我哋搭小火車返去故宮南院，馬拉松場地嘅佈置又有好大進展，我哋今次成功拎到選手包啦﹗對於比賽最重要嘅號碼布、計時晶片，對於留念最重要嘅紀念風褸齊晒喇﹗我哋首先要用得到嘅係號碼布，因為可以俾我哋換領故宮南院嘅入場券~
成功換領﹗好鍾意台灣啲馬拉松會大大隻字印你嘅中文名上去，更有紀念價值，唔係單單一個號碼~
馬拉松幫博物館宣傳，博物館幫馬拉松宣傳，互惠互利，相得益彰~
馬拉松活動有全馬42k、半馬21k，仲有11k、7k同3k項目，我好肯定跑完42k嘅選手唔會想逛博物館，21k可能都行得郁少少但都唔會想逛，如果唔想浪費張入場券，都係早一日去咗博物館先啦~不過行博物館都會損耗體力腳力，我哋要控制住行得唔好咁chur，乜咁難嘅？
今次trip嘅重點係馬拉松，我嚟故宮南院之前都冇刻意研究有咩必睇項目，總之有乜就睇乜啦~我哋放好隨身物品入locker就可以出動啦~
靚靚嘅投映揭開序幕
好靚嘅瓷器，款式唔會過時，即使唔係文物，用現代科技去大量製作，放係Franc Franc之類嘅家品店去賣都一樣有市場~
應該係曉嗰排學校有講關於蘇軾嘅事跡或詩詞之類，我特別影咗俾佢睇~
點解明朝嘅錦盒款式咁似我爸媽啲舊相簿個套嘅？
原來唔同嘅編織方式可以達到唔同效果，有啲摸落滑啲，有啲質地柔軟啲，有啲厚身實淨啲，適合唔同用途~
繡花QR code
皇宮入面啲靚嘢…
當然唔少得珠寶首飾~我啲女最鍾意「賞玩」，但唔一定要戴係頭上面，好好收藏，間中拎出嚟欣賞，係咪就係真正嘅收藏家？
古代佛教經典
有三幅畫係呢段時間嘅重點展品，要專登排隊入去睇，仲有詳細教你點樣欣賞啲細節添~
而家啲博物館都要與時並進，有好多interactive嘅展品，我哋玩咗幾個，扮著古裝衫、設計古裝髮型、飛入畫中、用電腦寫書法、拓碑、製作messenger嘅sticker等等，即使唔係特別喜好歷史文化嘅人都一樣搵到趣味~
著裝
髮型設計
電子書法
我嘅作品
整sticker
行咗啲展館七七八八之後，發現有個corner播放關於馬來西亞檳城George Town文化嘅影片，我哋睇到津津有味，因為之前有一齊去過旅行(19-1-2016：曉出國之檳城假期&吉隆坡婚禮day 2(part 1)．Hard Rock早餐、George Town姓氏橋)，其實嗰個trip個blog都未完成，唔知有冇機會繼續埋落去~當年係曉出世後第一個trip，湊住bb外出都戰戰兢兢，plan行程交晒俾家姐，去到概70%注意力落咗個女度，當時參觀唔同地方記憶好零碎，今次睇咗呢段紀錄片，就更加了解George Town嘅人們同生活了，中間出現好多我哋去過嘅地方，好似姓氏橋、邱公司、娘惹博物館之類~坐低睇紀錄片亦正好幫我哋慳腳力，我哋應該有睇咗大半個鐘~
檳城George Town紀錄片
雖然黑麻麻，都要自拍留念(打blog用，哈哈)
睇完套片，博物館都差唔多關門添，我要去紀念品店呀~唔知day 3跑完之後仲有冇力同機會買手信~我都買得好滿意，買咗翠玉白菜紀念品俾老公同兩個女，老公有白菜襪，曉有白菜筆，詩有白菜襟章~買咗同系列館藏嘅手巾仔同埋簿俾爹媽~係另外一間店我哋買咗幾款零食，基本嘅手信就辦好啦~
晚餐我哋係酒店附近搵到一間叫做「蘊味」嘅台式餐廳，開頭都話冇位，我哋話坐bar枱都ok，後來又冇話等好耐就可以入座~餐廳只有套餐，我同家姐當然叫咗share嚟食啦~
清爽醃蘿蔔前菜
我嘅牛油果奶昔+焦糖脆面，諗起都好味~
家姐嘅木瓜牛奶
唔記得叫咩排骨，我記得左邊嗰款怪菜幾好味~
係咪因為係故宮南院旁邊，所以有「肉形石」同埋「翠肉白菜」？
終於可以上酒店房了~
影相睇落ok，現場感覺有少少殘舊，而且設備比較基本，唔怕啦，我哋都唔會係間房停留太耐，因為第二朝五點幾就要出門啦~好好嘅係，我瞄到大堂櫃檯後面有一袋袋嘅嘢，貌似馬拉松早餐，睇落都係一早包裝好晒冇熱食，我問可唔可以先領取，又可以bor，咁第二朝就唔駛專登落嚟攞啦~
早餐內容我就day 3嘅blog先介紹啦~
要早啲瞓，聽朝就係初馬大日子了﹗
前往其他台灣旅遊blog