第二朝唔使咁早起身，夠時間食酒店早餐就得，揀高雄入住頭等艙飯店，係因為近高雄車站，地點便利，客人評分高，酒店嘅價錢比較平，本身我對酒店早餐期望唔高，估唔到又唔錯喎～選擇多，又企企理理～
我最鍾意去台灣啲酒店早餐有粥同埋湯～
食飽返上去拎返啲行李就check out，搭捷運過去左營站，搭高鐵去嘉義，進入今個trip嘅重點部份啦～
高雄車站雖然又大又靚，但感覺不太有活力呢~
點解我笑得咁尷尬？話說我捷運出站時嘟卡出到閘，點解呢？尋晚明明都好正常架~苦惱咗一輪，原來我用悠遊卡入閘，但順手拎咗張香港八達通出閘囉~好樣衰呀~
到咗高鐵左營站啦~
高雄搭高鐵去嘉義，車程只係半個鐘，唔怕冇位坐，所以亦冇必要一早訂飛，去到車站即買即答就得～
啲車都密，我哋幾乎唔使等，買飛冇耐就可以上車～
月台
預備上車
太快到了，唔需要點樣安排消磨時間，好快就落車～
到﹗
天氣好好~
有得蓋紀念印章
嘉義高鐵站其實距離嘉義市有少少遠，反而距離今次嘅馬拉松地點故宮南院更加近，高鐵站就有免費Shuttle Bus來往博物館，我哋入住嘅棒棒積木飯店同馬拉松大會合作，有馬拉松方案，位置正正喺故宮南院旁邊，所以我哋直接搭免費Shuttle Bus就可以去酒店了～
同一班Shuttle Bus上有兩個日本女仔遊客，Shuttle Bus司機唔單單係揸車，仲係博物館嘅熱情導遊，短短嘅車程之中，佢為大家簡單介紹故宮南院，仲有一啲遊園小貼士，日本女仔唔知佢講嘅嘢仲唔重要，我哋就略略擔任翻譯～
原來故宮南院仲起緊第二座博物館大樓~
園區好大~
落車位置喺園區中間，我哋拖住兩隻喼，第一次由園區中央遊覽至園區外圍～
酒店未夠鐘可以上房，我哋放低行李，辦好手續，晏啲返嚟先再攞鎖匙～今日只有一個essential嘅任務，就係要熟習地形，確保第二朝可以準時去到起點起步～
經過酒店嘅積木店，本來諗住我啲女咁鍾意砌Lego，可以買啲俾佢哋做手信，原來呢度賣嘅因為唔係Lego品牌，所以size同Lego唔compatible ，而且間店都冇人看舖，令人冇乜消費意欲～
我哋又再入返故宮南院園區，遠遠見到搭緊馬拉松大會用嘅帳篷，諗住行過去睇，原來條路彎彎曲曲，唔係想像中咁近，第二朝睇嚟都要預多少少時間～
戶外範圍有好多大型雕塑~
我事先有email問過，有冇可能可以提早一日攞選手包，因為今次參賽，會附送故宮南院入場券，跑完步肯定冇力行博物館，所以即管問下大會可唔可以俾我哋做一日攞到，星期六參觀博物館，星期日先跑馬拉松，佢哋覆OK，叫我哋去到搵工作人員就得～啲工作人員仲喺度忙緊set up，但係對我哋非常熱情，一時三刻未攞到啲海外參加者選手包出嚟，提議我哋去附近蒜頭糖廠食嘢同參觀先，仲叫我哋可以踩單車過去～好喎，本身都冇特別計劃呢個行程，一search見到有懷舊小火車，應該係啲古蹟活化嘅項目，反正有時間，我哋過去行下食下嘢啦～
雖然我哋有悠遊卡，又有電話可以download租單車個app，但係衰在冇台灣手機號碼，唔能夠簡單咁自助租共享單車，雖然有少少可惜，但又有啲鬆一口氣，因為係唔熟悉嘅環境踩單車，我都會覺得驚～唔怕啦，有對腳咪可以行路去囉～睇過小火車發車時間，因為差不多lunch time，我哋決定步行過去，到時搭小火車回程～
步行前往蒜頭糖廠蔗埕文化園區~
經過田野
Google Map標示嘅一間餐廳望落去幾靚，縱使係歐洲式建築設計，但裏面現時只供應火鍋，我哋呢一刻唔想食得太heavy，決定再搵下，睇下有冇其他嘢食～
再周圍逛逛，只有紀念品土產店，有雪糕賣，要食熱食，就只有戶外一個阿婆攤檔，食啦食啦，冇乜其他選擇了~
好多大叔
我哋叫咗湯麵、餃子、藥膳蛋、蔗汁，味道正常啦，開頭有其他客人坐附近，要拘謹啲，後來啲大叔走咗，就食得好輕鬆啦~
類似茶葉蛋嘅藥膳蛋~
支蔗汁係完全結冰，所以要曝曬係太陽底下盡快俾佢融化呀~
舊廠房
個糖廠活化項目，睇嚟唔算太活化，舊日嘅糖廠有一小部份開放比大眾參觀，不過要喺指定時間跟tour入內，大部份範圍係真正嘅廢墟，望入去裏面，就似電影入面有罪案發生嘅場景咁～
簡單逛完，我哋去買飛坐小火車返博物館嗰邊啦~
邊位乘客唔見咗頂帽呀？
小火車站
小火車係以前真正用作運輸嘅交通工具，今日變成觀光用，都好多家庭客呢~
懷舊feel
裡面幾舒服，有冷氣，有電視，播放關於蒜頭糖廠蔗埕文化園區嘅影片~
將舊日糖廠風貌雕刻成畫，裝飾月台~
好啦，我哋返過去賽事中心，睇下攞唔攞到選手包啦~
前往其他台灣旅遊blog