上晝玩到好攰，接住落嚟又坐長途車，當然第一樣要做就係眠一眠啦~通常安排行程時，我都盡量安排長途車係午後，方便瞓一瞓、叉一叉電，跟住再繼續行程，咁就最有效率啦~

叉電中

搭咗大約一個鐘左右，大家陸續瞓醒，請司機搵個地方俾我哋去去洗手間，鬆一鬆筋骨~

估唔到油站嘅洗手間不但免費，而且仲好乾淨添﹗非常好~順道去油站嘅便利店睇下有冇咩零食買下，雲南人果然鍾意食辣嘢，好多零食都辣，肉乾、果仁、脆脆嗰啲都辣，只有糖唔辣，所以買咗彩虹糖~

再上車就瞓唔著啦~

大家打陣機，呢個係近排最愛嘅火辣餐廳，要merge啲食材去煮各種佳餚美食~

又玩咗圖畫接龍，你又睇下估唔估到係啲咩詞語？

下一個停車嘅地點又隔咗一個鐘頭左右，原來我哋架車要叉電呀，司機話要大半個鐘左右~

人類充完電，車都要充電~

冇辦法啦，唯有係呢個冇乜特別嘅小鎮上打發時間，小小嘅鎮居然有好多間髮型屋，大家講笑咁講，剪個髮時間啱啱好~

結果，當然唔敢係呢度剪頭髮啦，我哋又去逛鋪頭~

今次買咗脆脆零食同凍飲~

我哋已經好接近景邁山啦，因為已經歡迎緊我哋了~

接住嘅路程就上山去啦，司機突然又停車俾我哋，原來係賞櫻呀﹗﹗今次只諗住想睇雲海，想享受山，估唔到適逢櫻花開，原來都有唔少遊客呢段時間專登嚟睇櫻花呢~

壯麗嘅山景

山中櫻花

相片睇唔到嗰種闊呢~

我哋都好滿意我哋三日兩夜嘅包車司機，因為佢說話唔多，唔會覺得好嘈或者好多事，但講起又會介紹下啲嘢俾我哋聽~另外，見佢自己都享受個過程，見佢都會拎個手機出嚟影相~佢又同我哋配合得好好，早啲message佢就會係適當嘅地方安靜地等我哋，唔會催唔會趕，好貼心~最尾嗰日可以去果園摘水果都靠佢搵到好路數~而其中一樣最重要嘅係，佢唔食煙﹗at least完全冇係我哋面前食過+完全冇味道，所以我哋判斷佢唔食，非常好，旅途可以空氣好清新，又唔會浪費時間(等人食埋支煙先開車之類)~

終於嚟到我哋住兩晚嘅景邁山瀾滄皮皮家的雲海窩窩觀景民宿啦﹗原來民宿老闆等我哋好耐了，我Trip.com留嘅係我嘅香港電話號碼，我又冇微信，所以佢哋聯絡唔到我哋，點解要聯絡我哋？原來間民宿係包晚餐架﹗﹗訂房時完全唔知道呢，簡直突然upgrade咗咁~佢搵唔到我哋，驚我哋趕唔切返去食飯~

我哋去到，先係食下午茶~

烤咗肉、蕃薯，可以上天台享用~我哋係有少少餓，但又唔敢食太多，跟住仲有晚餐呢~

民宿環境好靚，我其實都掙扎咗好耐book好唔book好，因為睇過呢間之後，其他又睇唔上眼，但價錢又真係貴好多，以國內，特別係鄉村地方嚟講，真係頗貴，不過嘛，住完都覺得值得，因為體驗太好了~風景、雲海靚得無話可說，房間設計又有品味，食嘅就永遠都食唔晒，free flow酒水、水果，無限零食~

屋頂好舒服~

張張都想坐下~

望出去個view

我哋房個露台~

晚餐原來係同其他住客圍埋一齊食，飯餸係家常菜式，味道樣樣都唔錯，同席咁多人，我哋都冇乜點影相~

我同老公都ok呢種氣氛，但兩個女就有啲不知所措，因為未試過吧，同一大班陌生人，仲要個個講普通話，一齊食飯，又要social，好在多數住客都係啲二十幾歲三十幾歲嘅年輕人，仲要係鍾意solo / 情侶 / 三兩知己去旅行嗰種，佢哋對小朋友唔會特別有興趣，所以都冇乜理曉同詩，正好佢哋可以安靜食飯~

食到咁上下，原來老闆會拎支結他出嚟，同另外一位一齊唱歌，佢哋唱啲自己創作嘅歌，唱啲傣族嘅民歌，又應大家點唱，唱下啲流行曲，一邊飲酒一邊唱歌，係好有氣氛嘅~佢哋好興飲酒要嗌飲酒令，一個帶，其他人要回應嗰啲，炒熱氣氛~曉同詩一來攰，二來唔太習慣呢種場合，如果我哋太早返房又唔夠俾面，所以同佢哋講留多一陣，聽多幾首歌先啦，佢哋就密密剝瓜子，又搵到自己嘅樂趣，關心佢哋兩個小妹嘅，就只有老闆娘，不停叫佢哋食嘢，哈哈~我同老公取得共識，我哋要離席得得體，俾足面子，最好嘅就係唱返一首先走，所以老公借咗支結他嚟彈，然後我哋一齊唱，果然大家好開心~第一晚好似唱咗<<紀念日>>，第二晚又唱咗另一首~

返房就自由好多啦~幾攰都好，都好想浸浴﹗﹗

仲可以睇住電視嚟浸，睇咗Peppa Pig，哈哈~

沖完涼舒服晒~

之後講起呢間民宿，我哋總會提起佢個聲控管家「小度小度」，佢聽覺好敏銳，你認真叫佢「小度小度」佢會好快回應，而你私底下談論佢「小度小度」，佢又會應你，所以…umum…都有啲煩，所以我都係唔太鍾意咁方便嘅智能家居~

我哋間房有一張大床，一張梳化床，有足夠嘅床位，可以瞓得舒舒服服~

唔係上咗床瞓覺就結束今日嘅行程，因為半夜醒咗，發現啲星星真係多得好犀利﹗﹗day同我出咗去露台睇星，詩都醒咗但驚驚唔肯著外套出去，曉就瞓到豬豬~

竟然唔識睇星嘅人都清晰睇到北斗七星，實在太厲害了~

前往其他中國旅遊blog

Comments

comments