自從開始跑步，對於地點之間嘅距離，移動所花費嘅時間變成有更加清晰嘅概念，一般嚟講，3km以內，都係步行嘅距離，普通行路速度，1km大概15min左右，我自己一個人開turbo咁行，1km最快11-12min～所以由酒店去預約咗晚餐嘅允久居酒屋距離2.8km，時間許可的話，步行絕對係一個好方法，唔夠時間嘛，喺台灣call Uber都好方便～
嗰排我跟住家姐佢哋一家又玩返Pokémon Go，喺台灣仲玩緊呢個game嘅人，比起香港更多，所以周圍嘅道館都好熱鬧，要打傳說嘅怪都多好多幫手～我哋呢條路程要兩邊app切換，Google Maps睇路，又轉去Pokémon Go做我哋嘅訓練家，好有收穫～
訓練家出動﹗
中途經過高雄中央公園，嘩，咁靚嘅？
原來有聖誕裝飾、臨時小食街，成個公園好熱鬧，一家大細、情侶、成班friend，各種組合嘅人，提早歡度佳節～我哋都湊下熱鬧，影下啲燈飾～
小食我哋就唔幫襯啦，我哋要去食好嘢~
影下相就無妨~
光之隧道
可愛聖誕帽
當然唔少得聖誕樹啦~
呢個聖誕老人雖然冇表情冇聲音，但憑住肢體動作，引得啲細路笑到卡卡聲~
接住落嚟繼續上路，允久居酒屋係一條巷子嘅尾尾，唔係專登book咗枱，都應該唔會撞入去食嘢～
同家姐兩個人出去外面，都會專登搵下有冇咩靚靚餐廳，特別係平時同唔到啲細路去食嗰類～我見馬拉松係星期日，既然星期五晚去到，搵個可以飲下酒嘅地方啦，就決定搵間居酒屋，呢間睇落環境唔錯，啲人嘅comment都幾好，又有得book枱，就試下啦～
先嗌cocktail，味道甜甜易入口，好清爽，略嫌酒味少咗啲~
寫blog嘅呢一刻已經隔咗三個幾月，原來回想起呢一餐，其中印象最深刻嘅，一定係剝皮辣椒雞湯，味道仲係記憶猶新，入口嗰下脷尖感受到溫醇嘅甜味，但後勁嗰股辣味就非常刺激，歷久不散，飲湯還好，咬落隻辣椒，啲辣真係好犀利，好耐未試過飲咁多啖凍啤酒都消除唔到～其他記得幾好味嘅，仲有個包心菜肉卷、有個炸物係乜呢？都係睇下相啦~
贈送嘅前菜：枝豆同醃蘿蔔都好味道
呢間店係開放式廚房，我哋坐吧枱位，可以見到晒廚師係後面煮嘢食嘅過程，所以好清晰知道全部新鮮即製~
刺身相比起其他食物就略嫌一般了，未可以去到瞇瞇眼嘅地步~
烏魚子烤鮮淮山，幾特別，調味偏鹹，適合送酒~
家姐最愛沙拉筍，缺點？太少啦﹗﹗
呢個炸物好好味﹗﹗啲粟米好甜，而且粉漿嘅質感亦同預期嘅唔同，令人食唔停~
就係佢啦，其貌不揚嘅剝皮辣椒雞湯~
啤酒杯有雪過，證明店家重視品質~
炸蝦仔
家姐話要點嘅雞軟骨
好好味嘅高麗菜肉卷，啲菜排列得好緊密，令甜品更加濃縮，配上豬肉嘅油香，yummy~
烤牛肉就相對略普通了~
鰻魚肥厚多肉，可惜食到呢個時候已經飽到上心口啦~
兩個女打電話嚟嘅時候仲食緊嘢，係鋪頭入面傾太耐唔太好，所以傾幾句就收線了，佢哋可能有啲失望吧~
回程我哋決定行半程轉捷運，飽得滯散下步都好，不過再行全程大半個鐘又太夜了~返去沖涼，各自同老公Facetime就休息啦，第二朝我哋出發去嘉義了~
前往其他台灣旅遊blog