好在喺西雙版納，call車同深圳一樣咁容易，我哋返酒店check-in放低行李先，再出去搵食～
今次旅程主要住兩個地點，頭三晚住西雙版納熱鬧市區嘅酒店，我揀咗呢間菠蘿度假酒店，第一次search到佢之後已經別無他選，佢首先滿足到我嘅基本需求，一間房入面有四個床位，大家可以瞓得舒舒服服，包早餐，朝早唔使周圍撲搵嘢食～決定性因素，就係有daybed嘅大大露台，同埋全部人可以浸晒落去嘅戶外浴池，訂酒店仲送池畔下午茶、每日雪糕、手作DIY，仲話包車、local tour、旅拍有discount添，酒店仲要唔貴，冇辦法唔book佢啦～
上到房，果然冇令我失望，露台仲望到靚靚夜景添～
有歡迎果盤，好開心~不過經常都處於飽嘅狀態，結果好似只係食過一兩粒提子~
反而有時會帶free mini bar啲飲品出去飲~
有兩張雙人床，可以瞓得鬆動~
大家更愛露台啲呢張daybed~
不過唔可以嘆太耐啦，快啲出去食晚飯～話說近年大家返大陸旅行，好鍾意着民族服裝影靚相，我哋上次去福建都影過，雲南好多少數民族，啲衫好特別又靚，所以度度景點都有得影相～我哋住喺旅遊區，更加不停俾人兜生意～我哋一出酒店門口，就有個男人好熱情咁樣介紹佢間舖頭啲package，啲衫又點、影相價錢又點之類，兩個女大概世面見得唔夠多，俾佢嚇親～我哋話要食飯先，閃咗入去間餐廳，一方面真係肚餓要食嘢，另一方面都好想擺脫佢～驚嚇嘅係，我哋食飽飽離開餐廳時，佢居然仲喺度，做馬上承接飯前嘅話題同推銷，勁！
當時太肚餓，都冇乜特別考慮食啲乜，見到大致上OK就入咗去坐低，嗰間舖頭食火鍋，啱晒喇，可以試到雲南嘅菇～同深圳一樣，都係去美團、大眾點評之類嘅app訂餐，價錢會比起舖頭直接嗌更加平～我哋叫咗個有魚、有雞嘅火鍋套餐，原來蔬菜任食，再嗌啲飲品就夠啦～
湯底好特別，有啲不知名嘅香料、蔬果放落去～
拎咗一碟黃色嘅，有啲似雪耳，又有啲似珊瑚嘅東東來，我哋問侍應要點樣食，佢哋話可以豉油生食，唔慣嘅，放落火鍋度煮都得，係菇菌類～唔係怪嘢就得啦！佢質地滑滑，咬落去有少少嚼勁，點豉油生食原來似食魚生，都幾特別～菇都有好多種，不過比起第二晚嘅菇就冇咁勁啦，大家要繼續留意下一日嘅blog～
各種火鍋了
唔知係咪因為全部雞都係做好多運動嘅走地雞呢？食親啲雞都係瘦雞，同我哋平時食慣嘅肥雞唔同，又切得細，好似冇乜肉食咁，肉質都比較硬～
反而今晚嘅highlight，係無限任食蔬菜bar，啲菜放喺凍櫃入面，全部睇落都咁新鮮，有我哋認得嘅油麥菜、娃娃菜嗰啲，另外有一堆不知名嘅本地菜，我好奇地每一款都夾咗少少去試～
雖然每種菜都有名牌，但夾到返去，再煮熟埋，都分唔到邊種打邊種，有啲奇異芳香濃啲，有啲質地粗啲，有啲嫰啲，我發覺人大咗，可能味覺有啲衰退啩，對於呢啲怪味菜嘅接受程度高咗～
好似香港打邊爐咁，調味料都可以任斟，發現咗阿盆姐成日用嘅折耳根，我哋都試下先～
開餐！
飲品方面，除咗肯定正常+夾打邊爐嘅可樂之外，我叫咗一杯酸角汁，係乜東東？總之，我同兩個女平時玩一個手機遊戲《火辣餐廳》入面有呢樣嘢，我見到即刻好想試下啦，酸酸甜甜，其實似酸梅湯，打邊爐都幾啱丫～
食飽飽仲送埋水果拼盤，太滿足了～
餐廳職員幫我哋影，唔係好睇得出隻象添～
食完嘢一出去，又見返嗰個推銷影相plan嘅叔叔，佢一直跟住我哋尾，本來客客氣氣咁樣推話唔使，佢都唔走，最後都係要有少少強硬嘅語氣，佢先唔再跟住～
但說時遲那時快，又有另一間店嘅人走上嚟同我哋推銷～我哋帶住兩個女，分明係target客戶，冇理由做唔成生意丫嘛～
上次去越南，同一條河嘅下游叫湄公河，係雲南嘅呢個部分，就叫瀾滄江～
雖然時間有啲晏，但我都話去星光夜市行下啦，今晚唔去，唔知之後仲安唔安排到時間去～
告莊星光夜市話係全亞洲最大嘅夜市，本身心諗，有冇咁容易全亞洲最大呀，點知行下行下，真係大得好交關，我哋酒店嗰隻菠蘿好顯眼㗎嘛，我哋一邊行，隻菠蘿越嚟越遠，發現唔對路先至回程～
個夜市咁大，當然食嘅、玩嘅都樣樣齊備啦～我哋食飽咗晚飯，對食嘅本來都唔係好大興趣，但見到阿盆姐食過嘅傣族舂涼拌，點都要試下～
萬物皆可舂
叫咗一份青芒果涼拌，甜甜辣辣，好惹味清新～跟住就冇食其他嘢啦～
講幾樣我覺得特別嘅嘢啦，其中有架啤酒車，可以坐上去飲啤酒，同時又係夜市內嘅交通工具，唔使行、吹住涼風、飲住啤酒嚟觀光，都幾爽！不過我哋四個之中，得我會飲，所以唔關我哋事啦～
去潮州時都食過生醃，一來太飽，二來都係高風險食物，唔好隨便試啦～
另外沿路一直有好多地攤live音樂酒吧，同三五知己飲下嘢、傾下計，輕鬆消磨一個晚上都唔錯～
對於小朋友嚟講，比較特別嘅係食蟲嘅舖頭囉，好在佢哋冇想試，亦唔會產生出有人搵我陪佢試嘅問題，太好了～應該都有好多買到紀念品嘅舖頭，可能只係day 1，又有啲攰，大家嘅購物慾望未係好強，所以都係空手而回～
仲有摩天輪同其他機動遊戲！
好多適合影相嘅背景，幫襯租衫影相嘅人真係超級多，不過兩個女唔特別有興致就算數啦～
有諗過想坐船仔，但係地方太大，搵唔到個碼頭啊～太可惜了～
有座類似寺廟嘅建築物，以為係古蹟，上網search先知係近年起嘅新地標，剛剛Deepseek話前身古廟有過千年歷史，現時這座是2009年原址重建的～
回收箱都有幾種語言，西雙版納街上嘅路牌除咗有中英文，仲有類似泰文的文字呢邊傣族人最多，我哋後來去山上民宿嘅老闆都係傣族，大家問佢哋係咪講泰文，佢話佢哋會講方言，但就唔同sa wa dee ka，可能不同地域流傳下來嘅方言會有各種變化吧～
我哋酒店附近嘅高樓越來越遠啦，見到大家開始筋疲力盡，都冇辦法啦，要返酒店休息lu～
byebye，熱鬧嘅湄公河星光夜市～
前往其他中國旅遊blog