返到酒店，先處理咗洗衫先啦，其實我哋帶夠衫可以著足一星期，不過先一日搞到啲外套勁多泥，而且呢度洗衫又完全自助+免費，唔洗實在太可惜了~
高高興興地方啲衫入去，開機…
oh no no，原來開錯咗乾衣機﹗﹗又停唔到﹗﹗唯有求救~~~職員哥哥話會幫我哋搞掂，搞掂到點嘅程度？﹗我哋講低房號後，只能相信佢哋啦~
晚上買咗飛去睇show+自助餐，下晝正好返酒店歎嗰個「飄浮下午茶」，點樣飄浮？Trip.com嗰度顯示張相係有一籃食物浮係個泳池面，好chill咁，客人可以揀係池畔serve下午茶或者送去房間都得，order嘅方法係用Wechat message你嘅管家，就會安排送上了，唔知邊部份出咗問題，管家get到我哋要送去房，我哋又出咗去露台，完全聽唔到門鐘聲，服務生就以為我哋未返到只係提早order定，就用萬用匙卡開咗門送入嚟，係嚇咗一跳啫，又唔會覺得侵犯咗咩私隱，因為我哋當時只係…
玩緊Dobble﹗呢個card game係，之前同詩嗰班同學同家長開party時玩過，當時玩到啲媽媽們好投入興奮，大家返到屋企就一人買咗一盒繼續玩(起碼有五個家庭屋企有Dobble，因為2026玩具日佢哋有四個同學帶咗去，詩冇帶，哈)，今個trip除咗帶我哋最常玩嘅普通啤牌之外，仲帶埋呢個新嘢去~
雙層下午茶，仲有兩個椰青添~
上層：右上個果仁撻幾好味
下層：右邊嗰兜係freeze dried無花果，幾特別
個下午茶都幾豐富，有甜點有鹹點，中式嘅係整得好啲，西式嘅都係未能食到瞇瞇眼，香港嗰啲再好食啲~
食完嘢，兩姐妹好想點都游一次水~
好醒目嘅史丹福泳帽
個天台泳池係好靚嘅，但真係有啲凍，我同老公唔落水啦，你哋都係游一陣過下癮就好啦~
換好衫我哋call車出發去曼聽公園，我哋嘅VIP門票包括自助晚餐同睇表演，仲可以提早入園參觀~我哋係淘寶買飛，通知我要去一間鋪頭度換實體票，原來係曼聽公園正對面嘅一間民族服裝租借店~
尊貴通道，yeah~
VIP好威水，入場會送一條繡花布帶俾你搭係肩上，周圍行時好似高人一等，但好快就發現，原來VIP人數非常多，哈，完全冇必要太自滿~
園區好大，唔識路，有免費地圖，但如果俾少少錢就可以upload埋自己張相print埋上去變2026 calendar，當然umum…整咗啦~
我哋隨意逛下啲紀念品店，園區入面都有租衫嘅鋪頭，睇嚟大家真係好鍾意著民族衫嚟影相呢~
我哋過去人工湖嗰邊，好嘢，有得餵魚﹗﹗望一陣人哋餵，ok喎，啲魚反應幾好~
我哋都買魚糧啦~
開心
啲魚好熱烈，所以餵得好有勁~
時間差不多就去食自助餐了，有入場洗手儀式，好隆重咁~
呢個歡迎洗手其實爸、曉、詩每人各有一張相，但詩嘅表情最好，所以被入選上blog，XD
發生一段不太愉快嘅小插曲，自助餐廳嘅枱係一排又一排嘅長枱，大家打對面咁坐，以我嘅常識認知，如果四個人一齊嚟，應該兩個兩個坐對面先正常吧？但帶位嗰位小姐叫我哋一字排開咁樣坐，我話想四個人對面咁坐，隨口補咗一句話要睇住小朋友，佢好誇張嘅反應話咁大個都要照顧，雖然最後我哋成功坐到四個對面，但個心唔高興嘅感覺影響咗當時嘅體驗囉~即使我兩個「小朋友」變成40歲，我同老公變成70歲，咁樣要求都唔過份吧？根本影響唔到其他客人入座~
自助餐，yeah~
因為買咗四張成人票(有嘢食+睇show有自己座位)，所以除咗出去任攞嘢食之外，送上嚟嘅餐都係每人一份，曉詩兩個都算犀利，食晒就冇可能啦，但起碼樣樣都有試過～
一人有一份嘅烤雞+配菜
詩最高興係戴住手套嚟食雞，感覺好新奇吧~
甜品
食完嘢就差不多去睇show了，個劇場好大，有劃位，我哋好快搵到我哋嘅VIP座位^^”，有其他家庭嚟到，發現冇座位劃俾小朋友，先驚覺要坐大脾，好在我哋買咗成人x4~
陶醉自己是VIP
預備睇show
歌舞表演都正常地幾好睇啦，表演人材鼎盛，太多少數民族，都分唔到邊種打邊種，聽到有哈尼族又特別留意下，因為day 4我哋會去哈尼族嘅部落度玩~
中間有個位係邀請啲男士上台參與，問邊個男士想帶走啲美女子返屋企喎，好明顯我老公唔係會參加呢類環節嘅人，估唔到又真係好多男士踴躍話要玩，聽到啲對答內容都有啲尷尬…不是太我哋嘅style囉~
室內演出結束後，大家就移師出戶外，有放水燈同埋篝火晚會~
我哋唔信咩放水燈許願甚麼，不過畫面係幾靚嘅~水燈需要「奉獻」，咁人哋製作都要成本嘅，有趣嘅係所有咩電子支付嘅今天，連水燈都係支付寶俾~
每個CNY 3
放水燈
之後出番去近正門嗰邊有篝火晚會～
大家圍住個火唱歌跳舞，邱氏三父女都怕醜，係我最投入，跟住大家圍住圈跳咗一陣~
一場來到梗係要投入啲啦～
不過大家都攰啦，又怕正式散場會人多call唔到車，我哋早少少離場返酒店休息啦~返到酒店，最驚喜嘅係，酒店職員真係幫我搞掂咗啲衫啦﹗﹗洗好、乾好，仲幫我送返房添，實在太貼心啦~
前往其他中國旅遊blog