曉雖然停課已經四個月，但因為學校有網上教學，所以都有繼續「返學」，上一個主題係講多謝唔同職業既人，其中有一份功課要小朋友畫將來大個想做咩工作，曉細個時曾經講過要開雪糕店、做空中小姐，但就從未講過要「繼承衣缽」學我做醫生，但今次佢畫咗要做醫生，究竟係得到邊個既inspiration呢？

就係佢﹗

玩具醫生—-麥芬醫生~ 閱讀全文 →

我真係超級討厭洗碗﹗﹗有幾討厭？鍾意做既家務係洗衫摺衫煮飯，冇乜所謂既家務係拖地執屋洗廁所，洗碗？榜尾~即是寧願洗廁所都唔寧願洗碗~其實結婚咁多年來，我洗過既碗都真係好少次，通常都係我煮day洗，但其實佢都唔多鍾意洗，洗啲碗居然要一邊睇youtube一邊洗(已經進化到淨係聽歌都未夠)~其實我已經留意咗洗碗機好多年，行電器行又會順便望下，睇下有冇啲我哋用得到既型號~

點解一直都用唔到洗碗機呢？一來大多數既洗碗機都要安裝，要好似洗衣機咁又入水位出水位，即是要放係廚房，但又唔可以放係洗衣機上面，要嵌入廚櫃中間或者座係枱上面，因為係租既屋，唔可能有大改動，所以我一直既心願就係買到層樓就要買洗碗機~

後來越來越多「免安裝式」既洗碗機推出市場，即是你可以使用時每次倒水入個機度，然後引導啲污水去洗手盤或適當既去水位就ok，我哋都係有困難，因為廚房真係冇位放…不過世上無難事，只怕有心人，如果夠討厭洗碗，夠想買部洗碗機，呢啲問題都解決到既~當我再一次search洗碗機，諗住睇下啲用家評價，開youtube嚟搵，有個channel「夫妻廢片」拍咗條洗碗機既片，佢哋想dem啲污水係點，就引咗啲污水落個盤度，知道洗一機碗每次用水量只係5L，我靈光一閃﹗佢係要dem先引落個盤度，但我哋實際操作時，每次都引落個水桶度都得呀﹗即是唔需要局限將部機放入廚房，只要係廳度搵到一個位放到部機又放到個桶就ok了~

買咗啦﹗夢想成真~ 閱讀全文 →

2014年時我由全職工作轉咗做兼職，為咗減少工作壓力好好陀B(感恩曉2015年順利出世了)，亦為咗增加生活趣味開始咗學韓文，我之前都打過好幾篇關於學韓文既blog(11-9-2014：韓文班開學咯～、14-11-2014：學習真好．한국어之進度、12-6-2015：한국어第二學期．趣味gogogo、21-8-2017：我的韓語學習．邁向第七個學期)，之後我就再冇打過關於學韓文既blog了，究竟係學有所成丫，定係半途而廢呢？

識我識得耐既人都知道我以前其實學過西班牙文，中學時搵咗個鬼妹姐姐好似私人補習咁一對一教我學過少少，到大學時係HKU既language centre好正式咁學咗兩年半(到讀到醫科year 3太忙放棄咗)，當時會學西班牙文好主要係因為中三暑假時去多倫多讀summer school時識咗啲南美朋友，所以先提起呢個興趣。到大學year 1時language centre好多語言都有得學，我就繼續我既西班牙語學習，但當時我實在唔係好明點解啲人會學韓文，全球除咗中文、英文最多人用之外，西班牙文都好多人用，但韓文就只有小小既韓國會用…但當你迷K pop、迷韓劇、迷韓國綜藝既時候，韓語既世界就會變得非常之大，而且非常有用~

由韓語入門(1)、(2)，基礎韓語(1)、(2)，中級韓語(1)、(2)，高級韓語(1)、(2)，原來我係HKU SPACE學咗四個年頭，之前有同學問過我，你打算學到邊個level先停，我當時答：「學到冇得學上去囉﹗」其實一直以來既成績都好好，學得又開心，不過兩個小朋友實在太掛住媽媽，學到高級韓語(2)時，曉曉剛剛滿三歲，佢未到星期四就開始傷感，擔心夜晚見唔到媽媽，初生詩詩又要用婆婆多啲心機，為咗婆婆同兩個小朋友，我決定暫時唔學住啦~暫時？係呀，去韓國留學(短期啫，唔駛擔心或者太驚訝)都係我既夢想嚟架~等兩個女唔會太太太掛住我時我應該會學番~

冇去返學當然有好多嘢會唔記得，少用既文法同單詞都一直減少，但keep住有睇韓國電視節目，語感依然都keep得到~有韓國病人嚟到，就要頂硬上啦﹗

之前其實都有睇過其他韓國病人， 閱讀全文 →

之前行開文具店，買其他嘢時見到一疊以前讀書時大家會用嚟製作溫習notes嗰啲咭仔，買咗一疊諗住睇下有咩搞作~開頭有諗過自製認字拼圖，一邊寫字一邊畫圖中間剪開佢，俾啲小朋友拼下，諗下諗下，呢啲最後都會一張張唔見晒，又唔見得好有趣佢哋都未必會玩~

上次同曉整咗「世界的孩子不一樣的生活」既邱曉版，「世界」一書係曉非常鍾意既一本書，入面講咗七個世界各地既小朋友，每一日由早餐、家人、校服、玩意等等逐一去說明，邱曉版就用番相同既主題、相同既語調去做咗一個系列出嚟~上次一齊整本書整得咁高興，今次不如同佢合作整啲認字咭啦~

有啲詞語係我諗既，有啲係佢話要既，總之就我寫字，佢畫畫，我話，畫得唔似唔緊要，你自己記得係咩就得啦~啲成果真係好可愛呀﹗﹗

佢話首先要「邱曉」，後來我寫咗另一張咭係「媽媽」，佢一邊畫一邊話：「媽媽最近都紮辮喎…」「咁咪分唔到邊個係你邊個係我囉？」「咁你有戴眼鏡家嘛﹗」「咁又係喎~」 閱讀全文 →

唔記得係舊年定前年既書展時買咗呢本「世界的孩子，不一樣的生活」繪本，但由呢本書嚟到我哋屋企到而家，睇過既次數肯定過百次，有可能有二百或者三百次，總之就成日都睇啦~

入面講七個分別來自日本、印度、意大利、秘魯、俄羅斯、烏干達同埋伊朗既小朋友，佢哋一日由朝到黑既生活，講佢哋既家庭由咩人組成啦，佢住係點樣既屋企啦，早餐食啲乜啦，返學著咩衫啦，點樣返學啦，學校學啲乜啦，用咩文字書寫啦，同朋友玩啲乜啦，做咩家務啦…等等~ 閱讀全文 →