我哋17號出發去日本，其實14-16兩個小朋友去咗教會camp，我同老公亦趁機去咗西貢staycation，享受了11年半以來久違了嘅二人世界～咁又點？咪就係16晚有超多衫要洗，unpack三日嘅行李，再重新pack七日嘅行李囉～今次坐香港快運，買機票時我索性買連行李額嘅票型，如果單買機票後再加行李額價錢仲貴，雖然有四個20kg行李額，但我決定帶一大兩小行李，真係非常好嘅決定呀！兩個女負責自己個喼，我同老公share大嗰隻，佢哋管理番自己嘅物件，我真係輕鬆好多，有公家嘅嘢又可以叫佢哋幫手拎～
出發嘅早上曉返學校練中國舞，我就返三個鐘工，趕返屋企再出發時間剛剛好～爸同詩就係屋企執埋最後嘅行李～
小朋友第一次自助check in、自助bag drop，覺得好新奇，我上次同家姐去台灣時試過一次了～好在係三件行李，因為詩未夠大個可以自己寄～
閱讀全文上一個比較長嘅trip係2025聖誕假期嘅雲南西雙版納景邁山之旅，旅程好充實，去完好滿足，加上之後情人節又去咗珠海住一晚，四月又去咗澳門玩水上樂園，一直都未好渴要去旅行，但暑假又點可以唔出去走走呢？暫時又冇話特別想去邊度，諗過去東南亞住resort玩水歎海灘，又搵過國內一啲深山入面嘅森林旅館，亦考慮過帶兩個女搭瞓覺過夜嘅火車～最後決定性嘅一件事，竟然係youtube feed俾我哋睇嘅一段短片~
短片介紹動物飼養員嘅工作，無論好天定落雨，佢哋都要照顧動物，包括花好多時間準備食物、餵飼同埋打掃之類，嗰個動物園睇落好愛錫啲動物，佢哋有寬闊嘅居住空間，而且遊人可以近距離接觸啲動物，當中最搶眼嘅有卡皮巴拉同埋河馬，可以摸佢哋同埋餵佢哋食嘢，仲有一間小屋，入面有可愛嘅天竺鼠，我同曉、詩見到都心心眼，我就話，不如暑假就去呢度啦！原來嗰度叫長崎Bio Park，飛福岡、長崎或熊本都係合理嘅選擇，我哋2024年尾先去過熊本，熊本就唔考慮啦，飛機班次嚟講，香港飛福岡一定多選擇最多啦，而且香港最近根本冇航班直航飛長崎～search機票嗰陣價錢仲好抵，只係諗咗一星期左右，就加咗燃油附加費，即刻貴咗好多～不過嘛，無論飛邊度都一定會貴咗，照去啦～
長崎Bio Park地點一啲都唔方便，好在園方有free shuttle一天三班，由豪斯登堡接送，順理成章行程就包含豪斯登堡啦，我嘅日本旅行必定要包含日式溫泉旅館，一泊二食，唔要自助餐嗰種，附近主要有武雄溫泉同嬉野溫泉，我見武雄溫泉有JR直達，就揀呢度啦～我哋嘅行程就成形了！
day 1：香港飛福岡，住福岡
day 2：福岡市內，住豪斯登堡
day 3：full day豪斯登堡，住豪斯登堡
day 4：長崎Bio Park，住豪斯登堡
day 5：遊有田、武雄溫泉，住武雄溫泉
day 6：福岡市內，住福岡
day 7：福岡市內，回香港
我見大家去旅行都有「換酒店派」同「唔換酒店派」之分，我今次6晚住4間都算換得多，不過嘛，每間住得短，拎嘢出嚟少，第二朝執行李又唔會太麻煩嘅，有時停留一個地方多幾日，我都會換酒店，可以有多啲唔同嘅體驗丫嘛，早餐都試多一間～
至於旅程嘅日子，原來同舊年嘅越南旅行只差一日，因為又係要等詩八月中嘅芭蕾舞公演結束後先出發，然後又係就曉嘅中國舞排練，星期一下午出發，星期日回港，咁就正好啦，星期一我都返埋工先去啦～
book好機票、酒店、JR車票，預備好可以出發啦！
前往其他日本旅遊blog
返到去熊本站，時間都唔係好多，我哋要快快脆脆食埋午餐，拎返啲行李，就要趕過去機場，搭下晝四點幾嘅班機返香港～
嚟咗日本咁多日都未食過壽司，Amu Plaza有一間迴轉壽司店，我哋即管去睇下會唔會咁啱唔使排隊呢？當然冇咁容易啦，間舖頭預計大約等20分鐘，20分鐘都係太耐啦，結果我哋去咗一間即刻有位嘅鐵板燒店食午餐～
同平時一樣，叫三人份share嚟食，間舖頭用手機下單，個英文menu怪怪地，要配合埋日文啲漢字先可以確保唔會嗌咗啲怪嘢（I mean內臟嗰啲），三份餐之中，其中一份叫咗貴啲嘅靚肉，不過送到嚟都唔係好識分，應該係肥啲、油脂重啲嗰份就係貴嗰份啩？
閱讀全文嚟到旅程嘅最後一日lu～The Blossom冇包早餐，我哋去熊本站附近搵食！離開酒店之前寄存埋啲行李，The Blossom同一般酒店寄存行李唔同，有間房仔大家可以自由出入，而啲行李可以用獨立嘅安全鎖鎖實個櫃，又或者放入locker裏面，大概係等大家可以free啲處理啲行李吧，不過都有職員可以過嚟幫手～
附近有麥當勞、Starbucks、Mister Donut等食店，我哋最後揀咗一間可以坐低食嘅麵包店～
我同兩個女去揀包，爸爸搵位先～我同爸爸飲咖啡，諗住問下店員有啲咩啱小朋友飲，我話milk，佢okok，咁我就俾錢等候領取～oops，原來溝通失敗，佢俾咗咖啡嘅milk我！oh no，又要再排過隊！可能我太耐冇去過日本，呢間麵包店嘅收銀機都令我好讚嘆，喺香港，要快，梗係俾八達通或者其他可以嘟嘅卡啦，原來呢度比cash都咁快，店員計算好銀碼，你有理冇理掉晒一大堆散子落部機度，佢就會自己計算好要邊啲找邊啲俾你，好似仲方便個俾卡！
我哋買咗嗰堆麵包蛋糕之中，最好味係粉粉地、紫紫地嗰個番薯蛋糕呀，有一粒粒甘香美味嘅番薯粒喺裏面，yummy～雖然都係麵包，世界上唔同角落，真係會develop出各種唔同嘅風格，日式麵包柔軟，餡料同造型多樣、豐富，歐洲面包強調穀物本身嘅原味，其他材料只係做點綴，港式麵包又係另一個模樣～
閱讀全文
