老公對於超多人嘅書展唔太感興趣，加上今個星期六、日我都要閉關溫書預備下星期嘅韓文大考，我決定趁少人啲嘅weekday早上帶住曉去佢人生第一個香港書展－－目標係10點入場﹗仲可以一張$10早晨入場票兩人入場添，下年曉夠3歲都要買飛入場啦～始終我大住個肚(雖然係變得精神、身體仍然輕巧嘅13w6d)，我諗住，曉攰到唔肯行路我哋就回程，或者買得多到我自己覺得好重拎唔掂就回程，應該都ok啩？
出城﹗
細細個我已經同爸媽家姐去書展，但自從我哋都大晒之後都冇入去兒童天地了， 閱讀全文
行城門水塘一圈嚟講對於行山嘅人真係簡單得不得了嘅路線，但對於帶住b嚟講都算係適中嘅親子路線，曉曉18m時第一次行山就係去城門水塘(請參閱：10-10-2016：重陽登少少高之曉曉第一次行山＠城門水塘)～今個佛誕假期天氣唔錯，我一早就約好老公一齊去行山，提起呢件事時我爸媽同家姐姐夫逸bb佢哋都可以join呀～就路線問題上有好多考慮，有同事提議行青衣，話啲路都起得好平整，一家大細應該都啱，但爹爹話樓梯多怕膝頭痛，結果我哋都係決定再戰城門水塘﹗
上次因為係重陽假期，個個都想登高，而且重陽係勞工假而佛誕只係公眾假期，果然人真係少好多，上次係荃灣等小巴打晒蛇餅，我哋直接選擇搭的士，今次就等三架車左右就上到了，慳番唔少～good﹗
今次我哋帶兩個b去，雖然7m嘅逸bb要抱全程，但佢細細粒又冇咁重，用hip seat揹住都還好，其實更大風險嘅係差唔多25m嘅曉囉，因為佢唔肯行的話，我同day就要抱住12kg嚟行﹗佢肯行係值得嘉許，但我哋進度又會勁慢，所以我哋講笑話「佢唔行就攰死，佢行就餓死﹗(因為天黑都未落到山﹗﹗)」>v< >v< 為咗唔好餓死，我哋出發前梗係買定乾麵包啦～
出發初段嘅樓梯級憑住鼓勵，曉都行咗上去，但上到去嘅泥地佢就唔肯行了，呢個城市人⋯^^”不過嘛，再觀察多一陣，似乎唔係城市唔城市嘅問題，估唔到佢大過逸逸bb咁多，居然比佢更早瞓咗第一覺囉，梗係啦，媽媽用揹帶抱住行路喎，真係難以抵擋嘅睡眠邀請～
去到呢個必影景點時曉已經瞓咗lu，逸逸bb仲好精神咁擺pose﹗ 閱讀全文
第一次知道Playright呢個機構，應該係某次同day去濕地公園時，見到佢哋擺booth推廣遊戲，不過當時未做爸媽嘅我哋望一陣就走lu～有咗曉曉之後自然會多啲留意周圍有咩啱小朋友玩嘅地方，有次睇到網上報導介紹Playright嘅遊戲室－－Playscope智樂遊戲萬象館，當然要去「朝聖」一下啦～
睇官網嘅資料，似乎好多嘢玩呢﹗
對於屯門人嚟講，專登去大埔玩係一件大事，所以我邀約兩位好朋友帶埋佢哋啲小朋友一齊去， 閱讀全文
既然瞓醒，換好片乾乾淨淨，食咗爆谷開心番，應該可以再作戰了﹗
原本想去睇替代「米奇金獎音樂劇」嘅新show「米奇魔法書房」，點知我哋提早15分鐘去到都滿座了﹗於是爸爸提議再去玩多一次小小世界，狀態好的話曉曉應該可以更enjoy佢所喜歡嘅「而妙肖」~
而妙肖 閱讀全文
由曉曉好鍾意唱「而妙肖」(世界真細小)開始，我已經好想同曉曉去一次迪士尼，本來姨媽姨丈係八月份時邀約一齊去玩，但嗰陣天氣實在太熱，而曉曉當時都仲成日要抱，諗起都覺得辛苦，所以就拒絕咗佢哋冇一齊去了～最近除咗繼續喜歡「而妙肖」，進化到自己識得唱晒成首之外，又愛上了睇表姐俾嘅迪士尼系列舊圖書，認識咗米奇老鼠同高飛等角色，我就更加想去啦～曾經諗過結婚周年去迪士尼酒店住一晚順便入去樂園玩，但見到價錢嚇怕怕，最後去咗澳門玩(未打blog添)～而家十一月天氣又唔太凍又唔太熱，呢個爸爸短週，我哋又冇乜其他特別事情嘅星期六，決定去吧﹗
今次真係零preparation，HA合作社其實有得買特價門票，但決定得倉卒，要專登去亞皆老街實在太大費周章，豪俾佢啦～
去到呢個星期尾睇天文台天氣預報，話星期六會落雨，我都好似小學生期待學校旅行嘅心情咁，又擔心又失望，結果到星期六早上真係落雨，而且仲大大地添，爸爸search下其他室內去玩嘅地方我都完全提唔起勁，決定⋯去就去啦，落雨就落雨啦，應該唔會落成日啩？我哋等曉曉開始眼瞓嘅時間就出門口，果然佢上140M小巴冇耐就瞓著了，到轉搭地鐵迪士尼線時佢都仲同周公約會緊呢，個廣播話「開始奇妙嘅旅程」之類，我就話「奇妙旅程由瞓覺開始」囉～
可能周遭環境太熱鬧，曉曉未瞓夠，但落咗地鐵之後好快就醒了，矇矇鬆鬆咁跟住我哋買飛入園﹗ 閱讀全文