其實第四日係白浜o既玩法參考咗白浜觀光協會個網頁，佢建議一條步行路線，幾個景點總共行70分鐘，沿海行完幾個景點之後，我哋出發去最後一站「平草原」~望住地圖行呀行~

點解咁荒蕪o既？﹗行行下有架小巴停低，個司機伸個頭出嚟對住我哋嘰呢咕嚕講咗一堆嘢，我哋指一指地圖上o既平草原俾佢睇，佢就點點頭，示意我哋o既方向正確~點解佢會特別咁問？

原來平草原勁遠呀﹗遠離熱鬧o既街道，深入民居、會所、哥爾夫球場…

經過呢啲咁寧靜o既道路，行咗肯定唔止觀光協會所描述o既距離呀~抑或我哋之前買手信買得太多太重，所以行起上嚟特別遠？﹗