係城隍廟一帶遊客太多，我哋一行十人要係peak hour搵位坐低食飯一啲都唔容易，我哋決定去下一個目的地附近搵食~我哋下晝去上海城市規劃館參觀，人民廣場站附近應該好多嘢食吧？
我哋係「大」世界站搭地鐵﹗
咁都玩一餐XD
地鐵落車，肚餓都唔記得咗，俾哈哈鏡吸引住~
人民廣場站有一個出口可以直達城市規劃館，我心諗，咁咪經過唔到餐廳囉？於是我哋揀咗一個，睇落似連接去商場嘅地底出口，睇下沿路有咩好食～呢條地下通道非常神奇，越行越荒蕪，全部舖頭都落晒閘，成個場靜英英，連魚缸都冇魚，最奇怪嘅部份係，啲冷氣超涼喎，照計冇商機嘅地下街，啲冷氣唔使開到咁大丫～
我哋唔知行去邊，好在冷氣幾舒服，大小朋友們都冇乜怨言，我作為大家嘅領隊，行快啲喺前面，睇下有冇咩轉機啦，前面有光呀，我哋可以離開呢個地方啦～講到好似去洞穴探險咁，哈~
終於有少少人類嘅氣息，我哋揀咗一間小滿手工粉入去坐低食嘢~
叫幾款唔同嘅湯粉麵share嚟食，又有各種小食，好豐富呀~我最鍾意個鹹蛋肉餅同埋年糕質地甜甜地嘅炸物小食~蕃茄湯麵就正常好味啦，牛肉嗰款香料味有啲太濃，炸肉排香口脆脆都唔錯~
食飽飽就去城市規劃館參觀啦，即係要行番相同嘅路程，我問大家想唔想試下行地面，沿路可以睇下唔同嘅嘢，結果umum…冷氣獲勝﹗行舊路﹗
城市規劃館雖然免費入場，但要實名登記，所以要交出回鄉證俾職員登記~有免費locker，大家放低啲嘢去逛，輕鬆晒~
超闊落，人又少~
好多大大小小嘅模型~
不過食完嘢都係有啲眼瞓，爺爺嫲嫲都各自搵到個地方休息休息~我就同幾隻嘢呢度睇下嗰度睇下，有好多模型睇，又有各種demonstration，介紹下上海嘅建築特色、街區特色等等~
大家最愛一定係有兩層樓高嘅大型螢幕，每隔一段時間就有短片演出，我哋好似穿過上海嘅大街小巷、上天下海咁遊覽一遍咁，尤其先一晚去過外灘，對黃埔江兩岸都有啲印象，更加有趣，小朋友們仲自己扮游水同扮飛去前進，好投入~我同曉詩細表姐先玩(其實應該係觀賞)一次，之後再召集大家一齊再玩多次~
Encore多一次~
另外一個好搞笑嘅係，城市規劃館有好多影片俾大家觀賞，大家可以戴提供嘅耳機去睇，有啲影片只有音樂，仲要係啲展現城市活力、興致高昂嘅音樂~
曉詩唔係睇人哋啲片囉，而係聞歌起舞，享受音樂，勁搞笑~
仲有咁樣玩…
點解唔見講起爸爸？因為爸爸處於脫啡狀態，當佢上咗頂樓嘅咖啡店補一補啡，精神就回來了~
原來頂樓cafe好舒服呢，不過要忍住呀，唔好食咁多無謂嘢啦，因為晚上要去食自助餐呀~
投入觀鳥中~
臨走發現可以寫參觀感想~
曉、詩、細表姐都好認真寫，仲有一個好認真寫嘅人就係爺爺了，佢哋嘅墨寶都貼咗出嚟啦~
我讀一年級啦，唔再係文盲啦~
距離去下一站嘅明珠塔時間尚早，有人想坐坐休息，小朋友就想大玩特玩，我哋帶住細嗰三個過去城市規劃館旁邊嘅上海人民公園~
開心遊公園~
睇地圖見有「兒童樂園」就去玩下啦，佢哋都好期待去公園嘅遊樂場玩，即係滑梯、鞦韆嗰啲，點知…如其名，兒童樂園係屬於「樂園類」而唔係「遊樂場類」囉~
入面係各種迷你版嘅機動遊戲，旋轉木馬、坐啲嘢轉轉轉、碰碰車、過山車之類，好多選擇，有鑑於逐項收費+唔算平，我俾佢哋傾好揀一樣嚟玩~
好威武咁準備出動﹗
究竟我哋排隊玩乜呢？
結果我哋玩咗過山車呀，呢個真係超瘋狂，唔係個過山車瘋狂，而係三個女孩子自high尖叫超瘋狂~
明明唔係咁驚，叫到好似好恐怖咁，搞到啲途人都停晒落嚟望，達到廣告效果~哈~我陪佢哋坐嘛，落嚟時見到咁多目光注視都覺得好尷尬囉~
後來其他人都過來公園join，我哋去執下樹葉，影下相~
美美的樹葉，和曉~
有啲上海小朋友有樣學樣，又跟住我哋執樹葉、撒樹葉，冇嘢好玩時往往搵到最好玩嘅嘢嚟玩，呢個係曉嘅強項~
樹葉，飛吧﹗
再過多一兩年應該唔肯聽我哋點…
時間差不多，我哋出發去今晚最後一個景點—-上海東方明珠塔喇~
前往其他中國旅遊blog