今次去豪斯登堡我哋都好犀利，想玩嘅幾乎都玩到，要check下有冇遺漏，係喎，Miffy專區仲有個幻想繪本未去呀～
見到呢幾隻顏色嘅combination就知道同Miffy有關了~
我哋入去Art Gallery探多Miffy一次，今次知道係咩事，唔會俾佢嚇親啦~今次入咗另一間房，有另一個場景，呢個安排都唔錯喎，人多可以有兩隻Miffy(係咪唔講得？哈~)，大家可以等得冇咁耐，而且每隻Miffy另可以輪住休息^^”
Hi Miffy~
今日我哋帶埋小噹噹(香港帶來嘅灰色兔子)同埋豪米米(尋日新買嘅白兔子，因為豪斯登堡買，所以姓豪，米菲個米，全名豪米米)嚟探你呀~而我哋三母女都專登著咗自己嘅Miffy衫來~
原來Miffy幻想繪本係超級多同Miffy+佢啲朋友嘅影相場景，如果係日本人，用佢個系統影完相，可以出去揀相，製作一本獨一無二嘅繪本，但係唔ship去海外，所以我哋外國人就冇份啦～不過入面係任得你用自己手機影，所以唔整繪本都冇話太大損失～
Miffy的廚房
Miffy的廚房
靜靜雞去邊？
去滑雪呀
堆雪球
仲有唔凍嘅雪地
坐雪橇
我又滑
之後去睇動物
騎烏龜
頑皮馬騮+頑皮曉
仲有大象
落雨啦﹗落雨啦﹗
攬住唔驚
搭熱氣球升空吧，你哋跟住Miffy…
我哋跟住Melanie
去埋太空
呢個就係我哋嘅歷險故事啦~
室外都仲有好多cute cute影相位
例如同Miffy打鞦韆~
我哋係豪斯登堡食咗三餐飯，本來就決定，其中一餐要食Miffy主題餐廳，day 2午餐我哋就攰得滯，隨便食咗壽司，仲有一個待辦項目，就係我家姐提及過嘅檸檬牛扒～返到香港先知我搞錯咗啲嘢，佢介紹食檸檬牛扒，我以為係園區入面嘅De Rode Leeuw，原來佢講嘅係日航酒店嘅半自助餐～
晚餐去食西餐~
umum⋯睇下佢個blog，兩間餐廳嘅檸檬牛扒，外表上有相似，又有唔同，相同嘅係都係薄片牛扒，伴生洋蔥、檸檬片，佢嗰個有片parsley，我哋有一啲青蔥，味道就睇唔出有咩分別啦～
反而驚喜係個凍薯仔湯，睇落只係忌廉湯，但一食落去原來係涼嘅，好清爽，但係點解咁細杯㗎？
港式西餐有自己嘅特色，飯、意粉、薯菜任君選擇～
日式西餐，都係可以揀白飯，對選嘅係麵包～主菜嘅肉類比較多，好送飯，日本啲白飯又好食，我哋後尾仲追加多咗一份白飯添～
因為yen平，忍唔住叫咗cocktail，我嗰款係啤酒加lemonade，我記得我哋玩手機遊戲遊《火辣餐廳》入面係有個類似嘅cocktail，所以想試下，叫俾小朋友嗰款就係冇酒精嘅mocktail～啤酒本身酒精少，加埋檸檬汁，除咗有啤酒嘅泡沫之外，都唔係太似酒呢～
另外叫咗蕃茄沙律
煙三文魚
主菜叫咗兩份檸檬牛排，一份豬排~
De Rode Leeuw餐廳
歐式建築與花園
晚飯後隨便閒逛，見到一幢教堂外型嘅建築物，地下係洗手間，去完廁所之後，覺得冇理由咁大幢嘢淨係整個廁所，行去另一邊先知道，原來係玻璃藝術博物館～
屋企以前都曾經有一set咁樣嘅玻璃器皿，以前有客人嚟，媽咪會調啲橙汁cocktail放係中間，用個勺子倒落杯度俾大家飲~
喺入面，我哋停喺每一個展櫃前面，數123，然後要指住自己覺得最靚嗰件玻璃藝術品，睇吓大家嘅品味相唔相似～另外，個博物館係位於2樓、3樓，條樓梯好似公主行落去參加舞會咁，我哋輪住扮王子同公主登場～
其實大家都攰啦，仲有冇嘢必須要做㗎？係呀，未坐夜晚嘅旋轉木馬呀！大家投票後，決定今次坐2/F，既然錯過一次3/F，唔需要特別排長啲嗰條隊啦～
夜晚嘅摩天輪閃閃發光，果然特別浪漫～
大家唔好唔記得，我哋有啲背囊放咗喺高塔城嘅locker，返酒店之前記得要去攞返～個高塔其實係展望台，既然唔使排隊，不如上去一趟睇下夜景啦～
搭電梯上80m高嘅展望台~
豪斯登堡之夜
點解大玻璃嘅其中一邊啲人睇咁耐都唔走嘅？原來到咗噴水表演嘅時間，嗰個位可以睇到～
烘焙曉
locker旁邊就係碼頭，原來呢個時間冇船返到酒店，但都可以坐船去元區正門出口，喺咁嘅情況之下都幫到手～我哋坐低休息下，等下一班船啦～
去埋最後一次紀念品店，買多少少手信～咦，見到有部紀念幣機，可以壓個人化嘅內容，喺Miffy紀念幣上面，好開心bor～
專心努力中
我哋壓咗我哋四個個名，同埋今日嘅日期落去，哎呀，最失敗嘅部份，係臨尾少咗一個space，冇咁靚添～
又夜又攰，要返酒店休息啦，當然，要落去琴乃湯浸埋溫泉先瞓覺啦～
前往其他日本旅遊blog
