新時做就最啱）、畫下遊記、玩下sudoku～
今次個包係咩呢？
係熱辣辣嘅紅豆包~
食埋個細小嘅紅豆包飛機餐，就差唔多返到香港啦～今次嘅旅程就結束lu！yeah，趕得切喺下一個trip出發之前打好呢個blog，嚟緊個星期四，我哋會同埋其他屋企人一行10人去上海玩五日啦，返嚟再寫blog同大家分享～
前往其他日本旅遊blog