睇咗上次「1-7-2014：來玩棒球吧@PLAY」blog嘅朋友們都知道我有預告過，同一個星期日我同day會去玩抱石，點解一個星期內有咁多有趣新鮮嘅玩意，一來我哋呢排都好積極運動啦，要擺脫「兩條肥嘢」嘅命運，二來上次去行山晒到燶，炎炎夏日不如都係揀啲室內活動啦﹗呢排興去工廠大廈玩，就由呢個方向search啦～
比起上次嘅棒球，其實更加早search到呢個抱石場，不過要就啱時間參加初學者嘅introduction先得，所以就延遲到星期日至去喇﹗
我哋去嘅就係位於新蒲崗太子道東一楝工廠大廈地下嘅Just Climb抱石場﹗ 閱讀全文
啱啱嗰個星期六見我同day一齊放假，我哋呢排又積極運動，所以安排咗去西貢行山(blog blog後補丫)～風景好靚，運動量好大，呢啲好處以外嘅，就係嗰日非常非常非常非常非常非常非常非常非常非常非常之－－－－熱﹗﹗我哋兩個都曬燶咗，而且當時好怕會帶唔夠水飲～行完山兩對腿酸痛咗第三日，又正值公眾假期，我哋決定要再出動了﹗因為怕又好曬又好熱，所以今次活動主力搵搵室內又可以郁動嘅地方﹗我本身好想去攀石，因為時間問題，而家預約好今個星期日去，結果今日嘅活動選擇咗去可以walk in嘅棒球擊球練習場﹗﹗
本來day去呢個練習場都有少少保留， 閱讀全文
難得有星期六放假，一早約好day一齊去行山，我哋都好耐冇去過行得長啲嘅山，平時星期六、日都好多其他事情，有時得閒又撞正天氣唔好，所以今次叫day搵條長少少嘅路線，佢就揀咗由西貢西灣亭出發，倒轉行麥理浩徑第二段至第一段，跨過西灣山落去浪茄灣，再兜番過萬宜水庫東壩完成﹗想行長少少可以沿住東壩條路出返去北潭涌，但我哋已經熱到攰到郁唔到，結果係東壩上咗的士出番西貢咯～其實出發前我都唔係好知佢講嘅係邊條路線，到咗時描述得仔細啲至知，哦，咪我同爸媽幾年前行過嗰條路倒轉囉，嗰次仲有打過blog添～請參閱：30-10-2006：重陽登高之北潭涌、萬宜水庫、浪茄、西灣亭，原來已經係八年前嘅事呢～
我哋行嘅就係最最最東邊最尾尾嗰截喇﹗ 閱讀全文
要介紹一下今年day送俾我o既生日禮物﹗結婚兩年半肥咗好多，好多人話幸福同體重都有正比例關係，但希望體重唔好加得咁快啦~我都唔知係心廣體胖定係年紀大咗身陳代謝慢咗，總之近年越來越恐怖了…而家超出咗標準BMI一截啦~希望即使做唔到性感尤物都唔好太肥，年中講唔少次話要做運動同埋食少啲，但始終堅持唔到幾耐…(慚愧中…)希望今次有個好啲o既工具幫幫我手啦﹗
就係佢—-Fitbit Flex﹗ 閱讀全文
離開咗鳥巢水立方，我哋係熱辣辣嘅正午時份直接搭咗的士去雍和宮附近，先搵嘢食，再逛多一陣就要返香港咯～
呢個標題又係「四爺的」？﹗之前已經係四爺的圓明園㗎咯噃，今時今日嘅雍和宮係藏傳佛教嘅寺廟，係乾隆時期改建嘅，而再之前呢個地方其實係雍親王府，即是雍正皇帝登基前嘅府第，雍正就雍正啦，又要四爺的，是關睇咗「步步驚心」之後，吳奇隆飾演嘅四爺實在太有魅力了⋯噢～我諗我決定要係僅餘嘅時間加插多嘅呢一兩個景點，可能都同我係四爺fans有關囉～
呀，我點解未去到雍和宮就講咁多，其實係想介紹我哋食lunch嘅地方，其實雍和宮座落嘅呢條大街有好多食肆，但因為雍和宮就係佛寺，所以八九不離十都係素菜館，平時我哋都唔係可以唔食素，但飢腸轆轆嘅兩人好想食得多啲，所以我哋嘅目標係non素菜⋯
結果入咗去呢間食餃子嘅「輕鬆時刻」，名符其實，職員全部都享受緊佢哋嘅輕鬆時刻囉⋯ 閱讀全文