曉有樣嘢好，似爸爸去到邊可以隨時瞓到邊，四、五歲時星期日上晝返完教會，下晝要去學游水，中間唔夠時間返屋企瞓晏覺，我同佢隨便搵間cafe，抱住佢就咁就瞓，半個鐘又好一個鐘又好，叉一叉電就有力去游水～呢個優勢對去旅行好有用，特別係不受自己控制嘅跟團旅遊，上到旅遊巴馬上瞌一瞌，詩呢，通常都要嗌下「瞓唔着啊」一輪，都差唔多去到目的地先瞓着，叫醒佢就喊喇～
好在呢程由Dubrovnik古城去午餐地點嘅一段路，兩個都瞓到吓，恢復返少少體力，先可以高興地繼續之後嘅行程嘛～
book咗個shore excursion其實都唔係太知實質會去咩地方，Dubrovnik比我嘅印象係，周圍光禿禿，只有啡啡乾乾嘅草，樹木都比較少～
但落車食飯嘅地方，係一個流水淙淙，感覺好清涼嘅磨方～見到有啲座位喺戶外，直程可以坐喺河流旁邊，好羨慕呀！
我哋旅行團，就被帶去一個室內嘅大廳，太好了，可以自己一家人坐一枱，唔使同啲唔識嘅人「今天天氣哈哈哈」～
枱面擺咗支白酒，飲唔飲得嘅呢？會唔會額外收費嘅呢？見到人哋開嚟飲，唔理啦，萬一要收就收啦！原來所有day tour餐膳都包括酒水，唔怪得知個tour咁貴啦，可能啲鬼佬食飯冇酒飲會覺得唔似度假掛？餐廳職員見到我哋有兩個小朋友，仲貼心地走過來問佢哋飲咩～
爸爸其實唔係點飲酒嘅，佢飲好少就會變成紅色同埋會瞓覺，佢人生第一次有醉意都係當年同我拍拖時去長洲，我話食海鮮要飲啤酒，跟住好快就迷糊咗，另一次佢醉咗就係去honeymoon時酒店送咗香檳俾我哋，飲完佢就瞓咗成個下晝…之後我都唔會叫佢陪我飲了，反而佢鍾意拎我嗰杯嚟嗒兩啖，多謝你係咁高興嘅時候又陪下我飲啊~只要係有感覺之前停止應該問題唔大嘅~
呢間磨坊餐廳嘅職員都着住克羅地亞嘅傳統服裝，導遊話我哋聽，原來啲女士嘅帽嘅顏色，係可以反映到佢哋嘅婚姻狀態㗎，唔知有冇記錯，白色係未婚，繡咗玫瑰係訂婚，紅色係已婚，黑色係寡婦～咦，serve我哋嗰位係紅色喎！
豆蓉湯
麵包籃–因為好肚餓，所以食咗好多﹗
豬柳配薯仔、雜菜，就係呢一餐，令曉覺得，鬼佬翠玉瓜(zucchini)冇我哋啲中式翠玉瓜咁好食~
甜品
湯、主菜、甜品樣樣都幾好味，兒童冇兒童餐就啱啦，我啲女鍾意試下唔同嘅味道，多過成日都漢堡、炸雞、pizza、炸魚嗰啲所謂兒童嘅favourite，不過份量係太多囉，冇辦法啦，食得幾多得幾多啦～
一支白酒俾我哋兩個大人share，爸爸其實唔係好飲酒，即是爸爸飲幾啖，其他我都可以飲，唔敢飲咁多啦，之後仲有行程，萬一飲醉咗點搞？好在最後都冇事~
食完嘢未到上車時間，周圍行下啦~
水車係呢間餐廳嘅標誌
流水淙淙好清澈
即刻涼快好多~
爸爸幫我影丫~
我又影﹗我又影﹗
原來福福都搵咗爸爸影喎~
小小的散步徑
爸爸發現克羅地亞嘅特別小花
睇下兩位升旗手^^”，幾認真~
克羅地亞嘅山就係咁架啦~
上車我哋就出發去下一個景點—-海邊度假小鎮Cavtat了~
前往其他郵輪旅遊blog
前往其他克羅地亞旅遊blog