今次訂西雙版納悅蓮莊菠蘿度假酒店，講到個package好多嘢送，我哋既然住三晚咁多，睇下有冇機會享用到啦~去完雨林徒步返嚟都未夠下晝五點，食晚飯又太早，不如四處睇下酒店嘅設施啦~
酒店lobby有24小時無限量供應茶飲、小食、糖果、香蕉~
頂樓有酒吧泳池自助洗衣區，今日咁攰，時間又唔係好多，暫時唔游水住啦~
頂樓望出去風景
夜晚上嚟飲啲嘢應該氣氛唔錯~
DIY係樓下嘅戶外，原來有啲DIY係免費，有啲就要付費~只有一個職員姐姐係度stand by，暫時冇其他客人，佢見到我哋嚟都好高興~
我哋先玩咗敲染，所謂敲染，就係將植物嘅天然色素，敲出嚟染係布料上面，我哋要揀好鍾意嘅樹葉同花，排列好係布袋上面，再隔住一層膠膜，用錘仔敲呀敲，最緊要唔好俾佢移位，如果唔係個圖案就唔sharp啦~
將啲顏色敲出嚟~
之後畫傣傘，其實就只係係紙傘上面畫上自己喜愛嘅圖案~
專心工作中
詩作品
可能冇乜客人，姐姐邀請我哋玩埋傣陶，呢啲黏土唔需要燒，只係風乾就得~我哋係度仲留多兩晚，應該乾得切~
要塑形一啲都唔容易，總算有兩個作品可以帶走啦~
曉作品
玩咗咁多樣嘢原來只係半個鐘頭左右，我哋順道問下教手工藝嗰個姐姐附近有咩食肆好推介，佢話好多遊客鍾意去一間叫做「菌公主」嘅火鍋店，雖然先一晚先食過火鍋，我哋都決定去試下啦~
去到果然睇落好勁咁bor，裝修比先一晚嘅火鍋店高級好多，而且店面好大~
估唔到六點幾就已經要等位，等位坐嘅膠凳疊到好高一楝楝，可想而知，多人嘅時候係可以有幾多人等位~我哋等得唔算耐，大約十幾分鐘就可以入座啦~
唔知like咗定做咗啲咩就可以揀禮物，我哋揀咗個頭箍，其實都唔係太似我哋三個嘅style~
我以前曾經有過微信帳號，後來太耐冇用俾人凍結咗，冇心機處理「解凍」，搞到我成日都話返國內時變咗handicapped，去邊度都唔方面，餐廳點餐都有問題~好在近來去親都係同老公一齊，佢有就等於我有啦~今個trip叫嘢食，除咗有時要用微信小程序嚟落order之外，仲要用美團、大眾點評等app嚟叫最優惠嘅combo，同店面俾正價真係差好遠，唔用唔得~
我哋叫咗個二人餐，再散嗌多幾款食物同埋飲品就夠晒了~
點解去完菌公主要講咁多次，同埋將佢變成一個standard嚟比較其他食肆，係因為佢做得真係好好，一來食物質素好啦，樣樣都好好味，特別係個雲南菇菌雞湯底，好味得不得了，我、爸、詩都飲咗勁多湯(曉唔特別鍾意菇)，又飲咗西瓜汁，西瓜汁利尿，總之成晚我哋三個不停來回去廁所，不停出出入入好搞笑~另外，我哋第一次見，原來食肆會留低食物sample做record，唔知係做做樣子丫，定係出問題時真係會拎番出嚟化驗，我哋開始食之前，有staff嚟裝咗少少湯係樣本樽仔入面label好帶走~
講下啲食物先~
冇得輸嘅雲南菇菌雞湯，鮮味爆燈﹗﹗飲勁多~示意服務生加水，都係加番原味湯俾你﹗﹗
主角嘅野生菌拼盤，睇番張單，裡面應該包括：虎掌菌、金耳菌、北風菌、姬松茸、露水雞樅、竹蓀~唔知邊種打邊種~
今個trip經常食烏雞，感覺食過嘅雞都係運動選手雞(?!)，肌肉發達，少脂肪，細細隻，同我哋平時食慣嘅肥雞唔同，太乾唔夠滑~
吊龍(牛肉)
娃娃菜籃
好似花束一樣嘅七彩土豆
花生芽、黑虎蝦滑
原來仲有豌豆苗、鮮面條冇影相
要特別介紹拇指玉米，睇相睇唔出，其實每條粟米都細細條，我哋睇阿盆姐嘅短片見過，特別想試下~
打邊爐配西瓜汁，正呀~
其實仲有啲勁菇架，我哋冇嗌好貴嗰啲呀，係咪真係會更好味呢？
仲有一件好誇張嘅事，話說我哋明明先前用大眾點評叫個二人套餐冇問題，後來諗住再叫大眾點評超值優惠RMB10.8/兩杯西瓜汁，唔知點解整幾次都整唔到，跟住我哋同staff講，算啦，整唔到，正價RMB15/杯收就算啦，當時佢哋都好唔好意思，但好似又冇人有權限點樣處理~但我哋食完晒嘢，埋咗單出咗門口之後，突然有個staff追住出嚟，塞番啲差價嘅cash俾我哋喎~可能呢個網絡世界太發達，一個評論就可以令一間公司倒大楣，佢哋唔容許任何一個出現負評嘅可能性發生吧~
飽到捧住個肚返酒店~
前往其他中國旅遊blog
