講咗想去雲南有一年以上，睇番之前啲blog應該都有提及，雲南不停出現係我嘅目的地候選名單，有擔心過花太多時間搭車，有擔心過高海拔，有擔心過食物唔啱小朋友食，總之遲遲冇落實啦~今次終於出動啦﹗點解要去雲南？話說我哋好鍾意睇一個Youtuber阿盆姐嘅channel，佢係一個雲南姑娘，會採用各種在地食材，整出好多美食，係佢影片嘅畫面，見到雲南好多靚風景，好多新鮮食材同美食，吸引咗我去現場睇一睇~

小學時代同我爸媽去過雲南一次，當時麗江冇機場、冇高鐵，我哋要飛昆明，然後搭旅遊巴漫長地一站一站咁深入未開發成為著名景點嘅古城，對於嗰個trip嘅印象就係搭好多長途車﹗而家諗番轉頭，嗰時我爸媽都真係好勇，帶住兩個吱吱喳喳、又會不停嗌悶嘅小學生搭咁長途，我諗我細個時應該真係好乖，佢哋先夠膽揀呢條路線~

但我哋今次去嘅雲南完全冇同三十年前去嘅目的地重覆，我哋去咗南邊一啲，接近緬甸、老撾邊境嘅西雙版納同埋景邁山，點解要去？因為阿盆姐介紹過囉﹗西雙版納有傣族風情，景邁山就有普洱~香港暫時冇直飛西雙版納，所以我哋今次去深圳飛~

今次執行李都唔容易，西雙版納景洪一帶下晝最熱去到28度，而景邁上夜晚最凍時會低過10度，即是成個衣櫃要執晒入去咁滯？所以要進可攻退可守嘅執法，厚厚薄薄樣樣都帶啲，到時看著辦啦~

聖誕節出發，本身諗住上晝輕鬆去埋聖堂，下晝先出發~點知飛機起飛時間提早咗，時間緊逼咗，我哋要拎埋行李去聖堂~

帶住大大件行李搭巴士去聖堂~

九點半彌撒結束，本身諗住搭B3X去深圳灣過關，點知條人龍排到去V City，媽咪特別提醒我哋索性搭的士去，唔好排巴士了~我哋去到的士站，司機話深圳灣勁塞，講到好唔建議我哋去咁，我哋聽佢話改去上水，搭鐵路去落馬洲經福田口岸過關~

好不容易過咗關，開始有少少肚餓，但未可以悠閒到坐低食嘢，食住包童星點心麵頂住檔先~

地鐵係多人，過關都多人，但屬於可以接受嘅程度，問題嚟喇，到咗深圳之後人多到收唔到網絡，又call唔到車﹗﹗﹗如果搭深圳地鐵去寶安機場會太慢~我哋決定搭地鐵搭遠啲啲再call車~搭咗一個站去福民，果然即刻call到車，下一個問題嚟喇，原來福民上車，要上高速去機場，結果都係要駛番架車去福田口岸嗰邊逼﹗﹗﹗oh no~睇住時間一分一秒咁過，我哋架車好似幾乎唔郁咁~我甚至上網睇下今日下一班飛西雙版納嘅飛機係幾點，仲有冇位之類，答案係冇﹗有個本來係壞消息嘅好消息，我哋架飛機delay呀﹗﹗﹗yeah~即刻冇咁趕了~而我哋架車經過咗超塞路段之後，暢通番就好快去到機場啦，結果抵達嘅時間係，即使飛機唔delay都趕得切﹗delay咗嘅好處係，我哋可以舒服坐低食個lunch先上機~

係車上其實只有我一個急^^”，佢哋有理冇理大覺瞓~

深圳寶安機場又大又靚，唔駛點排隊就辦好登機手續，檢查好行李，入去搵食﹗到坐低嗌嘢食食物嚟到時已經下晝兩點幾lu~

我哋食咗間淺海小廚潮汕小食堂~

叫咗啲牛腩飯、牛丸河、蠔餅、點心咁嚟食，樣樣味道都唔錯，係油膩少少，食飽飽真好~

食完想飲啲嘢，本來附近有間喜茶，後來行下行下又行遠咗，有瑞幸咖啡，好似因為機件問題暫時只供應熱飲~我哋後來竟然去咗間西班牙餐廳飲嘢﹗

爸爸飲Americano，兩姊妹飲鮮榨橙汁，我？抵受唔住誘惑，叫咗Sangria~佢哋好快享用緊飲品時，有個職員行咗去，原來要去某處拎水果幫我整我杯飲品﹗係時間唔算充裕嘅時間，我原來叫咗杯有啲麻煩嘅飲品﹗﹗

好在整出嚟好靚，味道都好好，但應該慢慢歎嘅Sangria，有少少俾我浪費地大啖大啖飲咗落去囉~

機場見到人形高度嘅機械人，嚇咗詩一跳﹗

終於嚟到候機室啦，我哋上機嗰個閘口冇個大牌俾我哋影「指定動作」，意思意思影一張留念吧~

係機場食飽飽，對於機上嘅乾爭爭面包冇乜興趣，全部打包跟住我哋先~

簡樸飛機餐~

大家只食咗個豆腐乾，又幾好味喎(係咪因為味精幾好味？)，啲樽裝水都係帶晒走~

美麗的雲海

機程唔長，好快就抵達充滿東南亞風情嘅西雙版納機場啦~

機場已經見到展示特產—-普洱茶了~

好似去咗泰國咁~

前往其他中國旅遊blog

Comments

comments