農曆新年過後，大姑奶Lily Whatsapp我，問問我哋聖誕假有冇咩計劃，約我哋一齊去旅行～梗係好啦！！yeah～四個小朋友就讀三間唔同嘅學校，放假日期唔同，就埋大人請假安排，敲定17/4至21/4一齊去玩五日四夜～五日嘅話，我只接受到飛行距離3小時或以下，飛得再遠啲，要去耐啲先得～睇過亞洲嘅各個目的地，再配合出發、抵埗、返港時間，仲有價錢、成大棚人有老有嫰一齊去，綜合所有條件之下，我哋決定去上海，其中重點項目為上海迪士尼樂園~
買好機票之後就要plan行程同book酒店啦~除咗我同day之外，大多數人都係第一次去上海，所以今次主攻大路景點+迪士尼，我對上一次去上海已經係2010年嘅上海世博lu~嗰陣當然未有上海迪士尼啦，原來迪士尼距離上海最旺嘅地方勁遠﹗﹗如果去迪士尼嗰日由舊城往返，交通上會搞到好疲累，我決定四晚分開兩個地點住，頭兩晚住南京路附近，後兩晚住迪士尼附近，而迪士尼比較近浦東機場，走嗰日就冇咁遠了~
揀酒店都唔容易，南京路附近地段太貴，酒店美圖手段太高招，好怕被「照騙」，見有啲價格較相宜嘅酒店，睇相好似好靚咁，但睇comment就好似差好多，搞到我冇乜信心，最後揀咗「有背景」—-聽過嘅大集團錦江集團，旗下嘅白玉蘭酒店，白玉蘭全國都好多分店，連鎖酒店應該差極有個譜啩？我哋自己四個就好好醜醜冇乜所謂，但帶埋咁多人一齊去，希望唔好出咩大問題啦~迪士尼附近就容易好多，地平，房價自然平好多，選擇亦多好多，我揀咗君瀾度假酒店，有免費接送去迪士尼、機場、地鐵站，包早餐，酒店自己有遊戲室、兒童遊樂場，房型選擇應有盡有，應該會唔錯，就決定好了~迪士尼周邊其實有好多「睇落唔錯」嘅民宿，都係下次得我哋四個時先再去試下，咁多人唔好冒險了~
我哋搭中午機，約咗大家11:15去到機場check in，再一齊食午餐~最近忙得太犀利，我哋出發嗰朝先正式執行李，好在上次去歐洲大project時怕帶漏嘢專登整咗個執行李清單，之後每次去短旅行時都可以參考，唔怕帶漏嘢了~
今次搭中國東方航空，買機票時已劃好位，今次唔係再搭廉航，行李額大人細路都有每人23kg，只係去五日，仲要係夏天衫，基本上同無限行李額冇分別﹗而且，有(正常)飛機餐食呀﹗不過冇提早網上check in，排隊辧手續係排得耐咗少少，好在預時間夠多~
第一次過香港關連小朋友都可以行自助通道，原來大人連證件都唔駛拎出嚟，勁方便(得有點恐怖)~
復活節長假期，機場有兔仔同大家影相~
姐夫帶我哋入禁區搵食，大家拖男帶女行咗好遠，點解咁耐都未到？點解要去咁遠食？哦，我哋真係去咗一個之前未去過嘅美食廣場，而且真係好多座位唔駛等，最正嘅係，原來離我哋登機嘅閘口好近﹗﹗果然係機場嘅pro~
我哋四個同爺爺嫲嫲共六個人，share咗三個餃子麵、兩個飯，鍾意試新嘢嘅我，叫咗新穎嘅香草味餃子同忌廉南瓜味餃子，叫多一個安全嘅韭菜味餃子俾大家做後盾，飯就叫咗叉燒蛋飯同魚香茄子，樣樣都好味呀~
食飽飽我哋行埋過去閘口預備上機，附近有得玩遊戲呢~
三表姊妹研究點樣玩
原來係扮飛係天空，飽覽香港各區嘅風景，concept都幾好，不過最初開始個game時要先detect你嘅手腳位置，呢個搞咗好耐，同埋唔知點解硬係detect唔到我同詩，要曉幫我哋set up好，我哋兩個先有得玩~
可以飛lu~
好多人，一齊開心出發~
飛機係3+3座位嘅細機，我哋10個人坐三排完整再加爸爸坐單丁~
冇辧法啦，其實我都唔介意單丁，但兩個女要黐住我坐嘛(那管佢哋兩個可以唔理我自己玩)~
今次短途，冇機上娛樂，兩個女download定Disney+嘅<<玩轉極樂園>>係ipad度一齊睇，其實呢套戲唔係第一次睇啦，呢排佢哋興睇電影，可能詩大多少少，冇咁驚電影入面咁intense嘅情感同氣氛，開始識得欣賞~我睇咗少少圖書館借嗰本書，講意大利五漁村附近名不經傳嘅小漁村嘅愛情故事，睇嚟本書未至於太吸引，冇令我繼續追~
飛上去冇幾耐就派飛機餐了，寫住係「snack」，估唔到咁大份，有齊主菜、小食、水果、甜品、飲品﹗﹗咁當然，我哋唔係機場食lunch嘅話，又捱唔到咁耐先食嘢嘅~個米粉我食唔晒，西瓜拼蜜瓜、朱古力cake我就清晒，獨立包裝嘅小蛋糕卷可以帶走，全靠呢個小蛋糕卷，day 2嘅早上佢哋先捱得住~
食飛機餐時詩瞓著咗，佢一早講定如果佢瞓咗就唔駛嗌醒佢食喎~
我哋見唔食咁可惜，我同曉用飲完嘢個紙杯，幫佢留起咗朱古力cake同水果~雖然擺得靚靚但佢起身都冇話特別想食，咁我哋分咗佢啦~
兩個幾鐘真係好快，我哋到咗上海啦~
有咩咁好睇？
上海浦東國際機場好大，又搭列車，又行，行咗好遠好遠路先去到地鐵站﹗
原本諗住call車去酒店，點知發現，駕車需時1小時零幾分鐘，地鐵都只係1小時15分鐘，時間唔差得太多，價錢就差好遠，咁一齊拉大隊搭地鐵啦，起碼唔駛分開三架車，一直會心掛掛其他車嘅人~
上海地鐵冇外地老人優惠，小朋友1.3米以上收全費，所以我哋一行10人，除咗詩詩免費乘車之外，人人都要俾全費~可以用支付寶、微信支付等工具搭車，我哋三張飛兩部電話，所以次次都買單程飛，其實，要轉工具幫兩個人俾都冇話唔得嘅，不過都有少少輪盡，好似索性買飛簡單啲~
由浦東機場去到南京路附近嘅白玉蘭酒店，搭地鐵唔需要轉車，搭2號線就可以直接到了，但有17個站﹗﹗﹗真係搭到嘔~有位座都搭得好鬱悶~
爸爸坐我哋對面，我同兩個想盡方法玩去解悶~
啱啱開車時都仲可以笑笑影張相~
努力消磨時間中~
我哋有用公仔嚟玩大風吹，有玩接龍，後來燒得最多時間嘅係寫字，我起咗幾個字旁，大家輪住寫嗰幾個字旁嘅字，差唔多寫滿張紙，好不容易，終於到啦﹗﹗﹗太好了~下次再有機會，不如唔好再由浦東機場搭地鐵出市區啦~^^”
拎住大大小小嘅行李，拖住疲累不堪嘅老老嫰嫰，覺得落咗地鐵仲行咗好一段路先返到酒店，呢個係錯覺﹗係錯覺﹗之後再行多呢一段路幾次就發覺，酒店位置都好方便丫，行去地鐵站好近~check in後大家就暫時分開一陣子了，因為訂唔同嘅房型，所以分開幾張訂單，安排咗房間係唔同層，同埋睇咗少少渣嘅白玉蘭酒店，居然懶有保安咁搭lift要嘟房咭先去到該樓層，本來想去其中一個房間集合都唔得，大家稍稍安頓好，我哋大堂集合啦~
前往其他中國旅遊blog