係酒店辦好入住手續時已經晚上七點幾，大家各自返上房settle down，就要盡快再出動了，食完個飛機餐，已經好多個鐘冇嘢落肚lu，大家都肚餓啦～我嘅計劃係，由酒店步行出去外灘欣賞夜景，途中見到有咩食就食咩啦，明明同南京路只係差幾個街口，點解北京東路咁靜英英嘅？行咗幾個block都唔多見食肆，好在終於遇到呢間花園餐廳～
隨便入去幫襯嘅花園餐廳，又唔錯bor～我哋10個人，迫少少，坐張大長枱，啱啱坐得落唔使分開～太肚餓了，隨便點着十樣八樣嘢食住先啦～等緊嘢食嚟時，我哋欣賞一下呢個「花園」，餐廳裏面有好多植物，有真有假，真真假假唔容易分辨～
當時太肚餓，已經顧唔到「相機食先」，冇逐樣影每碟餸呀～
打blog呢一刻相隔一個幾月，對於呢一餐嘅印象，記得最好味嘅，係個粟米蒸包，除咗個模具有粟米型嘅一格格之外，食落都有濃濃嘅粟米味，好特別～對於曉嚟講，應該佢對個毛豆印象好深刻，我哋後來畫圖畫遊記，佢畫咗一頁係關於佢食毛豆嘅心得，之後再upload俾大家睇～我記得個鹹飯都好好食，裏面加咗啲淡菜乾，好濃郁～因為人多，叫咗兩款湯，蕃茄肉丸湯啲肉丸好鬆軟，豬潤湯個湯就ok啦，原來我口味都未改變，都係唔太鍾意食豬潤～奶奶不嬲鍾意食豬手，平時少有得食，今次就食到大滿足～
真正有室內花園嘅花園餐廳，同觀塘鋸扒嗰間好唔同~
食飽飽，有返氣力，可以去行多圈先返酒店休息啦～去到外灘，咁熱鬧，就唔會有睡意lu～
當時去到，覺得外灘比以前更光，人更多，陸家嘴對岸嘅高樓大廈更密集，整體感覺更繁華～而家對比返2004同埋2010嘅舊相，真係喎，陸家嘴嗰邊真係多咗好多新building～準備結婚嘅2010年嘅我，話2004年時又後生又瘦，但我而家睇，似乎2025年，已經40歲嘅我身形比嗰陣仲fit，狀態更好，依家有運動丫嘛～
穎妍買咗個小小嘅明珠塔，可以着燈，$10人仔又真係幾抵嘅～見到佢個明珠塔，就諗起當年大學時，啲同學幫襯啲小販買嘅次貨明珠塔，返到宿舍先發現，有啲明珠塔係歪嘅，有啲就有雜質喺嗰啲所謂「水晶」嘅中間，真係得啖笑～
可能遊人真係比之前幾次去時更多，因為今次要實施人流管制，想去江邊，只能夠喺指定位置入同出~
上到去要影一張旁邊冇人嘅相真係難上加難，影埋附近的人，都係記錄今次經驗記一部份嘅～
曉今次好有創意，主動話要影掂着明珠塔頂嘅相～
至於我同詩嘅心心明珠塔，踎到好攰呀，攝影師曉，得未呀？
有一個冇電了~
欣賞完外灘夜景，我哋轉返入去南京路步行街，行住返酒店休息啦～
南京路步行街，又點會俾你淨係行路經過丫？咁多嘢琳琅滿目，咁吸引，自然行住睇、睇住影、影住行、行住買，爭在食飽咗，冇行住食啫～
唔知由幾時開始，大白兔糖呢啲古老嘢，變成上海嘅名物，好多手信店都大張旗鼓，推廣各種口味嘅大白兔糖~
仲有好多靚靚影相位，吸引大家入去舖頭，我哋當然唔少得影咗相，同埋買咗大白兔糖啦～
呢堆兔仔仲識郁嘅添呀，你睇曉個樣古古怪怪咁，佢咪扮緊啲兔仔跳下跳下囉，不過要睇另外錄嗰段video先知佢做緊乜~
超級大白兔﹗
見到上次去福建時幫襯過嗰間青稚hand cream店，幾個女孩子都好興奮話要入去睇~
有啲免費postcard，佢哋都好用心咁寫，曉同詩一個話寫俾公公婆婆，一個話寫俾姑姐，咁當然比足時間佢哋慢慢寫啦～
由經過一間叫做朱古力博物館嘅店，好似好勁咁，有啲朱古力做嘅巨型模型，有朱古力明珠塔喎～
朱古力明珠塔
其實我都係呀，巧克力愛好者﹗不過要黑朱古力丫唔該~
後來先知，原來呢間朱古力博物館周圍都係，我哋去到城隍廟都參觀咗另一間分店～
仲有一間好神秘嘅店，見到煙霧彌漫，忍唔住入去八卦下…
充滿神秘感嘅煙霧同忍忍好襯~原來係一間珠寶店，咁冇嘢啦，我哋出去先～
雖然寫咗postcard，冇寄呀，結果只有手帶返香港咋~
經過咗成日，大人小朋友都攰到筋疲力盡，要返酒店沖涼瞓覺啦～
呢間白玉蘭酒店，睇落渣渣地（曉周圍同人講：「啲櫃檯職員呀，着拖鞋㗎！」），但對於酒店浴室，我睇重最基本嘅佢都做得到，沖涼水壓夠，水溫穩定，去水暢順，水唔會走出去外面，所以沖涼都衝得幾舒服～
我哋間三人房，一張雙人床，一張單人床，詩無論點都要黏住我，我哋兩個肯定瞓雙人床，爸同埋曉兩個都瞄住張單人床，結果佢哋和平解決，一人瞓一晚，咩啫？同我哋瞓咪幾好，幾溫馨丫！
前往其他中國旅遊blog