初馬嘅日子終於到啦﹗﹗練咗幾個月，到出成績表嘅日子~老土講句，最緊要無傷順利完賽，長跑長有~全馬組6:30開跑，要早啲去寄存行李，了解架步，而且由酒店行過去賽事中心都有一段路，我哋都要預早少少出門口~家姐係慣咗預最少時間梳洗食早餐出門，我就明明可以快都要慢，同埋提早多啲起身，為嘅係嗰篤X﹗長跑比賽最忌肚仔痛﹗﹗清空腸道先出發最為重要，為咗模仿平日嘅狀態，我慢慢歎早餐、慢慢歎咖啡，X意就會係尾段時穩妥地出現了，急就會失敗，所以我唔理家姐，自己早啲起身了~

酒店安排嘅馬拉松早餐非常豐富~

有三個麵包，裡面有nuts，感覺好有營養又飽足，仲有一件燕麥堅果脆、香蕉、運動飲品、水，果然係有考慮到運動員嘅需要~呢份早餐差少少嘢，就係咖啡啦﹗為咗完整還原最普通嘅一天，我專登帶咗平時飲開嘅Kanu Latte即溶咖啡嚟沖，perfect﹗

好有愛

同平時一樣一邊打機一邊食包，點解今日會咁嘅？一再完成卡片任務，太多力啦﹗

竟然有1052個力﹗﹗咁忙嘅今日趕唔趕得切用晒佢？

講講我嘅裝備先~

要跑全馬當然要最精選嘅裝備啦，幾乎每次跑比賽都著嘅精選褲(有腰袋同左右兩邊褲袋可以放電話、紙巾、gel)，最近最常著嘅跑步襪(我嘅姑仔莉莎送俾我嘅生日禮物，曉都不知幾羨慕)，入膊跑步背心(上次初半馬時係台中嘅會場買架)，最常著嘅運動bra，太陽帽，環保杯子，太陽眼鏡夾片(太陽眼鏡好重要，越晏越熱時冇咁曬會dur得冇咁快~之前配過兩個有度數嘅太陽眼鏡，但如果天色突然變暗就會太暗，夾片可以進可攻退可守，眼鏡仲要記得攝粒膠係個耳托位置耳仔後面，流咗汗都冇咁容易滑落)~

我哋都ready就可以出門口啦，家姐要去樓下便利店買咖啡飲~去到lobby見到成大group香港跑手，應該係視障跑手團體拉隊一齊參加，先一日冇見過佢哋都唔知添~

去到故宮南院時天仲係好黑，現在時間5:38am~

行去會場時都有少少問題，天色仲係太黑，有啲難認，而且原來security緣故，有啲路暫時封閉，好在有其他跑友互相提點~路上同一個台灣大叔邊傾邊行，講下點解我哋嚟咁遠跑，佢又講下佢自己跑馬嘅經驗~

到會場lu~yeah~

去到會場幾件重要事，要寄行李啦，排隊去最後一次廁所啦~

活動係樂活報名網主辦，佢係咪吉祥物？

之後係大舞台前會有教練係台上教大家一齊做熱身操，好熱鬧~

落力做熱身﹗

都算好快就開跑啦，我哋前前後後有幾組今日挑戰「百馬」殊榮嘅跑手，即是人生第100場馬拉松呀﹗台灣興呢樣，而且啲friend會陪佢跑，拉晒banner、舉晒旗幟咁一邊跑一邊打氣，好似如果有人挑戰百馬，佢嘅支援隊伍報名有discount~我哋個初馬獎座要加錢買，百馬獎座有兩種，一種係加購，一種係免費~免費嘅話要經主辦單位審核，而且最少要有20人陪跑隊伍，第100場、200場…所有100倍數嘅全馬次數都可以申請~btw，100次已經好瘋狂，乜真係有人會200次？﹗如果每個星期都去全台灣各地跑，一個賽季可能max 20次左右，最快都要連續5年咁樣做先得﹗﹗但每個星期跑真係太chur了吧？全馬bor，一個月跑一次都多啦~當然，次數多又唔等於速度一定要快嘅，慢慢累積，有恒心，唔放棄，都唔需要超人先做得到~

準備開錶

我同家姐分道揚鑣，終點見啦﹗家姐向來跑得快過我，又練得勤力過我，佢肯定會快過我完成，我但求唔好太慢，希望可以發揮到自己應有嘅水準就好了~

路線初段係故宮南院裡面兜，之後先至跑出去外圍，最後再返嚟故宮南院衝線~

故宮南院起得幾靚~

全馬組雖然最早出發，但半馬組都只係10分鐘後、11k挑戰組20分鐘後出發，開頭嘅路線大家係一樣嘅，一啲快嘅半馬組好快就會追上來，所以初段都人比較多堆埋一齊，直至半馬組嘅折返點後先鬆動啲，到後段大家嘅速度唔同，當然就更加拉開距離啦，開頭我都有啲擔心，如果前面後面都冇晒人，我會唔會蕩失路？原來即使距離拉開，都未至於前後見唔到人，反而係你前前後後嗰堆人嚟嚟去去差唔多嗰幾個~

去台灣跑同香港唔同，係台灣啲補給站好密同埋好勁，平均3k左右就有一個補給站，而且除咗清水、運動飲品之外，仲有非常多、各式各樣嘅食物提供~香港街馬中途只有一個多啲嘢食嘅補給站，仲要排勁長龍，台灣就個個補給站都供應充足，仲要義工都好熱情添~

咁快就有補給站~

好多嘢食~

居然補給站都有素食區﹗﹗咁細心會唔會過份咗啲？

有啲路段都係繁忙鬧市，因為唔係全部封路，所以有時都要等過馬路~

開頭有氣有力，覺得好快又一個補給站，好快又一個，食到飽晒~

開頭我跟住5:30嘅配速員嚟跑咗都頗長一段，當時覺得好開心，因為速度舒服，又輕鬆跟得上，後來唔知某個補給站之後就跟甩咗了~

我跑到25k左右都仲係好輕鬆舒暢，速度仲比預期嘅快少少，之前練長課最長係32k，應該靠近32k就會開始出現問題~我諗我應該係28k左右開始dur，速度下滑，體力下降，啲補給站開始距離變遠(其實一直都係3k左右就有)，腳步變重…我30k+後開始要跑行跑行完成埋佢~點解programme長課最長只係32k呢？點解唔之前跑完整一次全馬？可能專家們知道，32k打後嘅係跑心理、跑鬥志，32k同42k嘅體力需求分別唔大吧？

5:30 pacer

一直跑一直跑，都唔知跑咗去邊？知又點唔知又點丫？你咪一樣要跑完42k先完賽？

沿途風景

有時直接走車路，不過呢啲鄉村地方車唔多，但都要小心~

例如會有大車係旁邊，都有工作人員幫幫手~左前方孖住跑嘅就係視障運動員同佢partner~

大片大片嘅農田

對面有過咗折返點回程嘅(快)人，我希望唔好咁快見到家姐住啦~

紅色號碼布係全馬跑手，藍色號碼布係半馬跑手~

越跑越曬

呢類型嘅大直路香港唔多機會跑到~

係8:57am我同家姐相遇了~

甘蔗田

30k後路上多咗抽筋嘅人、不得不棄賽嘅人，香港啲賽事救傷站好多好密，路上有義工睇住條路，有事就call人嚟支援，但今次呢個賽事唔係大規模嗰種(全馬1000個報名quota，其他項目都係各1000人max)，路上有電單車巡邏，佢哋會停低幫啲抽筋嘅人打拉筋同埋噴嘢，好在我唔需要用到呢啲服務~

係咪笑我啫？﹗

知啦知啦~XD

後段越跑越熱，補給站有新服務呀，係提供冰塊呀﹗﹗有啲人用膠袋帶啲冰粒走，一邊跑一邊敷下頭敷下頸降溫，我冇拎走呀，係補給站加落去飲品度飲就足夠了~

當地人應該一睇就知呢度咩地方了~

景點呀﹗應該係電視/電影取景地~

大家都停低影下相，呢度有梗廁，我係呢度順便去一去廁所~

正義村？

幾時我重新知道自己去到邊？就係見到蒜頭大橋嗰陣啦，蒜頭？咪就係先一日糖廠嗰邊囉，到蒜頭應該差不多了~

36-40k之間應該係我最糟糕嘅路段，但越嚟越接近終點，我又重新有番啲力，一來就快結束(痛苦)，二來有咗新目標﹗我嘅跑步app Runna教練預測我嘅完賽時間係5:12至5:24，其實我唔覺得我做得到囉，因為我好肯定我後段係必定會掉速，我跑到差不多到終點時，我嘅目標係要守住5次頭﹗﹗﹗我唔要6個鐘先跑完呀~

結果成功六個鐘內完成，gun time 5:58:53.74，chip time 5:57:26.36，排名又未至於太差，7個鐘限時嘅全馬賽事，容許大家慢啲都得，總名次728/996，性別名次97/143，組別名次30/50，下次有好大進步空間~

以下share一下專業攝影師影嘅幾張靚相~

下一篇再講跑完之後嘅事情啦~

前往其他台灣旅遊blog

決定好行程後，我去Klook買定水上樂園入場門券，有得揀只入水上樂園或加埋自助餐券，自助餐？梗係想食啦，就咁入場每人$300+，食埋自助晚餐要$900+，突然間個trip貴咗好多，有少少肉赤，明明係輕鬆簡單短trip嘛，諗完一輪決定食啦，發現如果單買餐券已經full咗，一定要跟水上樂園門券買先仲有，好似好矜貴咁，中咗佢嘅銷售策略…anyway，去埋食自助餐都係令人值得期待嘅~

水上樂園12點先開門，我哋係華人冰室食完個早嘅午餐就入場啦，嘟Klook QR code換手帶，可以全日無限進出，不過玩完濕淋淋，我哋都冇又入又出了~

手帶ready

今個短trip最主要去澳門新濠影滙個水上樂園，水上樂園中午12點先開門，本來可以晏少少出發，唔使咁急～不過我哋個個慣咗早起，所以揀咗早上8:30-9:00送早餐上房～

確實唔需要個鬧鐘，七點左右曉已經起咗身，隨即叫埋我，爸同詩仲瞓緊，就由得佢哋瞓晏啲啦～我同曉，連同插蘇仔、耳塞仔一齊玩鋤大D（即是我哋每人各負責兩副牌），玩咗冇幾多鋪，大家都陸續起身啦～

曉幫我同爸畫嘅掃描，bru bru bru～

聖誕去完雲南，之後一直未特別渴望去旅行，上一個短trip去珠海淇澳島都只係代替情人節晚飯嘅小小渡假啫～大家復活節請3放10買機票去旅行之際，我又冇乜咩plan～放咁多日假都係要去玩下先似樣嘅，開頭有諗過去camp或者露營，康文署camp遲遲未book，結果就full晒啦，政府露營地點怕冇位，私人場地又貴～唔知點解忽然又諗起可以去澳門個室內水上樂園，雖然港珠澳大橋係幾方便，但即日來回都係太頻撲，提早出發，瞓一晚，第二朝就可以精力充沛去玩水啦～

澳門酒店價錢大約係珠海3-4倍，我揀咗拱北口岸正正旁邊嘅L酒店，一來近過關，二來有兩張雙人床嘅房～

星期日下午，兩個女上完游泳班，就直接搭機場巴士去港珠澳大橋口岸過關~

一月去珠海御溫泉，二月去珠海淇澳島，兩次經驗過關都好順利，今次都唔例外，完全唔駛排隊，好快就去到珠海啦～上次係的士站搭的士，今次試下call滴滴，上車位置原來遠少少，而且車太多，大家又心急，即使停車系統已經好efficient，但都有少少混亂，嗰個位置比較焗，大概又冇限制人食煙，總之等咗一陣車，呼吸住廢氣，喉嚨都有少少唔舒服～