自從開始跑步，對於地點之間嘅距離，移動所花費嘅時間變成有更加清晰嘅概念，一般嚟講，3km以內，都係步行嘅距離，普通行路速度，1km大概15min左右，我自己一個人開turbo咁行，1km最快11-12min～所以由酒店去預約咗晚餐嘅允久居酒屋距離2.8km，時間許可的話，步行絕對係一個好方法，唔夠時間嘛，喺台灣call Uber都好方便～

嗰排我跟住家姐佢哋一家又玩返Pokémon Go，喺台灣仲玩緊呢個game嘅人，比起香港更多，所以周圍嘅道館都好熱鬧，要打傳說嘅怪都多好多幫手～我哋呢條路程要兩邊app切換，Google Maps睇路，又轉去Pokémon Go做我哋嘅訓練家，好有收穫～

訓練家出動﹗

飛機下晝四點幾起飛，1:00準時放工，順利上到最快嗰班機場巴士經屯赤去機場，家姐亦完美地上咗我嗰班車會合～一早做咗網上check-in，去到機場用自助機print行李tag、寄好行李就可以入禁區～可能最近坐得多廉航冇咁先進，好似真係第一次自己將行李送出輸送帶，感覺好神奇～

放工唔去食lunch先，就係因為Trip.com會員訂機票有得送免費貴賓休息室coupon，上次同家姐去台中時都預訂咗休息室coupon，最後因為人太多而放棄咗，自己真金白銀去美食廣場買嘢食～反正唔使錢，今次又試下睇吓掂唔掂～果然，同上次一樣，1號登機口附近嗰個休息室又係超多人，要排隊入場，而且見到裏面攞嘢食都好多人～聽職員講，相同公司另外兩個貴賓休息室都入得，我哋就轉戰60號登機口附近嗰度，wow，可以直接入場呀！

都容易搵位，而且個view好靚~

舊年去台中跑咗人生嘅第一場半馬賽事，當然會考慮下會唔會跑一次全馬啦，當時train半馬我都覺得花得太多時間，心裏面盤算，或者到我10k跑到一個鐘之內先再算啦～但係當時已經諗，如果跑初馬，一定要去台灣跑，台灣會有好隆重嘅初馬獎座，好有紀念價值～

到咗報名今個秋冬賽事嘅季節，家姐提議去嘉義舉行嘅故宮南院馬拉松跑我哋嘅初馬~

呢場賽事特別適合初馬嘅原因，係因為賽事限時7小時，時間鬆動啲，心理壓力冇咁大～

跑完步，仲有一整個下午時間，先搭飛機返香港，去邊度好呢？跑完半馬，對腳已經唔係好郁到，去邊度都咁攰，諗到可以去浸溫泉，要學下邱曉嗰句：「我覺得我自己真係好聰明呀！」search下台中有邊度浸溫泉，就搵到呢間日光溫泉會館，其實我見到Klook有連餐飲嘅package，本來都好有興趣，但係怕跑完步啲時間唔知點，所以冇買定，寧願去到真係想食，先再另外俾錢啦，好在係咁咋，估唔到跑完步會食到咁飽，浸完溫泉都未餓到要即刻食嘢～

潭子站落車，直接call Uber去溫泉會館，好在係Uber而唔係搭的士咋，山入面啲路有啲複雜，而且都有啲塞車，搭Uber都搭咗好耐，搭的士唔知會跳錶跳到幾多錢～

日光溫泉會館其實係一間溫泉酒店，有過夜嘅客人，亦都招呼我哋呢啲即日去浸溫泉即日走嘅客人，現場俾錢比Klook貴少少，先一日冇買定，當天冇得買喇～

日光溫泉會館有着泳衣浸嘅戶外溫泉，亦都有好似日本咁樣分男湯女湯嘅裸湯部份，裸湯有年齡限制，帶住小朋友we we wa wa嘈嘈共就只准浸戶外，我哋今次兩個大人去，梗係室內戶外都全部浸晒啦！知道戶外着泳衣浸溫泉要戴泳帽，我專登喺屋企摷咗一頂，唔知係大人定小朋友嘅泳帽出嚟，總之笠得住個頭啦，家姐冇帶，唯有幫溫泉嗰邊買啦～

呢個溫泉都唔錯，除咗有唔同溫度嘅池之外，仲有各種照顧唔同身體部位嘅水柱按摩，啱晒我哋跑完步去放鬆全身嘅肌肉～戶外嘅溫泉設施上其實大同小異，係多多一兩款水柱按摩囉～可能我哋去嘅時間，先一晚嘅人退咗房，入住嘅人又未到，所以無論係裸湯定係戶外池，人都唔算多，幾舒服～

浸完溫泉成個人煥然一新﹗舒服晒~肌肉痛都冇埋~

衝線之後首先有大會義工派發樽裝水同埋罐裝寶礦力，再拎埋完賽獎牌，好快我就見到比我早到咗終點嘅家姐～

朝早嚟到時個天仲黑麻麻，搵到自己需要搵嘅booth就冇乜理到其他，而家先知道，原來各個帳篷都有唔同嘅功能～