對於要唔要約埋一齊食早餐，大家都有少少討論，我本來諗住，爺爺同曉超早起身，兩個都唔餓得，記得表姐們通常瞓得比較晏，早餐食唔食都冇乜所謂，本身諗住，不如約個出發時間，大家各自食嘢，鍾意早就早、遲就遲，食得多就多、少就少啦，但長輩們又覺得大家一齊出嚟要盡量一齊行動，結果約定一個時間一齊出去食嘢，之後再出門口~
爺爺方面我唔知，果然，我哋呢邊嘅大人細路都超早起咗身，距離集合時間有成兩三個鐘，梳洗後，我哋真係做咗好多嘢，小朋友帶埋ipad嚟做網上學習，畫咗圖畫遊記，又睇咗圖書，好似仲玩咗牌之類，起身咁耐當然會肚餓啦，俾兩隻嘢食埋day 1飛機餐嗰件包裝蛋糕仔、少少零食，頂住檔先~
終於到咗約定時間啦~
渣渣地嘅酒店，Lobby居然有圖書睇~
樓下成條街都好多嘢食賣，燒餅、包子、腸粉、小籠包等等，不過唔係好多間可以坐入去食，結果大家想食嘅嘢唔同，就分道揚鑣了，我哋買咗葱油餅，見到好多local人買嚟做早餐，我哋又試下先~
叫咗兩份韮菜，其中一份加咗土豆絲，另外一份「青椒」，全部葱油餅新鮮即製，大家堆係櫃檯前面等食，好好生意~
呢款應該係土豆絲韮菜~
見到「青椒」兩隻字，腦海出現嘅係我哋平時食開嘅甜椒，原來此青椒不同彼青椒，其實係青色嘅辣椒呀﹗﹗﹗我同day都食到嘅，但兩個小朋友只能夠食韮菜嗰兩份了，唔緊要呀，三款都好好味~
爺爺嫲嫲同表姐佢哋係呢間鋪頭入面坐低食嘢，見到嫲嫲同我哋打招呼嘛？
食完嘢要搵咖啡﹗上次去泉州周圍買唔到咖啡，最後面幫襯同啲早餐一樣貴嘅Starbucks，上海人口味會唔會國際化啲，有得賣咖啡呢？好在我哋酒店附近有間小小嘅超市冇得賣，雖然冇爸爸首選嘅美式咖啡，總算買到口味似雀巢金罐嗰種奶啡啦~起碼呢兩日唔駛擔心冇咖啡飲了~小朋友就揀咗豆漿之類嘅飲品~
我哋一行十人，大多數人都係第一次嚟上海，所以明珠塔、外灘、豫園、城隍廟呢啲經典行程點都唔少得~我哋day 1去咗外灘，day 2就會主力去埋另外幾個地方~我哋搭地鐵出發~
出站見到城隍廟周邊嘅建築群，好多金鋪，金碧輝煌~
金(色)獅子，吼~
城隍廟周邊街區~沿路好多紀念品店，特別多賣上海女人雪花膏，又係古老當時興之作～
我哋先去豫園參觀，之後再逛街，今次去上海，好多景點都要實名登記，用證件買入場券，雖然可以預先上網買票，但入證件號入到傻，寧願現場交俾職員搞～
豫園入面人多得不得了，我哋一行咁多人，有人影呢邊，有人影嗰邊，加上九曲十三彎嘅亭台樓閣，會走散實在係意料中事～
好在都影到唔少靚相~
爺爺嫲嫲~
假山
可以捉迷藏~
小橋流水~
搵唔搵到爸同曉？
佢哋又係對面影番我哋~
好曬丫~
我話，呢度門嘅形狀，好似先一晚飲嘅蕃茄肉丸湯嗰個煲，佢哋三個就係肉丸啦~哈哈~
等下時又影下相，坐一陣休息一陣，總算逛完個豫園～收入場費都真係好重要，呢度keep得算唔錯，廁所都乾淨~
離開豫園之後，當然係被城隍廟街區嘅各種有趣嘢吸引住啦，都係唔得啦，要分開行先得，如果唔係你又等我我又等你，大家都浪費咗時間，睇唔晒自己相睇嘅嘢~講好約定時間就分頭活動啦~
因為詩太熱+大攰，我哋第一個活動係坐低食凍嘢，買咗個凍燉奶，食係其次，最緊要坐一坐、歎一歎冷氣、回一回氣~
開心行街街~
以前不嬲國內啲景點都好多街頭藝術家幫人畫人像畫嘛，今次見到剪紙人像畫，有鬼佬一家四口坐定定俾街頭藝術家「作畫」~
靈活嘅較剪剪下呢度又剪下嗰度，佢哋嘅樣貌就出咗嚟啦，我估呢啲「肖像畫」最重要都係突出模特兒嘅特徵吧，好似眼鏡、鬍鬚、大鼻子之類，睇落都幾似~
先一晚係南景路咪見到朱古力博物館嘅，原來係連鎖店，城隍廟呢邊都有一間，今日時間多啲，入去仔細逛多陣~
朱古力整成嘅動物~
有冇人記得呢幅畫叫咩名？
最特別嘅係有得用朱古力嚟3D print字，我哋俾咗RMB20左右，整咗個「邱」字，睇住個擠嘴一層一層擠出嚟，似模似樣，都幾得意~出嚟啲朱古力大軟，諗住等佢凝固得硬啲先食，可能天氣太熱，根本冇變硬過，結果umum…都係冇食到就掉咗，算啦，滿足咗我哋好奇心叫做值回票價啦~
另一間有趣嘅店係「中式Pandora」，入面有好多穿珠珠嘅配件，店員介紹生肖珠珠俾曉，粒珠同平時嗰啲差唔多size，但有個窿仔可以望入去，原來內有乾坤，可以睇到生肖影像係裡面~店員見我哋愛不釋手，就介紹可以用呢粒珠嚟配搭其他水晶，串成手鍊，生肖珠每粒三十幾蚊可以接受，但啲水晶就…粗略估算，最平嗰種穿成手鍊都要二百幾，錢係另一件事，但我啲女本身係穿珠珠愛好者嘛，屋企可以配款嘅珠多到不得了，冇必要花咁多錢再剝奪親自設計嘅機會嘛~店員以為我哋嫌貴(其實都有少少嘅)，就推銷用少啲珠嘅吊飾，再退而求其次，推銷用最少珠嘅頸鍊，仲講啲咩「幫小朋友提昇運勢」之類嘅嘢~umum…我哋都係想自己返屋企串囉，結果買咗三粒生肖珠，好滿足~
街上有個賣樂器嘅叔叔吹笛、吹笙去吸引大家，佢吹得好好聲，經過曉三、四年級，係學校學完牧童笛返嚟練習嘅聽眾體驗，知道要唔好俾呢啲美妙樂聲迷惑，好聽嘅係因為個叔叔嘅技術，唔係因為嗰件樂器呀，欣賞下好啦，唔好做傻事呀~
差不多到約定嘅集合時間，我哋一行十人重新合體，去搵食啦~
前往其他中國旅遊blog