情人節就快到，有咗小朋友，慶祝情人節我哋都唔多去嗰啲好有氣氛嘅西餐廳食lu，有時出去食，就食啲靚靚哋嘅中菜，一係就屋企自己煮～今年啱啱情人節係星期六，就突然有個idea，不如返大陸住一晚慶祝啦，餐廳又冇咁逼人～上次經港珠澳大橋去珠海，又唔似得陸路關口去深圳咁多人，過關輕輕鬆鬆，都唔錯～隨便去Trip.com搵下珠海嘅民宿，就比呢間位於淇澳島嘅廬境山居吸引咗～我哋話去珠海，媽咪問我有咩玩，我答「冇特別嘢玩」，只係想悠悠閑閑輕輕鬆鬆咁渡過一個週末～睇落去啲相，廬境山居被樹木環繞，好似好世外桃源咁，喺個島上面，即係可以去望下海啦，問咗老公ok，好快就落實book咗民宿～
Book好民宿，先醒起詩星期六下晝係芭蕾舞班家長日，即是要展現練習嘅成果比家長們睇，估計最近幾個星期都為咗呢件事練習緊啦，梗係唔可以缺席啦～咁唯有遲少少先出發啦～四點幾五點由屯門出發，市中心搭巴士去港珠澳大橋口岸，過關完全唔使排隊，暢通無阻，好快就去到珠海～
港珠澳大橋日落美景
最初諗住去到民宿settle down再出去搵嘢食，時間比較晏，都係喺珠海市區食埋嘢先返民宿～我哋上高德地圖睇吓沿路有咩地方食嘢，發現咗一間Breeze海岸西餐廳，地圖位置上係靠海，個名叫Breeze，即刻有種海邊清爽又浪漫嘅感覺，可能我想像力太豐富啦，去美團訂套餐訂枱，去到珠海就直接搭的士過去啦～
umum⋯原來間餐廳係一間酒店嘅西餐廳，但嗰間酒店係有少少沒落嘅感覺，冇人，裝修有啲舊，day有問要唔要轉去第二度食，算啦都嚟咗咯，試下啦，可能未必唔好呢～
雖然比預訂時間早咗，我哋寧願早啲食，食完可以早啲返民宿～餐廳安排咗張好大嘅四人枱俾我哋，明明靠窗嘅卡位都坐得落丫～當時時間早，餐廳幾乎冇乜其他客人，不過一張張卡位似乎有人預約，有啲仲放咗花束喺度添，睇嚟真係有情侶嚟慶祝情人節～預訂嘅餐份量應該唔太夠，我哋額外單點咗少少食物～
等食物上菜都耐耐地，我哋坐個位可以望返落酒店lobby，嗰度有個電子顯示板，一路loop住播放啲類似公民教育嘅內容，電視精曉居然連呢啲都睇到好專心～
食物一嚟嘅時候嚇一跳，唔怪得之要咁大張枱啦～
原來前菜、主菜、飲品、甜品全部一次過上，擺到成張枱都滿晒，好豐盛！
可能因為只係近近哋去珠海，旅行感覺唔夠強烈，原來冇影其他食物相喎～得兩杯飲品有影～總之記得有沙律、有牛扒、有pizza、有蜜瓜火腿，仲有咩呢？
食物味道其實ok，不過未至於好味道令人印象難忘的程度，情調就冇乜㗎啦，總算坐得舒舒服服，同其他客人有一定距離，座位夠舒適～下次想搵到正餐廳，可能都係要提早做少少調查～
食完嘢時間都晏lu，我哋直接call車返民宿，雖然廬境山居位於嘅淇澳島同食晚飯嘅餐廳同係屬於香洲區，但係地方太大，再坐車入去都要超過半個鐘，架車行行下漸漸離開市區，差不多去到時，司機話定位唔夠準，GPS指示唔到點樣去我哋個民宿嘅門口，我哋唯有落車自己搵啦～
原來附近都有好多間類似嘅民宿，都係單幢建築物、三四層樓左右高～我哋book咗嘅廬境山居無論係庭院、室內、房間都佈置得好雅致，果然冇揀錯～
個入口已經整得好靚～
大廳
我揀咗嘅房型係一張大雙人床+日式榻榻米，夠晒我哋四個人瞓～
大床區
榻榻米區
當爸爸知道民宿喺比較郊區嘅地方，佢就帶定佢最近淘嘅天文望遠鏡嚟，一入到房，就急不及待出去露台set up～
其實都係細細支望遠鏡
睇唔睇到？結果個天文望遠鏡效果一般，可能都係唔夠暗，睇到嘅星星，冇雲南嗰次咁多～
iPhone比起我嘅肉眼睇到更多星星～^^”
兩個女最期待係浸浴！我仲專登買咗個浴鹽帶嚟，裏面仲有隻柴柴公仔㗎，浸咗出嚟，係淨淨呀！（我哋屋企嗰隻白色柴犬公仔個名叫淨淨～）
全部人沖晒涼乾乾淨淨，我哋一齊喺榻榻米嗰邊玩鋤大D，度假心情輕鬆，加上我係今晚鋤大D大贏家，玩得好盡興，大家一邊玩一邊笑到卡卡聲～
我哋最初嘅瞓覺排位，先係我同兩個女瞓榻榻米，爸爸自己瞓大床，之後點？順其自然啦，肯定會不停走動啦～
前往其他中國旅遊blog