跑到終點，我最想就係坐低休息一下，比起順利完賽嘅興奮，痛苦掙扎嘅結束更令人喜悅，而且我亦可以無愧於花錢花時間嚟咁遠參賽了！我坨肥豬肉呢？翠玉白菜呢？我好想見下佢哋啊，但對腳郁唔到啊～
跑完有幾件事要做，領取完賽紀念品、加購嘅初馬講座、領取證書、刻名同時間係獎牌上面等等，仲有飯盒等住你食添～我同家姐會合番，當然要吱吱喳喳分享一下跑馬過程嘅體驗啦～我哋搵到個座位係帳篷底下，一邊食飯盒一邊傾計～
我哋個帳篷view，可以一邊食，一邊休息，一邊八卦主舞台做緊啲乜~有皇帝？﹗
賽事包埋嘅午餐盒，仲有得任斟類似酸梅湯嘅嘢飲~
路上曾經見過呢位「皇帝」參賽，仲有啲「妃嬪」、「宮女」、「侍從」陪跑，原來皇帝係今日其中一位挑戰百馬嘅選手，睇佢個號碼布嘅組別，佢年紀仲細過我，就已經100場馬拉松了，真係付出好多心機努力腳力呢~可能佢專登揀呢場限時7小時嘅賽事嚟做百馬吧？可以dress up再輕鬆完成~恭喜晒﹗
我都要恭喜另一位百馬挑戰成功嘅選手蔡詩萍~
因為起步初段佢嘅團隊係我附近，大喊口號，我都曾經湊熱鬧嗌過幾聲「蔡詩萍，加油﹗」，當時佢係男係女，係老係嫰都唔知，原來係一個叔叔~
有血有汗嘅完賽奬牌同埋初馬獎座~
close up
冇家姐陪我一齊參加，我自己肯定唔會參加，所以家姐絕對係我成功跑完馬拉松嘅功臣啊~
我同家姐都唔可以太慢，因為約咗包車司機13:30嚟酒店接我哋，夜晚19:25機，對腳已經報廢，中間呢段時間有咩好做？同上次嚟台灣初半馬時一樣(24-11-2024：台中國際馬拉松快閃之旅day 2(part 3)．日光溫泉會館肌肉鬆一鬆、再訪宮原眼科嘆繽紛雪糕)，我哋下晝去浸溫泉，要鬆一鬆啲肌肉，好好recovery一下~今次第一次試用Tripool預約，可以客製化包車預約，唔需要經過人類，可以即刻quote到價錢，出發前send埋司機同車嘅資料俾你~有少少似call Uber，但你可以選擇中間停留時間，幾個中途站，包車幾多個鐘頭之類嘅細節，好方便~我哋嘅Tripool係相對年輕嘅女司機，好nice，非常好嘅體驗~
我搵咗高雄少少郊區，係山上面嘅花季度假飯店，嗰度有招呼唔留宿嘅客人嘅「日歸溫泉」，正合我哋嘅需要~
上次半馬時去台中嗰間，又有室內裸湯，又有室外著泳衣嘅男女老幼嘅溫泉，今次呢度只有分開男女嘅裸湯，有唔同度嘅池水，有冷熱茶水，非常好~
舒服嘅環境
浸咗個溫泉，個人舒服好多啦~
同Tripool嘅林小姐約好咗pick up時間，跟住佢就載我哋去小港機場lu~簡直係完美呀~
如果等serve飛機餐會太肚餓，我哋係候機室食咗牛肉麵~
上次飛高雄我同老公佢哋都係食呢間呢~
對於家姐嚟講，牛肉麵係去台灣嘅must eat，我反而冇乜所謂，有得食咪食囉~
國泰嘅「筆盒飯」實在太mini，即使食完牛肉麵，我都可以輕鬆解決埋個飛機餐~
星期一小朋友咁啱放假，我冇逼詩一定要瞓住覺先，可以等我門，咁大家都冇咁大壓力，我亦可以即時同佢哋分享我完成大挑戰嘅喜悅~
嘉義故宮南院初馬之旅完滿結束
前往其他台灣旅遊blog