中午check out後，我哋打算出番關口附近搵個大商場食lunch+逛逛街，之後就返香港啦，晚上爺爺嫲嫲上嚟我哋屋企打邊爐提早食團年飯~搵到呢個華發商都，我哋當然直接call車過去啦~
商場好大，一落車先係大大個露天停車場~食嘢好似都有好多選擇，爸爸提議食居酒屋，都好丫~
鳥鵬燒鳥居酒屋睇落都唔錯，我哋坐除鞋位，見到有VIP房，下次同埋爸媽家姐佢哋嚟，如果包個房就可以再free啲~
鋪頭佈置得幾靚~
等嘢食時睇電視睇到冇晒儀態…冇眼睇~
食物樣樣都好味，擺盤精緻，睇起嚟賞心悅目，更開胃~去居酒屋本來應該飲下酒，但日光日白，加上陣間再去行街，唔小心飲醉咗就唔好啦~打blog呢一刻再一次發現我唔可以做史官，我嘅胃絕對比起記實更加霸道，點解有幾道菜冇影到相嘅？﹗
煎蛋卷，唔好睇少啲裝飾，連粒蕃茄仔都有醃漬過~
三文魚壽司卷，啲脆脆又唔會太油膩，反而增加口感~
各種串燒，我專登嗌啲特別啲嘅款式~
睇嚟我真係好鍾意炸蝦仔，早幾日打去嘉義嗰篇blog，同家姐去嗰間居酒屋又係叫咗炸蝦仔~
呢個特別﹗烤菠蘿唔算特別，但呢款烤菠蘿佢專登係外皮整咗一片脆脆嘅焦糖，yummy~
more串串，以我哋全share嘅原則，可以試到好多款﹗﹗
menu有就總會order嘅烤魷魚~
呢個炸薯蛋沙律又係推薦之作，炸波波外層係薯仔，中間有隻半熟蛋，敲碎撈埋下面嘅蔬菜嚟食好好味~
食飽飽我哋搵個locker放低啲袋，如果拎住啲重嘢，應該唔會太有興致行街啦~
其實好多鋪頭都係香港都有嘅品牌，H&M、Muji嗰啲~而家屯門冇H&M，其實我都想買下衫俾啲女，但佢哋真係樸素到唔似我，對於買衫唔大興趣^^”算數啦~
反而我自己去Muji就有收穫，買咗件唐裝恤衫，可以過年時著，黃色呢件係幾靚，但其實我更鍾意牛仔布嗰件唐裝外套，感覺著嘅機會更多，不過冇我個碼呢，唔啱身就唔好勉強啦~另外買咗啲果乾，香港好似未見過Muji有得賣~另外見到有間精品店上次去深圳時都見過~
後來去咗我最愛嘅超級市場，買咗兩隻食水果用嘅「蘋果碟」，幾cute~又買咗少少零食、瓜子之類~
老公發現呢個「能量金磚」，食咗係咪會充滿力量呢？
可能因為我哋冇買能量金磚，兩個細路太攰啦，我其實好想繼續行，但佢哋唔得啦~只有臨走經過麵包店買埋第二朝嘅早餐，我哋就搭的士去口岸經港珠澳大橋返香港啦~
過關又係好少人，話說我已經有好多年過關好有問題，事關我個名嘅其中一個字比較少見，過關嘟回鄉證時會出唔到粒字(但個字又印到係張回鄉證上面wor)，跟住間中我就會被關員請入個房仔度等一陣，好多年前第一次第二次俾人叫入房仔時會驚，後來已經習慣晒，冇乜feel，係麻煩到同行嘅人要等我啫~有測試過，要唔要入房會唔會同關員嘅官階有關，我哋專登排有「花」嗰啲隊，而唔排只有「柴」嗰啲隊，好似又唔太關事~今次去珠海見過關人少，我索性試下過E道，wow，仲好，唔會有人類見到我個名打唔出，電腦好清楚知道我係呢張證件嘅主人，就放我過去，以後我行E道就啱晒啦~
過到香港，我哋又好好彩，好快有經過屋企樓下嘅巴士，返到屋企仲可以攤抖下先準備打邊爐~今個trip輕輕鬆鬆都幾好丫~
前往其他中國旅遊blog