菠蘿酒店住咗三晚，day 4嘅早上我哋要離開，進入旅程嘅第二部份啦，我哋會上去盛產普洱茶嘅景邁山住兩晚，由西雙版納市區上景邁山單程車程約三小時，而且山上交通唔方便，唔可能隨時call滴滴，內地人去景邁山都只會自己駕車/租車或者包車，來往各住宿同埋各個景點，山上面嘅路又窄又彎，大多數路段都唔會有行人路，窄到甚至連車都要停低讓另一邊通行，所以行路都唔係一個option，既然如此，我哋決定包車三日兩夜，司機載我哋由市區上山、山上面嘅時間同我哋活動、最後再車我哋出埋機場，咁就perfect了~價錢已包括司機三日兩夜嘅食宿，佢會自己搞掂~
因為單程三個鐘時間太長，所以我努力研究途中有咩值得去玩，邊玩邊走，咁就搭車冇搭得咁辛苦啦~搵到車程一個鐘嘅南糯山體驗行程，咁就啱晒了，玩完大半日，再搭餘下嘅兩個鐘去民宿，正好到晚餐時間~
出發有少少阻滯，司機個車尾箱有啲雜物，放唔晒我哋所有行李，佢唯有即刻搵個市區friend，暫時放低佢啲大件嘢，放得落晒我哋啲行李先上山，如果唔係要攬住啲行李搭長途車就好唔舒服了~
離開市區，出現一段又一段田野、小鎮，到車慢慢向上走，就變成山嘅風光啦~
南糯山係茶園體驗，由哈尼族招呼我哋，好似好多內容，行程實質上有邊幾樣嘢我都唔太記得，總之係寫住採茶製茶飲茶嗰啲啦~
去到時其他團體已經到咗了，我哋先去一去洗手間，話說停留係嗰度短短嘅幾個鐘，我哋去咗呢個洗手間超多次，之後就知點解了﹗﹗哈~
原來先有點火儀式，祝願平安~
之後一齊製作年糕(?)，大家同心合力(裝裝樣子)揼嗰塊糕…
之後就可以點糖嚟食啦~
各個小團體分開行動，各自跟自己嘅哈尼族導遊參觀，我哋嘅導遊係一個後生哥哥~佢帶我哋去「著衫」，暫時變身哈尼族人~揹一個小竹籮，就可以跟哥哥上山了~
變身後上山去~
其中最古老嘅茶樹，用鐵架圍住，除咗保護佢之外，仲係方便爬上去採茶~
荼樹就種係山上，而家唔係採茶季節，所以只能眼看手勿動，好沒趣？唔會丫，因為今次其實係山上野孩子體驗﹗﹗哥哥帶住我哋體驗大自然﹗
唔知點解，平時見到蟲會wee wa鬼叫，但上到山就乜都得~
例如可以俾隻蜘蛛爬上你隻手上面，因為哥哥太自然地做了吧~
雖然唔可以採茶，但可以「採花」，原來佢哋細個冇糖果食時，就會摘茶花啜花蜜嚟食，記得睇清楚有冇蟲仔係度先啜呀~又真係甜甜地bor~
除咗食嘅花，仲有賞嘅花~
美麗的野花
對城市人嚟講，去野外走走已經係好relaxing嘅體驗~
佢哋養兩隻自來狗，雖然冇刻意話帶住佢哋上山，佢哋自自然然走係我哋附近，突然汪汪汪…
原來佢哋發現咗山螃蟹，要話俾主人知~哥哥又執起隻蟹俾我哋玩~放咗落個籮一陣都係決定放咗佢，原來放都有技巧，我哋諗住蟹需要水，放咗落個水窪度，唔記得咩原因，哥哥話要放番去流動嘅水佢先生存到，可能係妨礙咗佢哋搵天然水源同食物吧~
之後行下行下又發現長係木頭上面嘅靈芝，wow，乜咁易嘅咩？﹗雲南出名菇，如果季節啱，仲可以摘菇添架，我哋就係俾Youtuber阿盆姐嘅影片吸引，先嚟咗雲南旅行~
山上充滿新奇好玩嘅事物
另一個有趣體驗係開栗子~我哋上山時一人一枝「行山杖」，原來支行山杖除咗用嚟借力之外，仲可以幫手開栗子，用腳踩住半粒帶殼栗子(好似滿佈刺刺嘅海膽)，用支杖嚟篤篤篤、撬撬撬，應該要集合技巧同力量吧~
去除帶刺嘅外殼之後，仲有超硬外皮，打開埋咖啡色嘅外皮，裡面就係米白色、甘香甜美嘅栗子啦(生)，我哋都唔太成功，哥哥開咗一粒，我哋一人試食咗少少，可能因為少，所以特別珍貴，特別好味~
接著就落返去基地~
午餐已經準備好啦，有烤豬腩肉、香腸、魚、茄子、豆腐、翠玉瓜、薄薯片，仲有無限雞湯、雞粥、白飯，食到好飽好飽，呢餐食得好滿足~
下一個環節係品茶，導遊哥哥帶我哋上樓上嘅茶室，俾我哋試咗幾款佢哋出品嘅茶餅~
佢哋品牌叫做「阿卡聖火」，原來按唔同工序，可以分白茶、紅茶、生茶、熟茶等，茶葉嘅原材料都一樣，只係製法唔同~
泡茶
唔同嘅茶要用唔同嘅茶具
難得小朋友都鍾意品茗
邊泡茶邊介紹邊飲茶邊傾計，每一款都飲三杯左右，三四一十二，實在太多茶灌落肚，結果？咪就係水的循環囉，所以大家不停地下一樓地下一樓跑來跑去往返廁所，平時小朋友去到陌生地方，要去廁所一定要我陪，但呢度短短幾個鐘之內已經去到超熟，唔需要我陪都自己去到~呢個「水的循環」之後嘅旅程都仲有發生呀~
哈尼族哥哥原來都唔係一直做住山中野孩子，佢話佢曾經去過廣東做廠，收入好好，但生活太乏味，後來又係城市做個髮型師，之後返咗屋企幫手，料理茶園、招呼客人~
我哋都買咗一個茶餅，返去同大家share吧，價錢係幾貴，不過團費一啲都唔貴，當係幫補一啲佢哋嘅收入啦~
最後嘅製茶餅體驗都只係意思意思啦，簡單介紹下點樣將茶葉塑形成為茶餅，只係一個示範，唔係正式嘅生產工序~
蒸軟茶葉
壓茶餅
南糯山行程結束，我哋繼續上路，今晚要入住景邁山嘅雲海民宿啦~
前往其他中國旅遊blog