雖然叫做飛福岡，頭尾七日，但實際上係福岡市嘅自由時間只有兩個half day，最尾嗰個半日留嚟行街shopping，初段呢個半日就睇下去邊啦~搵下福岡市景點、親子景點都不難見到大濠公園，因為近市中心，有湖有樹有新鮮空氣，可以歎咖咖、泛舟，而福岡市美術館亦係公園之內，確實係好天氣壞天氣兩全其美嘅好地點~下晝我一早買定去豪斯登堡嘅火車飛，諗住買火車便當上車食，所以我哋係大濠公園逗留到十一點幾就差不多了~
早晨當然有早餐開始啦，Comfort Hotel屬於經濟型酒店，好多人輪流去個小食堂食早餐，所以酒店本來就實施比較detail嘅分流，我哋去到時好好彩唔駛等位，到我哋食完走嘅時候就已經要排長龍了~食物如預期有和式有西式，去到日本我好難抵擋食白飯嘅和式早餐，可能就係因為咁好明顯地肥咗返香港~
Comfort Hotel啲餸菜比較有個性，詩都鍾意白飯，但唔鍾意黏黏嘅秋葵，同埋加咗香料去煮嘅薯仔，應該主要靠炒蛋同香腸送飯啦~
閱讀全文我哋17號出發去日本，其實14-16兩個小朋友去咗教會camp，我同老公亦趁機去咗西貢staycation，享受了11年半以來久違了嘅二人世界～咁又點？咪就係16晚有超多衫要洗，unpack三日嘅行李，再重新pack七日嘅行李囉～今次坐香港快運，買機票時我索性買連行李額嘅票型，如果單買機票後再加行李額價錢仲貴，雖然有四個20kg行李額，但我決定帶一大兩小行李，真係非常好嘅決定呀！兩個女負責自己個喼，我同老公share大嗰隻，佢哋管理番自己嘅物件，我真係輕鬆好多，有公家嘅嘢又可以叫佢哋幫手拎～
出發嘅早上曉返學校練中國舞，我就返三個鐘工，趕返屋企再出發時間剛剛好～爸同詩就係屋企執埋最後嘅行李～
小朋友第一次自助check in、自助bag drop，覺得好新奇，我上次同家姐去台灣時試過一次了～好在係三件行李，因為詩未夠大個可以自己寄～
閱讀全文上一個比較長嘅trip係2025聖誕假期嘅雲南西雙版納景邁山之旅，旅程好充實，去完好滿足，加上之後情人節又去咗珠海住一晚，四月又去咗澳門玩水上樂園，一直都未好渴要去旅行，但暑假又點可以唔出去走走呢？暫時又冇話特別想去邊度，諗過去東南亞住resort玩水歎海灘，又搵過國內一啲深山入面嘅森林旅館，亦考慮過帶兩個女搭瞓覺過夜嘅火車～最後決定性嘅一件事，竟然係youtube feed俾我哋睇嘅一段短片~
短片介紹動物飼養員嘅工作，無論好天定落雨，佢哋都要照顧動物，包括花好多時間準備食物、餵飼同埋打掃之類，嗰個動物園睇落好愛錫啲動物，佢哋有寬闊嘅居住空間，而且遊人可以近距離接觸啲動物，當中最搶眼嘅有卡皮巴拉同埋河馬，可以摸佢哋同埋餵佢哋食嘢，仲有一間小屋，入面有可愛嘅天竺鼠，我同曉、詩見到都心心眼，我就話，不如暑假就去呢度啦！原來嗰度叫長崎Bio Park，飛福岡、長崎或熊本都係合理嘅選擇，我哋2024年尾先去過熊本，熊本就唔考慮啦，飛機班次嚟講，香港飛福岡一定多選擇最多啦，而且香港最近根本冇航班直航飛長崎～search機票嗰陣價錢仲好抵，只係諗咗一星期左右，就加咗燃油附加費，即刻貴咗好多～不過嘛，無論飛邊度都一定會貴咗，照去啦～
長崎Bio Park地點一啲都唔方便，好在園方有free shuttle一天三班，由豪斯登堡接送，順理成章行程就包含豪斯登堡啦，我嘅日本旅行必定要包含日式溫泉旅館，一泊二食，唔要自助餐嗰種，附近主要有武雄溫泉同嬉野溫泉，我見武雄溫泉有JR直達，就揀呢度啦～我哋嘅行程就成形了！
day 1：香港飛福岡，住福岡
day 2：福岡市內，住豪斯登堡
day 3：full day豪斯登堡，住豪斯登堡
day 4：長崎Bio Park，住豪斯登堡
day 5：遊有田、武雄溫泉，住武雄溫泉
day 6：福岡市內，住福岡
day 7：福岡市內，回香港
我見大家去旅行都有「換酒店派」同「唔換酒店派」之分，我今次6晚住4間都算換得多，不過嘛，每間住得短，拎嘢出嚟少，第二朝執行李又唔會太麻煩嘅，有時停留一個地方多幾日，我都會換酒店，可以有多啲唔同嘅體驗丫嘛，早餐都試多一間～
至於旅程嘅日子，原來同舊年嘅越南旅行只差一日，因為又係要等詩八月中嘅芭蕾舞公演結束後先出發，然後又係就曉嘅中國舞排練，星期一下午出發，星期日回港，咁就正好啦，星期一我都返埋工先去啦～
book好機票、酒店、JR車票，預備好可以出發啦！
前往其他日本旅遊blog
之前一排覺得生活有啲悶，可能係考完試後未好好玩一轉吧？所以一直搵下玩嘅機會~去康文署camp幾時都on the list，細細個時就當然有跟學校、跟不同團體入camp啦，幾年前某次大姑奶邀請大家去day camp，先知原來以個人名義book都ok，同埋原來價錢非常平﹗﹗所以早兩年搞咗一次「Rita and Friends」大型宿營，叫好多各方好友，book咗40個位去曹公潭三日兩夜，嗰次大家都玩得好開心，我就有啲壓力，怕大家玩得未夠盡興，招呼不周～後來有另一次，自己一家四口，book咗西貢嘅麥理浩夫人度假村住一晚，除咗遠得不得了之外，真係無可挑剔，一家人自己住一間小屋，兩房一廳，非常闊落，行出門口就群山環抱，專登去台灣住清境農場都係想咁樣啫～上次去係冷天，唔係游水嘅季節，但都整體都玩得好開心，小小遺憾嘅係，嗰陣詩未夠高，繩網、射箭都未玩到，佢有啲失望～
今次突然興起話去camp，一吹雞，家姐一家三口就話ok，不過爹媽唔得閒，所以就簡簡單單，兩家人一齊去～
出發前我叫豆包幫我gen張poster介紹度假村設施，姨丈幫我加咗啲Pokemon落去，更歡樂～
閱讀全文