Good morning～
美麗的早晨～
我哋按照民宿嗰位阿姨嘅指示，喺樓下出玻璃門搵食早餐嘅餐廳，原來要先離開民宿嗰座建築物，行一小段戶外嘅路，有條神秘嘅樓梯，通落去別有洞天嘅餐廳～
早餐秘道
我哋揀咗戶外坐低，佢問我哋要食粥定係豆漿，不如兩樣都要啦～
粥來了
雖然係農村中式早餐，簡樸內容，但都好豐富喎，白粥可以配榨菜，豆漿可以加糖，仲有烚雞蛋、蒸番薯、粟米、中式包點，原來佢哋平時慣食呢啲做早餐，難怪去到國內大小嘅酒店，自助早餐都有提供啦～
榨菜愛好者—-詩，佢會為咗榨菜而係飛機上叫白粥飛機餐，我煮飯用榨菜時，亦會部係旁邊問我攞榨菜食~
開餐~
民宿阿姨話，陣間可以上返去飲咖啡，不過我哋打算出去行下，附近好似有啲靚靚咖啡店，搵個舒服嘅位置，坐低，嘆杯咖啡就好啦～
返房先執好啲行李，等陣間返來可以迅速退房～順便搵搵要去邊一間cafe～好啦，我哋就去一條直路嘅「公園裏Book Cafe」啦，睇落啲相好似好chill咁，地圖顯示距離民宿2.9km，行大半個鐘應該就到了，行一小段路會去到海邊，沿路風景應該唔錯吧～
出動
條路幾好行，難得有鋪得靚靚，安安全全嘅行人路，又唔會有電瓶車任意鏟上來，行車路都唔繁忙～經過人哋嘅民居，見到一個個家庭菜園，感覺淇澳島呢邊生活比較悠閒舒適～
行行下，居然突然發現租單車嘅店，咦，如果租到架家庭單車都好bor，慳番啲腳力同時間，而且有得踩家庭單車，大家都會好高興吧～原來⋯原來⋯唔係家庭單車，係家庭電瓶車！！！路上冇乜車，我哋應該都ok啩？講好價錢，微信付款就可以開走部車！
爸爸先第一個開車，因為速度比平時單車快，迎面吹來嘅風好強勁，令人誤以為好危險吧，我哋全部人都好緊張，尤其曉，we wa鬼叫～
興奮中
大概過咗幾百米先慢慢冷靜下來～
見到單車徑上面有告示牌，寫住叫遊覽車唔好駛上來，我哋咪駛落去馬路囉，身旁有其他私家車、電單車，好驚驚～後來見其他家庭電瓶車都係駛係單車徑上面，我哋入返來，個心即刻定好多～
冇咁緊張之後，發現兜風其實幾爽，難怪大家咁鍾意揸車兜風～
我哋嘅「愛車」
我哋比起行路應該節省咗一半以上時間，去到公園裡Book Cafe，時間尚早，cafe未開門，我哋四處行下，影下相先啦～
後面就係公園裏Book Cafe了
前面就係海邊長廊
情人節
猛烈嘅陽光令我哋睇落唔太高興咁～哈哈～
發現一個付費單車機，爸爸八卦想試下，原來係吹泡泡機，一踩就有好多泡泡噴出來～
用「腳」來「吹」泡泡～
用力踩！
原來開舖唔係咁準時，即使10點咗一陣，cafe都唔見有人返工，等多一陣先有個哥哥出現，慢條斯理做開店準備，可能平時好少有人會專登等開門飲咖啡吧～
我哋揀咗個戶外位子坐低，露營檯椅全部向海坐，又有少少樹蔭，坐得好舒服～
爸爸叫咗杯橙美式，我叫咗杯桂花latte，兩姊妹幫佢哋叫咗手打檸檬茶～望住海，完美天氣，同老公兩個女悠閒咁享受度假時間，真係好正～
坐到咁上下，小朋友要走動下，佢哋走咗去海邊長廊跑跑跳跳，我哋幫佢哋影啲奇怪相就好高興～
時間差不多，我哋要「揸車」返民宿check out了～
今次由我揸，好好玩wor～
路上經過一個珠江口中華白海豚國家級自然保護區管理局～
落車望望先～
原來有個免費參觀嘅展覽廳，講解一下中華白海豚嘅知識同保護工作，中間有幾個大池，現時冇水、冇海豚，係好事丫，應該係發現受傷海豚先會帶返嚟治療吧～
還咗車我哋要步行剩下嘅一小段路返民宿，發現淇澳島嘅牌坊～
打個卡先～
返到民宿，係大廳碰見相信係老闆嘅男士，客廳有個大鏡架，收藏世界各地嘅磁石貼，嗰位男士俾我嘅感覺就係去過咁多地方、咁多不同體驗嘅人，然後先有佈置呢間民宿嘅品味，不過我哋要走啦，冇機會同佢傾下計～
臨走再享受多一次民宿嘅山景露台～
前往其他中國旅遊blog