曉讀到K.2，意味住今年我哋第三年挑戰幼稚園一人一花了，第一年好快死咗既黃時鐘花，到第二年醜樣得嚟總算開過花既一串紅(請參閱：17-1-2019：幼稚園一人一花之我家的一串紅)，今年既挑戰者(嚟我哋屋企居住而要掙扎求存係對花既挑戰)係—-洋鳳仙~

第一次開花時既洋鳳仙~ 閱讀全文 →

本來我盡量避免帶曉曉參加下晝既活動，因為作為超級睡寶寶，佢到而家4y8m仲係要瞓好多晏覺，而且睡意來襲難以抵擋，隨便都瞓兩個鐘以上~由出世到而家超過一千七百日，完全冇瞓晏覺只係試過兩日咁大把，平時星期日四點半學游水我都覺得好大壓力，去完教會要衝返屋企小睡再叫醒佢去游水，所以安排下晝既活動都係要小心啲~今次班入面既同學家長搞活動，一齊去參觀騎術學校，見咁難得就挑戰一下啦﹗

參觀時間係下晝兩點半至三點半，我哋要兩點鐘係美樂輕鐵站集合，所以放學後唔返屋企了，婆婆同小朋友們係我診所附近食住嘢等我，跟住就一齊出發了﹗短短既輕鐵車程，我要確保曉唔好瞓著同埋詩要盡快瞓著，結果都成功呀~

騎術學校

K.2曉同同學仔既互動果然同N班、K.1時好唔同了，會同佢哋拖住手行，一齊傾計，冇以前咁怕醜啦~因為有幾個同學仔都一齊學游水嘛，我都有熟人丫﹗哈哈~ 閱讀全文 →

早前留意到康文署「國際綜藝合家歡」既宣傳，我就睇下有咩節目啱兩個分別四歲同一歲半既小朋友睇，又要考慮入場年齡，又要考慮喜好，又要考慮日子同地點，結果決定帶曉去睇屯門大會堂舉行既「玩轉古典音樂會」~因為入場年齡最少要三歲以上，適逢公公婆婆去咗旅行，咁就由爸爸照顧詩詩，我帶曉曉去睇~

大backdrop太多人影，我哋同小冊子影啦~ 閱讀全文 →

向來聽講，大家對於榴槤嘛，一係耍手擰頭，一係狂熱份子，從來冇乜點聽過有啲人會食，不過唔係特別鍾意食咁~我諗食榴槤都同原生家庭好有關係，我爸我媽我家姐都唔食，即使以前嫲嫲食榴槤都會係自己房度食，所以由細到大我都唔食榴槤，聞到陣味就走夾唔抖，最難忘有一次去滿記食糖水，原本滿心歡喜，但隔離枱叫咗啲榴槤甜品，即刻覺得呼吸唔到~

我同我老公識咗二十年，結婚都差唔多八年，對於結咗婚之後令佢食少咗榴槤、雞腳、豬潤等等我唔食既嘢我都有啲遺憾，所以曉出世之後，我都希望曉可以成為佢既榴槤伙伴~

曉兩個幾月大時，day話要「從小薰陶」，可想而知佢幾想曉陪佢食吧~

曉一歲幾嗰次去美食展，我媽仲好積極咁俾曉曉試各種榴槤產品，等爸爸「有個伴」~但間中行過超級市場，我問day要唔要買榴槤同曉share，佢都唔太積極，可能我表明唔會食，令佢意興闌珊吧？

我發覺年紀大咗，飲食方面好多口味都唔同咗，最近經過啲榴槤聞落都唔覺得臭了，我問曉香唔香，佢都話香喎~適逢經過Aeon超市，可能時間有啲夜吧，有啲一盒盒開好既榴槤特價，最平既四十幾蚊都有，我提議day可以買一盒細細地既，等啲細路可以試下，day又可以過下癮~結果day揀咗一盒七十幾蚊既，佢話四十幾蚊嗰啲睇落dry dry地喎，我都完全no idea~

返到屋企其實我都有啲急不及待試，又有少少戰戰兢兢~詩其實好爽快咁樣食咗吞咗，又冇反抗，問佢好唔好味佢話好味，再俾都肯要，不過都係食咗兩三啖左右，可能本身已經太飽(出街食咗飯連埋甜品)~曉呢，當然好受我戰戰兢兢既反應影響啦，試都細細啖，試咗幾啖，都冇吐，但對於味道不置可否，冇追住食，可能都係因為本身太飽…(或者我哋唔應該係佢哋咁飽時試，試唔真~)

詩詩試食﹗

我呢，我好驚訝原來榴槤啲核咁大粒，一pack果肉本身已經唔多，入面啲核仲咁大粒，咁咪真係好貴？﹗味道方面，原來真係水果﹗﹗只有水果既甜蜜，食落去一啲臭味，一啲嗆鼻既味都冇，其實有啲清香添~不過我又覺得佢既甜味唔算有個性，好似西瓜既清甜，荔枝既酸甜蜜味都比起佢有個性~我唔係好明點解大家對佢咁著迷~day話可能我哋呢舊榴槤creamy既layer唔算厚，而外皮本身相對比較乾，好味既榴槤係甜蜜+豐厚creamy，聽落應該都吸引既~

今次試吃總結，原來我可以食榴槤﹗﹗不過好貴~而且我未食到真正最美味既榴槤~而我亦未變成榴槤fans~下次有好味榴槤可以預我一份~其他榴槤product？我諗未必太吸引吧？可以一試既~

我屋企雖然幾好住，但附近冇嘢食冇嘢賣亦都係事實，仲要好多鋪頭都唔送外賣，之前叫嚟叫去都係Pizza Hut同翠華，甚至連麥麥送同KFC都唔上嚟，當一知道有Deliveroo同Food Panda呢類服務之後，即刻精神一振~知道之後我即刻download啲app嚟睇睇，但原來…唔–送–嚟–我–哋–度–呀——–﹗果然係太偏僻~

後來有一次見到Food Panda既司機同我哋一齊等lift，就知道服務擴展到我哋呢區lu~適逢唔想煮飯又唔想出街既呢一日就試下吧~我哋揀咗平時好難等位既屯門市廣場茶木，睇餐牌感覺上價錢冇比起去餐廳食貴好多，用app落單都好流暢，一俾完錢就開始倒數仲有幾耐到，app入面仲可以係地圖追踪到司機架車去到邊度添~

好準時﹗嚟到見到係比較少見既外賣紙盒~我估係因為最近大家對膠餐具比較抗拒吧~ 閱讀全文 →