郵輪公司提供嘅day tour有好多選擇，一場嚟到咁遠，我盡量揀啲行程豐富啲、時間長啲、多啲唔同體驗嘅tour～早喺book好個郵輪之後，郵輪公司就每個星期都send email俾你，promote各種船上收費項目嘅優惠，包括上岸tour、飲品plan、上網plan、船上收費活動例如指定時間滑浪等等，然後話呢個promotion最後幾多日，我開頭都以為「最後幾天」嗰啲係假嘅，後來留意住先發現越嚟越臨近登船，discount真係會越來越少，例如開頭係20% off，唔知幾時就會變成得返10% off，最嚴重嘅問題係，原來啲上岸day tour係真係會full㗎，我就係某一天發現，之前有啲興趣嘅一個tour滿咗額，先驚覺唔可以太悠閒，睇中咗就要book啦，如果唔係啲選擇會越來越少～
我結果book咗11:30出發嘅「Best of Adriatic」7小時tour～每一日嘅tour都係先係劇院集合，點名、攞飛、攞團號貼紙，然後就同團友按指示坐埋一齊，等叫團號，就成團一齊動身，一齊上岸搭旅遊巴～因為意大利、克羅地亞同希臘都係歐盟國家，所以唔需要做出入境手續，上岸你直情唔帶passport都得，唯獨一定要帶「船上面嘅身分證」sea pass，玩完一日登船都係認住佢啦，一嘟就可以對下個樣，睇下係咪本人～因為唔需要出入境，所以上落船好迅速，過往搭郵輪，每次上岸要辦出入境手續都幾花時間，但正正因為冇出入境，即使去咗三個國家，本passport都只有意大利嗰個印章囉～
上咗岸，一大堆旅遊巴已經等緊大家，記得唔好上錯車呀，我哋個導遊係一位優雅嘅花裙子女士，啲英文都好好聽，佢嘅講解聽到幾多就幾多啦，反正之後都會唔記得⋯^^”
古城牆
有人秒睡，有人成日上車都話瞓唔著，到差唔多落車先瞓著，然後叫醒落車就喊…
第一程車只係搭小小的一段路，好快就抵達Dubrovnik古城~
我哋要瞄住嗰支4號旗仔，人太多，千祈唔好跟甩，一定要聽到集合時間同地點先可以確保唔會上唔番隻船～
好曬呀
我哋隻郵輪，同埋其他郵輪，夾埋幾十個旅行團，係一個小小嘅古城入面穿來插去，大家嘅行程，有重疊有分開，除咗認住自己個導遊，認多幾個同團嘅團友，總冇錯㗎啦～
福福逛古城
導遊除咗自己戴咗太陽帽之外，每逢要停低講解，或者要等埋後面嘅團友時，佢總會搵個陰頂俾大家企得舒服啲~
呢個水泉係古蹟嚟架，叫做Onofriou’s Fountain，係一個15世紀建成嘅泉，當時嘅人引12公里以外嘅水源嚟到城入面，都係一件大工程嚟架，今日嘅遊客們都仲飲緊呢啲水呢~
導遊帶我哋行噴泉、教堂、修道院，行嘅速度好快，又怕會跟甩，所以都唔太敢停低影相~之後大概有一個鐘頭嘅自由時間俾我哋~
見唔見到我哋個導遊呢？
人人人人人~
大教堂
聖殿內
導遊帶我哋入去大教堂嘅「treasury」，即係咩呢？即刻上網查下，原來係類似寶物庫嘅地方，入面唔准影相，弊啦，唔記得睇咗啲咩…^^”
祭台
參加幾個shore excursion都會俾耳機你，導遊可以自己戴住個咪細細聲優雅地講解，大家跟得遠遠都聽到說明，又唔會搞到周圍好嘈，都幾好，到聽到「沙沙聲」你就知道自己跟得遠遠地要快啲追番，我聽到幾多都隨緣啦，升四年級嘅曉都試下戴試下聽，聽啲關於古蹟、歷史嘅內容本來就唔容易，仲要有少少口音嘅英文，我估都未必聽到10-20%，詩就直情耳朵自由添~
所以話，我都係鍾意自己去玩多過跟團，跟住鴨仔團都唔係好知睇咗啲咩~哈~速度太快了~
我記得，呢度係其中一個地標—-Dominican Monastery修道院，入面好似博物館咁，有好多文物、聖物睇~
修院入面嘅庭園
其中有好華麗、做工精緻嘅明供聖體用嘅架同埋杯~
我都好想坐係小巷cafe悠閒歎下咖啡呀~
或者揀一間餐廳，叫啲地道嘅菜式~
解散了﹗
可以好好咁停影下相~
自由時間嘅第一件事係，搵廁所﹗我哋又睇路牌又睇地圖，終於搵到個廁所，唔係有人坐係門口收費嗰種，而係要入硬幣(？)，唔夠coins喎，正好有啲口渴，諗住買啲嘢飲順便唱錢啦，飲品店個店員唔肯額外唱多幾個1歐coin俾我，正係度擔心點算好嘅時候，原來去廁所可以碌信用卡，真係估佢唔到~
解決咗生理需要，媽媽要暴走了，得好少時間，我要行街﹗我要shopping﹗我要影相﹗點都要做到啲「成績」先可以返去上車呀﹗
影過紅白格仔先似去過克羅地亞嘛~
帶番自己屋企嘅手信，我哋都鍾意買個磁石貼係雪櫃上面，今個trip都係，Dubrovnik個磁石我哋揀咗一個有古城+郵輪嘅款式，正好代表我哋嘅狀態~
導遊小姐話佢奶奶開咗間聖誕裝飾店，全個Dubrovnik Old Town只此一家，相信呢間就係了﹗
好多花款嘅鴨仔呀~
時間緊逼，影埋呢一兩張我哋差唔多要去集合啦~
去到集合點，導遊已經係度等緊大家了~呢度都有個水泉，我哋其實自己都仲有水，一場嚟到，試下呢度啲水好唔好味啦…唔…一般啦~
集合之後我哋再上車去食午餐啦~肚餓lu~
前往其他郵輪旅遊blog
前往其他克羅地亞旅遊blog