聖誕去完雲南，之後一直未特別渴望去旅行，上一個短trip去珠海淇澳島都只係代替情人節晚飯嘅小小渡假啫～大家復活節請3放10買機票去旅行之際，我又冇乜咩plan～放咁多日假都係要去玩下先似樣嘅，開頭有諗過去camp或者露營，康文署camp遲遲未book，結果就full晒啦，政府露營地點怕冇位，私人場地又貴～唔知點解忽然又諗起可以去澳門個室內水上樂園，雖然港珠澳大橋係幾方便，但即日來回都係太頻撲，提早出發，瞓一晚，第二朝就可以精力充沛去玩水啦～
澳門酒店價錢大約係珠海3-4倍，我揀咗拱北口岸正正旁邊嘅L酒店，一來近過關，二來有兩張雙人床嘅房～
星期日下午，兩個女上完游泳班，就直接搭機場巴士去港珠澳大橋口岸過關~
一月去珠海御溫泉，二月去珠海淇澳島，兩次經驗過關都好順利，今次都唔例外，完全唔駛排隊，好快就去到珠海啦～上次係的士站搭的士，今次試下call滴滴，上車位置原來遠少少，而且車太多，大家又心急，即使停車系統已經好efficient，但都有少少混亂，嗰個位置比較焗，大概又冇限制人食煙，總之等咗一陣車，呼吸住廢氣，喉嚨都有少少唔舒服～
L酒店同拱北口岸真的近得不得了！！
對面馬路就係拱北口岸，我哋間房係「優享澳景雙床房」，窗口可以望到過關嘅人由早到晚絡繹不絕～
仲有壯觀嘅的士陣
check in時前台職員請我們check out時即時填Trip.com的評價，現在就送果盤給我們，ok，填評價本來就應該嘅，想不到公司非常認真看待這件事情，可能競爭太激烈了吧，差0.1分已經大大影響生意，所以必須每一單全取10分先得～
上房歇一歇，放低行李～
兩個好鍾意酒店送嘅耳塞，哈~
兩個女洗一洗穿過的泳衣，晾乾，因為第二日要再著呀～
前台打電話上嚟，叫我哋揀早餐，哦，原來係一份份嘅早餐，唔係自助早餐，咁就解得通啦，因為我見Trip.com嗰度顯示，額外早餐都係三十幾蚊，咁平嘅？所以我一早同咗啲女講，叫佢哋唔好咁大期待，個早餐咁平應該唔會好勁，如果係一set set就合理了~我哋落去前台揀，哈，原來係大家樂早餐﹗﹗第一次見住酒店包大家樂早餐，幾好丫，有中有西，仲送到去你門口添~
之後我哋就出發食晚餐～
搭車時我問過DeepSeek晚餐有咩好推介，似乎地道食物都係推薦火鍋～附近經過有間食脆肉鯇火鍋嘅舖頭睇落唔錯，但要等位，攞咗飛先啦，向前行睇下仲有冇更吸引嘅啦～結果都好快有位，就食呢間啦～
脆肉鯇火鍋專門店
游水鯇魚，店家話係由中山漁場直送~
魚湯底、脆肉鯇無骨魚片、鮮魚滑、生蠔、牛肉～
蔬菜方面叫咗雜錦蔬菜籃、鮮淮山、筍、芋頭片～
另外仲叫咗一款闊麵條～
熟食方面，叫咗一個脆肉鯇串燒，同甜椒一齊食好惹味～
冰鎮螺片就一般啦，味道比較淡～
自助調味料bar嗰邊，仲有酸酸嘅醃蘿蔔做前菜，同橙做飯後水果～另外仲有任食脆脆零食，大人細路都好鍾意～
味道方面，只有兩道脆肉鯇特別出色，其他就一般好味啦～同係靚靚嘅火鍋店，我哋忍唔住一直同西雙版納嘅菌公主比較，佢哋話見到人哋第二檯火鍋要加水時係加「水」，我哋不住有啲失望，因為菌公主係加原汁原味嘅菇菇雞湯嘅，後來到我哋示意要加水時，好在啫，原來都係加湯，人哋加水係因為佢哋係粥底～不過有兩件事情，就顯得比不上菌公主了，有個後生仔侍應拎芋頭片來時，不小心整跌咗一片，佢分明見到我見到佢整跌，但佢當冇事就走咗，另外有個侍應拎走碟牛肉嘅吉盤時，倒瀉咗少少水（融化冰+牛肉血水）落我隻波鞋度，我以為佢轉頭會俾啲紙巾我抹，點知走咗就消失了～雖然係菌公主冇發生過相同嘅事，但佢哋追出門口，都要將多一杯西瓜汁嘅錢退俾我哋（要看回之前的blog），就知道佢哋有幾在意客人嘅感受～
漁惑
雖然都食飽飽，但硬係差咗少少啲咩呢？原來係冇食甜嘢~餐廳旁邊有間超市，飲品唔太吸引，後來醒起可以美團甜品~order外賣去酒店，仲會由送餐機械人小白送到嚟房門口添架~
大家輪流去沖涼嘅時候，小白到咗lu~
叫咗雙皮奶，奶味唔算最濃嗰種，不過食完就滿足晒啦~
食完甜品玩多陣牌~除咗平時玩嘅鋤大D，爸爸又教佢哋玩21點，最近曉好迷Netflix韓國遊戲競技節目《魔鬼的計謀》，一陣就好興奮話自己要做荷官，一陣又話贏咗嘅人又有勝利代幣之類～每人一個勝利代幣就要瞓覺啦，第二日有精彩節目丫~
前往其他中國旅遊blog