停課咁耐，每一日都不停諗下有咩同啲小朋友玩，少出街少外食就成日都想食濃味嘢同埋甜嘢，又要有得玩又要有得食，最好就係屋企整嘢食啦﹗所以停課早期我就買定麵粉呀糯米粉呀呢啲必備材料係屋企，睇下幾時整~

呢一個星期六，夜晚過去婆婆度食飯，不如就整啲甜品一齊分享啦~湯丸其實好耐之前都有搓過，記得嗰陣仲住係華都，曉都未出世，嗰次唔記得用咗蕃薯定南瓜嚟搓啲湯丸，因為冇再放內餡，印象中味道係比較淡，質感係比較實多過軟滑~事格咁多年，今次上網搵定食譜，決定集眾家之大成~

用熱水+糯米粉+少量糖+少量食油嚟整個皮，比例略略參考網上食譜，不過都係靠手感去調整，搓好粉糰就可以包內餡啦，我帶咗片糖同朱古力粒嚟，決定試下朱古力粒啦，其實呢啲係焗曲奇餅或者muffin用既朱古力碎，用嚟包入湯丸都好方便~

原本想叫曉嚟一齊包，佢上次包既餃子都似模似樣，不過呢一日曉冇午睡，狀態不佳，包咗一粒就走咗~結果都係兩母女一齊包，不過係我同我媽既親子活動，哈哈~ 閱讀全文 →

農曆新年+最少停課一個月，啱啱學寫字既K.2小朋友如果唔返學就唔執筆寫字既話，退化速度難以預測，要保持實力(最好梗係有進步啦)當然要keep住鍛練啦~所以停課呢段日子，我每日安排兩頁寫中文字既「媽媽功課」俾曉曉~

我真係冇正式學過幼兒教育或者語文教育甚麼，只能夠大概咁由淺至深，係佢已掌握既字之上再複雜少少，或者再加多少少，又用啲字嚟配下詞語，賦予文字更多意義，中間又加插少少溫習，內容方面就希望可以保持到佢有興趣啦，呢個就係「媽媽功課」既製作概念~

啲字係咪寫得好靚呢？因為係我寫既，哈哈﹗﹗呢本唔係「媽媽功課」，係曉曉出俾我做既「曉曉功課」，曉老師係度批改緊我寫既字，靚既會俾星星架~ 閱讀全文 →

話說曉曉十個月大時，Dora同Daisy已經嚟到我哋屋企，邊個嚟既？佢哋係一對孖女洋娃娃bb，當年新年時嫲嫲話要買玩具俾曉曉，我哋帶佢去玩具反斗城，曉曉bb親自揀咗呢兩個同佢都一樣係bb既娃娃~本身孖女有套類似睡衣/家居服既衫，呢段日子玩呀玩，套衫即使再洗都好殘舊~

曉曉@10m，與新簇簇的孖妹之一~ 閱讀全文 →

因為武漢肺炎，小朋友最少停課一個月，個個盡力減少外出，一方面減低感染機會，二來都要節省口罩~大人都仲會每日出去返工(day公司其實都實施半home office)有得行多少少路，小朋友每日活動空間真係得屋企嗰幾百呎，我哋都盡量爭取俾佢哋落平台玩，但午睡醒來既時間好多其他小朋友，所以我哋都有好幾晚食完晚飯之後落去玩，冇乜其他人，可以口罩都唔駛戴~

妹妹詩詩性格比較活躍，真係會不停sir滑梯，跑跑跳跳，但家姐曉曉真係比較好靜，落街玩都寧願佔據滑梯下面既小空間開餐廳賣雪糕，要氹佢踩下滑板車都要用「送外賣」做題材先會積極少少去下~而家咁少出去，落得去嗰半個鐘梗係希望可以maximize到效果啦~

今日爸爸有好提議，我哋玩尋寶遊戲﹗﹗

帶咗一楝唔同顏色唔同大細既圈圈落去，輪住收埋，跟住輪住搵番出嚟~ 閱讀全文 →

小朋友停課最起碼到三月頭(我估應該唔止停咁短)，日日窩係屋企又悶又冇得放電，家長最頭痛，買咗activity book又教佢寫多啲字都消磨唔到幾多時間~我知道，又kill time又開心又實用既，一定係同小朋友一齊煮嘢食，所以到咗星期六放假，可以試下啦~

平時兩隻都鍾意食屋企自己包既餃子，平時我多數係街市買餃子皮，自己整內餡嚟包，星期五嗰日去街市，年初七未有得賣餃子皮，星期六早上去超級市場都搵唔到~把心一橫，即管試下自己搓皮啦，又唔係未試過，20+年前讀中學時家政堂都試過自己搓皮整鍋貼啦，而家又有網絡可以睇食譜，屋企又有廚師機可以幫我出力，應該ok啩？所以買唔到餃子皮，買咗包麵粉嚟代替~

小朋友午睡醒咗就可以開工了﹗用廚師機絞碎急凍梅肉豬扒(今時今日既新鮮豬肉太貴，又儲存得耐)，打碎咗紅蘿蔔同雲耳，解凍咗粟米，跟住就預備今次既重頭戲—-餃子皮了~

曉曉幫手絞肉~ 閱讀全文 →