今個短trip最主要去澳門新濠影滙個水上樂園，水上樂園中午12點先開門，本來可以晏少少出發，唔使咁急～不過我哋個個慣咗早起，所以揀咗早上8:30-9:00送早餐上房～
確實唔需要個鬧鐘，七點左右曉已經起咗身，隨即叫埋我，爸同詩仲瞓緊，就由得佢哋瞓晏啲啦～我同曉，連同插蘇仔、耳塞仔一齊玩鋤大D（即是我哋每人各負責兩副牌），玩咗冇幾多鋪，大家都陸續起身啦～
曉幫我同爸畫嘅掃描，bru bru bru～
早餐到啦！酒店早餐係大家樂早餐！
以上六選一
我哋叫咗一份通粉+麵包，一份粥+炒麵，咪就係正常嘅大家樂外賣味道囉，本來話食完唔夠落去樓下食腸粉，後來食晒兩份餐，食埋水果盆啲香蕉又夠飽，根本就忘記咗腸粉呢回事～
「媽咪，你見唔見到我眼入面有個框呀？」
我哋執好行李就check out出發去澳門啦～果然退房時真係捉住我寫酒店評價～
填好就送禮物，小朋友有積木，大人有艾熱貼，曉問佢可唔可以都要艾熱貼XD
酒店行出門口，馬上就可以鑽入去連接關口嘅地下商場，商場裡面有好多按摩店、美甲店、手機配件店、找換店，感覺好「羅湖」！結婚後呢十幾年好少經羅湖去深圳，呢一刻好懷舊呢～珠海呢邊過關同其他口岸差不多，但平時太少去澳門，原來而家可以自助過關，但要先採集虹膜樣本，我哋全部都未採集，咁今次就過人工通道啦～
去到澳門
好容易就搵到新濠嘅酒店車，記得唔好落錯車呀，我哋去新濠影匯，唔係新濠天地呀！
去一個陌生嘅地方，曉詩都一定會問我坐車坐幾耐，同曉講起澳門嘅地理，我話澳門由澳門半島、氹仔、路環三個部分組成，唔知點解我仲停留係十世之前嘅記憶？！究竟氹仔同路環係幾時完全合體㗎？！問DeepSeek先知，原來2006年時，填海工程已經將兩個島完全連接，變成一個島～跟住我同老公就傾起，究竟邊個時期我哋睇邊一個類型嘅地圖，好難追尋我嘅記憶來自邊一個source了⋯
見到啦！見到啦！大廈裡面嘅摩天輪～
近少少
好似大鄉里，曉入到去酒店係咁「哇！」～^^;係幾靚嘅～
我哋仲帶佢係啲嚹位偷睇心臟地帶——賭場～
我哋隨便逛逛，晏多少少先食午餐再入場水上樂園～
旋轉座位
話說我哋邊行邊傾計時，突然有個女士好親切咁走過來，示意我哋打開手掌，有嘢俾我哋試，我同詩都冇意識地、好順手咁打開手掌俾佢，跟住先發現有一堆嘢係我哋手掌心，原來係死海鹽（？！）⋯
我哋逼住要跟嗰位化妝品店小姐返去專櫃洗走佢，中招了！
不過佢哋都冇太hard sell嘅，加咗pat cream，撈埋啲鹽嚟洗，對手真係又香又滑嘅，不過我平時都唔鍾意花太多時間搞呢啲，我都唔會幫襯啦，我而家係度幫你哋宣傳啦～
時間多多哋，我哋入去Donki行一陣，呢度原來有代煮區，買咗啲生肉、海鮮可以俾職員幫你煮熟，又幾體貼bor～有得賣食物嘅毛公仔，難得見到詩最愛嘅青瓜，我忍唔住要買嚟送俾佢，叫家姐都揀一個，雖然冇邊樣特別令佢一見鍾情，我哋一齊揀咗都幾可愛嘅蓮藕～
青瓜仔&蓮藕仔
本來想去美食廣場，可以食得經濟啲，原來好多店都未開門，結果去咗茶餐廳華人冰室，又幾好味bor～
鹹牛肉煎蛋
澳門豬扒包
咬！
真材實料嘅牛尾湯螺絲粉
好好味嘅滑蛋叉燒飯
得獎奶茶果然香濃又唔澀
發現懷舊電話，其實媽媽細個時屋企個電話都係「撥個輪」㗎～
食飽飽就去水上樂園啦～
前往其他中國旅遊blog