決定好行程後，我去Klook買定水上樂園入場門券，有得揀只入水上樂園或加埋自助餐券，自助餐？梗係想食啦，就咁入場每人$300+，食埋自助晚餐要$900+，突然間個trip貴咗好多，有少少肉赤，明明係輕鬆簡單短trip嘛，諗完一輪決定食啦，發現如果單買餐券已經full咗，一定要跟水上樂園門券買先仲有，好似好矜貴咁，中咗佢嘅銷售策略…anyway，去埋食自助餐都係令人值得期待嘅~
水上樂園12點先開門，我哋係華人冰室食完個早嘅午餐就入場啦，嘟Klook QR code換手帶，可以全日無限進出，不過玩完濕淋淋，我哋都冇又入又出了~
手帶ready
入場
locker放係公共區域，免費使用，用人面辨識嚟開門，我哋入場得早，可以全部4個locker係埋附近，到走嘅時候都幾full，如果幾個人一齊嚟，可能要東一個西一個，個人面辨識系統設置得比較高，我先勉強夠高，所以爸代表埋兩個女開關locker~更衣室乾淨企理，格數多，後來沖身都舒服，水溫容易較，水壓夠，仲有埋沐浴露提供，不愧係澳門嘅酒店~
換好衫gogogo～
四月份暫時都只開室內嘅部份，但都夠晒玩啦~曉bb時21個月大去過新加坡嘅水上樂園(隔咗10年都冇打嘅blog係咪冇希望啦？)，海洋公園嘅水上樂園重新開幕之後去過一次，舊年8月就去過胡志明市嘅Dam Sen Water Park~新加坡嗰次咁細個當然冇記憶啦，bb都唔expect玩到啲咩，海洋公園嗰次雖然已經識游水，但兩個仲係好細膽，只玩到兒童區、漂流河、人造浪池嗰啲，一個刺激少少嘅滑水梯都冇玩過~2024年去郵輪時曉有玩滑水梯，好鍾意，詩當時唔夠高冇得玩好遺憾~2025年去越南個water park時，嗰度又要1.40米以上先當大個可以乜都玩，曉剛剛1.40米左右，當時被判為小朋友，所以又係玩番bb嘢~
今次，兩個都1.20米以上，係新濠影匯嘅水上樂園幾乎乜都玩得啦~
坐水泡嘅滑水梯全部都玩過了，兩款坐圓水泡，兩款坐前後座水泡，仲有一款係似過山車咁，坐係水泡上面有輸送帶運你上去高點再sir落嚟，路上又上又落，比起就咁sir落嚟更有速度~宣傳照入面嗰條彩虹隧道叫做迷失黑洞，我覺得嗰個係咁多個水泡滑水梯之中最好玩，歡樂道高，嘔吐度低~當時爸詩組玩先，出發一陣聽到尖叫聲，隔一陣又一聲，之後又一聲，我同曉研究係咪詩尖叫，定係其他人，如果係詩應該喊咗lu bor，到我哋玩時，我哋都不由自主地尖叫咗三次，睇嚟真係詩，落到去確認，真係詩尖叫﹗但佢果然大個咗，即使驚到尖叫都冇喊，而且覺得好玩呢~
爸曉組挑戰成功！
開心
呢次係我同詩～
我哋玩得最多係漂流河，可以選擇坐水泡或者著救生衣，我哋應該坐咗四次左右，每次一至三個圈不等~
呢條漂流河速度好快，好容易同你嘅同伴失散，尤其係如果要出去，一定要一早夾定，第一個到出口嘅人要幫手捉住啲細粒會飄走嘅人先可以一齊走~我哋有試過就係有人走到有人走唔到，結果要飄多一個圈~其中一次我哋附近有一對母女坐住雙人水泡嚟飄，個小女孩好驚滴落嚟啲水，喊晒咁，爸爸忍唔住救佢哋，即係盡量推佢哋去啲冇水滴落嚟嘅方向，去到出口位置協助佢哋離開，好似就係呢次我哋飄走咗~水泡好多時要排隊，救生衣就唔駛，結果我一次都冇坐過水泡嚟飄，兩個女都話著救生衣嚟飄好玩啲~
避唔開丫！
啲滑水梯全部都要排隊，我又覺得排得唔算太耐，可以接受啦，沿路有貼啲告示叫人唔可以插隊，自己玩自己排，職員都管理得幾好，真係會叫停啲想打尖嘅人，即使理由係「我屋企人係前面」，職員都叫佢哋排番後面~但係有啲人係攞正牌「打尖」，其實唔係打尖，而係俾咗錢upgrade嘅VIP，我哋係橙色手帶，見到戴住紅色手帶嘅人行上前你只能夠讓佢上去，頭先再睇水上樂園個網頁，先知原來要加MOP1800﹗﹗﹗真係嚇到擘大個口，我以為只係俾多double左右嘅費用就得，原來要貴咁多~見到有一對年輕男女就戴住紅色手帶，究竟係富家兄妹定係年輕情侶呢？我哋自己係度話，如果個男仔可以係排隊時風趣幽默、展現魅力，氹到個女仔好開心，應該比起fast pass更容易得到佢歡心，哈哈～因為所有滑水梯都唔准帶電話上去嘛，排隊時大家都放低晒啲電話係下面臨時儲物格，一家大細亦可以係排隊時擁有真正嘅family time，我哋都有排隊時玩接龍～
排隊無聊時影相
唯一一個詩唔夠高玩嘅設施，就係水上攀石牆～
攀石牆有5米高，你爬到幾高可以隨時跳水（更常見係跌落嚟），呢個要1.4米高先可以玩，可能爬啲細細個話自己識游水，但唔係游得好叻又要玩所以唔俾吧，有得1.4米，10歲左右以上比較識分寸，因為個跳水池好深，連大人都腳唔到地，一定要游得好好先玩得，其實我同曉都爬咗少少就跌落嚟，牆有少少向後傾斜，旱地爬都比較難，而且啲石好滑，我幾乎就係露出水面就跌落去啦，都好玩嘅～如果唔怕阻住人我都想玩多幾次～
我哋都有玩少少小朋友滑水梯，又幾好wor，細路設施都俾大人玩，只要遵守規則就好了~
曉嘅滑水梯標準動作
爸爸splash﹗﹗﹗
有個都幾特別，去啲高塔嘅glass floor就試得多(請參閱：18-4-2025：十人大隊上海遊day 2(part 3)·盡興上海東方明珠塔)，原來泳池都有glass floor﹗
我戴咗con，潛唔到落去張開眼望，不過電話可以幫我望﹗
glass floor泳池可以影到新濠影匯嘅icon~
仲有個全人類都要著救生衣入去嘅漂浮池，我唔太鍾意囉，腳完全唔到地，救生衣可能鬆咗少少，有啲箍住條頸咁，停留咗一陣我哋就出咗去了~
冇玩晒全部都有八八九九了吧？
本來以為曉詩嘅體力捱唔到幾耐，點知真係可以玩到預計最遲嘅5點鐘！後來再睇水上樂園個網頁，發現戶外都仲有好多嘢玩，可能遲啲開放埋戶外都要再嚟多次～
自助餐最早6點可以開始食，所以5點開始沖身換衫就差不多～沖身換衫好順利，但儲物櫃外面嘅長櫈有啲少，大家要輪流坐啲著鞋，地面有濕，唔可以放低啲袋係地上面，當然酒店客人可以著拖鞋落嚟同上房先沖涼就唔會好似我哋咁狼狽啦～
自助餐原來都好full，我哋去到時早少少，要外面排隊等候入座，有啲人問今晚自助餐，職員都話已full booking～
有得食自助餐，yeah~
只影咗第一碟
食物選擇都多，全部都夠質素，對我嚟講比較驚喜嘅係中式熱盤都幾吸引，平時香港啲自助餐最吸引我係冷盤沙律同甜品嘛～不過整個自助餐未至於有非常突出嘅表現，俾Cordis縱壞咗，呢度冇酒飲令我有少少失望^^”最瞇瞇眼之作應該係馬卡龍，太耐冇食過，但偏偏我成日（打機時）煮，特別想食～我同啲女有玩個game叫《火辣餐廳》，就係合成材料煮嘢食嗰啲，其中就有馬卡龍，我今次自助餐食咗檸檬味同雲呢拿味，game入面都有得整，好高興～
星匯餐廳
食飽飽就要盡快返香港啦，港珠澳大橋雖然方便，但始終係遠嘛～不過而家比早年前好，酒店shuttle可以直接去到港珠澳大橋口岸了，兩個小朋友係shuttle上瞓咗一覺，金巴上面瞓一覺，連返屋企嗰架巴士上面都可以再瞓一覺，果然能量已經榨乾榨盡啦～
前往其他中國旅遊blog